އައްޑޫ ސިޔާސީ ލީޑަރުން ކުރިއަރުމަށްޓަކައި މިހާތަނަށް ބޯހިއްލާލި ކޮންމެ ފަހަރަކު އެމްޑީޕީން ވަނީ ގަންބާލާފައި ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.
ސިޔާސީ ގޮތުން އެމްޑީޕީ ތެރޭގައި އޮތް ތަފާތު ކުރުންތަކާއި، ފިއްތުންތަކާއި ގުޅޭގޮތުން ޝަރީފަކީވެސް މިހާތަނަށްވެސް މަޖިލީހުގެ ޖަލްސާތަކުގައިއާއި، އާންމު ތަންތާގައިވެސް ވާހަކަ ދައްކަވާފައިވާ ބޭފުޅެކެވެ. ޚާއްސަކޮށް އައްޑޫގެ ސިޔާސީ ލީޑަރުންނަށް އެމްޑީޕީ ތެރެއިން ކުރިއަށް ނުދެވޭ މައްސަލައަކީ ޝަރީފް އޮތް ބޮޑު ކަންބޮޑުވުމެކެވެ.
އޭނާ މިފަހަރު އައްޑޫ ސިޔާސީ ލީޑަރުނގެ ދިފާއުގައި ނިކުންނެވީ އެންވާރުމެންޓް މިނިސްޓަރ ޝައުނާ ފައްޔާޟަށް ތާއީދު ކުރުމާއި ގުޅިގެން ރައީސް ނަޝީދު ކިޔާފައިވާ ފާޑުކިޔުންތަކާއި ގުޅިގެންނެވެ. ޝައުނާއާއި އައްޑޫގެ ސިޔާސީ ލީޑަރުންގެ ދިފާއުގައި ޝަރީފް ވިދާޅުވީ މިހާތަނަށް އައްޑޫއިން އުފެދުނު ކޮންމެ ސިޔާސީ ލީޑަރެއްވެސް ކުރިއަރައިގެންދާނަމަ އެމީހަކު ގަންބާލުމަކީ އެމްޑީޕީ ތެރެއިން ފެނިގެން ގޮސްފައިވާ ސަގާފަތް ކަމަށެވެ.
އައްޑޫ އިން އުފަންވާ ކޮންމެ ސިޔާސީ ލީޑަރެއްގެ އަބުރު ކަތިލައި ސައިޒު ކުއުމަކީ އެމްޑީޕީގައި މިހާތަނަށް ހިންގަމުން އަންނަ އާންމު ކަމެއް. އެއީ އަޅުގަނޑު ކަމަށްވިޔަސް، ޑރ.މުނައްވަރު ކަމަށްވިޔަސް، ޑރ.ޑީޑީ ކަމަށްވިޔަސް، އެމްޕީ އަސްލަމް ކަމަށްވިޔަސް، އަދު ޝައުނާ، ޖެހުނީ އެހާލު. މިއީ ރޭވިގެން ހިނގާކަމެއް.
– ޝަރީފް ވިދާޅުވިއެވެ.
އޭނާ ވިދާޅުވީ މިކަން ބަދަލު ކުރުމަށްޓަކައި އެމްޑީޕީގެ ލީޑަރޝިޕަށް ބަދަލު ގެނައުމަކީ މިއަދު ކުރެވޭ މަސައްކަތް ކަމުގައެވެ. އެމްޑީޕީއަކީ ހަމަހަމަ ކަމާއިއެކު އެންމެނަށްވެސް ކުރިއަރައިގެން ދެވޭނެ ޕާޓީއަކަށް ވާންޖެހޭކަމަށެވެ. އައްޑޫގެ ސިޔާސީ ލީޑަރުންނާއިމެދު އެމްޑީޕީގެ މިހާރު އޮތް ލީޑަރޝިޕުން އަމަލުކޮށްފައިވާ ގޮތާއިމެދު އައްޑޫ ސިޓީގެ ރައްޔިތުން ވިސްނަން ޖެހޭކަމަށް ޝަރީފް ވިދާޅުވިއެވެ.
