މި މަހުގެ ފަސްވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ ޗެއަރޕާރސަން އިންތިޚާބުގައި ވާދަކުރާ ދެ ކެނޑިޑޭޓުންގެ މެދުގައި، އާންމުންގެ ޚިޔާލް ހޯދުމަށް ޚަބަރު އޮންލައިންއިން ނެގި ފުރަތަމަ ޕޯލްގައި ބޮޑު ތަފާތަކުން، އެމްޑީޕީގެ އެތެރޭގެ މި އިންތިޚާބު ފައްޔާޒު އިސްމާއިލް ކާމިޔާބު ކުރާނެކަމަށް ދައްކައިފިއެވެ.

ސައުވީސް ގަޑިއިރަށް ކުރިއަށް ގެންދިޔަ މި ޕޯލްގައި ވޯޓު ދިން މީހުންގެ ތެރެއިން 72 އިންސައްތަ މީހުން ގަބޫލުކުރާ ގޮތުގައި މިއިންތިޚާބު ކާމިޔާބު ކުރާނީ، ރައީސް ސާލިހުގެ ތާއީދާއެކީ އިންތިޚާބުގައި ވާދަކުރައްވާ، މިހާރުގެ އިކޮނޮމިކް މިނިސްޓަރ ފައްޔާޒު އިސްމާއިލެވެ. ރައީސް ނަޝީދުގެ ތާއީދާއެކީ އިންތިޚާބުގައި ވާދަކުރައްވަމުން ގެންދަވާ، ރައްޔިތުންގެ މަޖިލިހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ އިންތިޚާބު ކާމިޔާބު ކުރައްވާނެކަމަށް ގަބޫލުކުރަނީ 28 އިންސައްތަ މީހުންނެވެ.

މިއިންތިޚާބުގައި ވޯޓުލުމުގެ ކުރިން، ޚަބަރު އޮންލައިން އަދި އިތުރު އެއް ޕޯލު ކުރިޔަށް ގެންދިއުމަށް ހަމަޖެހިފައިވާކަން އެނޫހުން ހާމަ ކޮށްފައި ވެއެވެ. އެމްޑީޕީގެ ޗެއަރޕަރސަން އިންތިޚާބުގެ ކެމްޕޭން ފޯރީގައި ކުރިޔަށް ދާއިރު، އިންތިޚާބިގައި ވާދަ ކުރައްވާ ދެ ކެނޑިޑޭޓުންވެސް ގެންދަވަނީ ރަށްރަށް ޒިޔާރަތްކޮށް، އެޕާޓީގެ އާންމު މެމްބަރުންގެ ތާއީދު ހޯއްދެވުމަށް މަސައްކަތް ކުރައްވަމުންނެވެ.

ކުރިޔަށްދާ އެމްޑީޕީގެ ޗެއަރޕާރަސްންގެ އިންތިޚާބުގެ ކެމްޕޭން ވާދަވެރިކަމުގައި އެޕާޓީވަނީ ދެބައިވެ، ޕާޓީގެ އެތެރޭގައިވަނީ ރައީސް ނަޝީދަށް ތާއީދުކުރާ ފެކްޝަންއަކާއި ރައީސް ސާލިހަށް ތާއީދުކުރާ ފެކްޝަންއެއް އުފެދިގެން ގޮސްފައެވެ. އަދި ރައްޔިތުންގެ މަޖިލިހުގެ ރައީސް ސާލިހަށް ތާއީދުކުރާ ފެކްޝަންގެ މެމްބަރުންނާއި، ސަރުކާރުގެ ކެބިނެޓާއި ކުންފުނިތަކުގެ އިސްވެރިންވެސް ފައްޔާޒަށް ތާއީދު ހޯއްދެވުމަށް މަސައްކަތް ކުރައްވަމުން ގެންދަވާއިރު، ޕާޓީގެ ލީޑަރޝިޕްގެ އިތުރުން، ޕާލަމެންޓްރީ ގުރޫޕްގެ، ނަޝީދަށް ތާއީދުކުރާ ފެކްޝަންގެ މެމްބަރުން ގެންދަވަނީ އިމްތިޔާޒު ފަހުމީއަށް ތާއީދު ހޯއްދެވުމަށް ރަށްރަށް ދަތުރު ކުރައްވަމުންނެވެ.