ސަރުކާރާ ފެޔަށްޖެހި 2023ގެ އިންތިޚާބު ގެއްލި 2028ގެ އިންތިޚާބު ހޯދޭނެކަމަށް ޤަބޫލުކުރުމަކީ ރަނގަޅު ވިސްނުމެއް ނޫންކަމަށް އެމްޑީޕީގެ ޗެއަރޕާސަންކަމަށް ވާދަކުރައްވާ އިކޮނޮމިކް މިނިސްޓަރ ފައްޔާޟް އިސްމާޢީލް ވިދާޅުވެއްޖެއެވެ.
ޏ.ފުވައްމުލަކުގައި ކެމްޕެއިންގައި ސަޕޯޓަރުންނާއި ވާހަކަފުޅު ދައްކަވަމުން ފައްޔާޒް ވިދާޅުވީ، އަބަދުވެސް ވިސްނަންވާނީ ސިޔާސީ ޕާޓީވަރުގަދަކޮށް ސިޔާސީ ހަރަކާތް ވަރުގަދަކޮށް ރައްޔިތުންނަށް ދިމާވާ ކަންކަން ހައްލުކުރުމަށްކަމަށެވެ. އެކަން ކުރެވޭނީ ޕާޓީގެ މެންބަރުންނާއި ސަރުކާރާއި ގުޅިގެންކަމަށާއި، ފެޔަށް ޖެހިގެން މިކަމެއް ނުވާނެކަމަށް ފައްޔާޒް ވިދާޅުވިއެވެ.
ރައީސް ނަޝިދު ވިދާޅުވިނަމަވެސް، ސަރުކާރާ ފެޔަށް ޖެހުމަކީ ރަނގަޅުގޮތެއް ނޫންކަމަށާއި، ސަރުކާރާ އެކު މަސައްކަތްކުރުމަށް ވިސްނުން ހުންނަންޖެހޭކަމަށެވެ. 2023 އިދިކޮޅަށް ދޫކޮށްލައިގެން ދެން އިންތިޚާބު ކާމިޔާބުކުރެވޭނެކަމަށް ނުވިސްނޭކަމަށްވެސް ފައްޔާޒް ވިދާޅުވިއެވެ. އޭނާ ވިދާޅުވީ ސަރުކާރާ ފެޔަށްޖެހި 2023 ގެއްލި 2028 ލިބޭނެކަމަށް ޤަބޫލުކުރުމަކީ ރަނގަޅު ވިސްނުމެއް ނޫންކަމަށެވެ.
ވަރަށް އިހްތިރާމާއެކު މި ދަންނަވަނީ ރައީސް ނަޝީދު ވިދާޅުވިޔަސް އަޅުގަނޑުމެންނަކަށް ނެތް ސަރުކާރާ ފެޔަށް ޖެހެވޭކަށް،އެއީ ރަނގަޅުގޮތެއް ނޫން އަޅުގަނޑުމެން ވިސްނަންވީ ސިޔާސީ ހަރަކާތްތަށް ވަރުގަދަކޮށް ބަދަހި ކޮށް ރައްޔިތުންނަށް ދިމާވާ ކަންތައްތަށް ހައްލުކޮއްދޭ ޕާރޓީ އަކަށް މި ޕާޓީ ހަދަން.
– ފައްޔާޒް އިސްމާޢީލް
ފައްޔާޒް ވިދާޅުވީ އެމްޑީޕީގެ ހިންގުން ހަރުދަނާކުރަންޖެހޭކަމަށެވެ. އަދި ޕާޓީގެ މެންބަރުންނާ ޕާޓީއާ ގުޅިގެން ތާ އަބަދު މަސައްކަތްކުރެވޭނެ ގޮތެއް ހޯދަންޖެހޭކަމަށާއި، ޕާޓީގެ މެންބަރުންނާ މަޝްވަރާ ޕާޓީގެ ސިޔާސަތު ކަނޑައަޅާ މޭޒަށް ހަގީގަތުގައިވެސް ޖާންއެބަޖެހޭކަމަށް ފައްޔާޒް ވިދާޅުވިއެވެ.
ތިބޭފުޅުންގެ ކަންބޮޑުވުންތައް، ތިބޭފުޅުންގެ ޝަކުވާތައް އަދި އެ ޚިޔާލުތައް އެބަޖެހޭ ސަރުކާރެއް އަޅުގަނޑުމެންގެ އޮތްއިރު ސަރުކާރާ އެއްކޮށް މަޝޤވަރާކުރެވިގެން އެކަންކަމަށް ހައްލު ހޯދާ ތިބޭފުޅުންގެ ކަންބޮޑުވުންތަކަށް ތަސައްލީއެއް ހޯދަން. އެއީ ސިޔާސީ މަސައްކަތަކީ، އެއީ ސިޔާސީ ޕާޓީއަކުން ކުރަންޖެހޭ ކަމަކީ.
– ފައްޔާޒް ވިދާޅުވިއެވެ.
އެމްޑީޕީގެ ޗެއަރޕާސަން އިންތިޚާބު އޮންނާނީ އަންނަ ހޮނިހިރު ދުވަހުއެވެ.