މިކަމަކީ އައްޑޫ ރައްޔިތުން ފުންކޮށް ވިސްނާލަން ވެއްޖެ ކަމެއް. އައްޑޫއަށް އުފަން ކޮންމެ ސިޔާސީ ލީޑަރަކު ކިރިޔާ ބޯހިއްލާލިޔަސް ގަންބާލާ.
– ޝަރީފް ވިދާޅުވިއެވެ.
ޝައުނާގެ ފަޔާއަށް ތާއީދު ކުރައްވައި އެމްޑީޕީއަށް ރަނގަޅު ގޮތަކީ މިހާލަތުގައި ފަޔާއަށް ތާއީދުކުރުންކަމަށް ވިދާޅުވެ ދެއްކެވި ވާހަތަކާއި ގުޅިގެން ނަޝީދު ވަނީ ރައްދު ދެއްވާފައެވެ. ނަޝީދު ވިދާޅުވީ ޝައުނާއަށް އޭނާގެ އަމިއްލަ ވަޒީފާގެ ހިމާޔަތުގައި އަމިއްލަ މަސްލަހަތު އިސްކުރި ކަމުގައި ވީނަމަވެސް އެމްޑީޕީއަށް ރަނގަޅުގޮތް އެގޭނީ އެމްޑީޕީ މެމްބަރުންނަށް ކަމަށެވެ.
ފަޔާއަށް ތާއީދުކޮށް ޝައުނާ ވިދާޅުވީ, އެމްޑީޕީން ވައުދުވެ ކުރަން ހުރި ކަންކަން ވަރަށް ގިނަ ކަމަށާއި އެ ކަންކަން ކުރުމަށް މި ރިޔާސީ ދައުރުގައި މަސައްކަތް ކުރަން ޖެހޭ ކަމަށެވެ. އެ މަސަކަތް ކުރަން ޖެހެނީ ޕާޓީއާއެކު ކަމަށެވެ. ޝައުނާ ވިދާޅުވި ގޮތުގައި, އޭނާ އާއި ފައްޔާޒު އެއްބަސްވާ ކަންކަން ވަރަށް މަދުވާނެ ކަމަށާއި ގިނަ ވާނީ ދެބަސްވާ ކަންކަމެވެ. އެހެން ނަމަވެސް, ޝައުނާ ވިދާޅުވި ގޮތުގައި ދެބަސްވެ ޒުވާބުކޮށް ވާހަކަ ބަދަލުކޮށް ކަންކަން ނިންމަދޭ އަދި ކަންކަން ކޮޅެއްގައި ޖައްސާ މީހެއްގެ ގޮތުގައި ފައްޔާޒު ފާހަގަކުރެވޭ ކަމަށެވެ.
މިއީ އެމްޑީޕީ ވަޒީރަކު ފަޔާއަށް ތާއީދުކޮށްގެން ނަޝީދު މިހާބޮޑަށް ކޯފާވި ފުރަތަމަ ފަހަރެވެ. މީގެ ކުރިން ރައީސް މުހައްމަދު ނަޝީދުގެ ބޮޑުބޭބެ, ހެލްތު މިނިސްޓަރު އަހުމަދު ނަސީމް ވެސް ވަނީ ފައްޔާޒަށް ތާއިދު ކުރައްވާކަން އިއުލާންކޮށްފައެވެ. ނަމަވެސް ނަޝީދު ނަސީމްއާއި ގުޅޭގޮތުން އެއްވެސް އެއްޗެއް ވިދާޅުވެއް ނުވެއެވެ.
ސަރުކާރުގައި ހިމެނޭ އެމްޑީޕީ ވަޒީރުންގެ ތެރެއިން މިހާތަނަށް ފަޔާގެ ކެމްޕެއިންގައި ބައިވެރި ނުވަނީ ޔޫތު މިނިސްޓަރ މަހުލޫފާއި، ޕްލޭނިން މިނިސްޓަރ އަސްލަމްއާއި، ޑިފެންސް މިނިސްޓަރ މާރިޔާ ދީދީއާއި، ފޮރިން މިނިސްޓަރ ޝާހިދުއެވެ. ނަމަވެސް ބޮޑަށް ގަބޫލު ކުރެވޭ ގޮތުގައި މިބޭފުޅުންގެ ތާއީދުވެސް އޮތީ ފައްޔާޟުއަށް ކަމަށް ބެލެވެއެވެ.
