ރާއްޖޭގައި ނޫސްވެރިކަމުގެ މިނިވަންކަމާއި، ޚިޔާލްފާޅު ކުރުމުގެ މިނިވަންކަން އޮންނަން ޖެހޭކަމަށް އެންމެ ބޮޑަށް ވަކާލާތު ކުރަމުންދިޔަ އެއްބަޔަކީ މިހާރު ވެރިކަމުގައި އޮތް މައި ޕާޓީ އެމްޑީޕީއެވެ.
ވެރިކަމާއި ހަވާލުވެ، މިވީ 3 އަހަރާއި ބައިގެ ތެރޭގައި ސަރުކާރުން މީޑިއާ ކޮންޓްރޯލްކޮށް، މިލިޔަނުން ފައިސާ ދޭވާހަކައަކީ މީގެ ކުރިން ދެކެވި ހަގީގަތަކަށް ނުވެ އޮތް ވާހަކައެކެވެ. ނަމަވެސް ނޫސްވެރިކަމުގެ މިނިވަންކަމުގެ ބައިނަލްއަގްވާމީ ދުވަހާ ގުޅިގެން އިއްޔެ "ރިޕޯޓާސް ވިތައުޓް ބޯޑާސް" އިން ނެރުނު ރިޕޯޓާއިއެކު މިވާހަތަކުގެ ހަގީގަތް އެންމެ ބޮޑަށް ހާމަކޮށްދެއްވީ އެމްޑީޕީގެ އިސްސަފުގައި ހިމެނޭ ލީޑަރޝިޕްގެ ބޭފުޅުންނެވެ.
ސަރުކާރުން ބޭނުންވާ މީޑިއާތަކަށް މިލިޔަނުން ފައިސާ ދޭ ވާހަކަތަކާއި، ބޭނުންވާ ޚަބަރާއި މައުލޫމާތު ފެތުރުމަށް ނުރަނގަޅު އެތައްކަމެއް ރައީސް އޮފީސް ތެރެއިން ކުރަމުންދާކަމުގެ ވާހަކަ ރައްޔިތުންނާއި ހިއްސާ ކުރީ އެމްޑީޕީގެ ލީޑަރޝިޕް ބޭފުޅުންނެވެ. މިއީ މީޑިއާގެ މިނިވަންކަމުގެ ދިފާއުގައި އެންމެ ބޮޑަށް ވަކާލާތު ކުރި މީހުންގެ މިއަދުގެ ހާލަތެވެ.
ނޫސްވެރިކަމުގެ މިނިވަންކަމުގެ ބައިނަލްއަގްވާމީ ދުވަހާ ގުޅިގެން "ރިޕޯޓާސް ވިތައުޓް ބޯޑާސް" ކޮންމެ އަހަރަކު އާންމު ކުރަމުން އަންނަ "ވޯލްޑް ޕްރެސް ފްރީޑަމް އިންޑެކްސް" ގައި ރާއްޖެ މި އަހަރު ރާއްޖެ އޮތީ 87 ވަނައިގައެވެ. މިދިޔަ އަހަރުގެ އެ އިންޑެކްސްގައި ރާއްޖެ އޮތީ 72 ވަނައިގައެވެ. އެހެންކަމުން އެއީ 15 ދަރަޖައިގެ ވެއްޓުމެކެވެ. މިއީ ފާއިތުވި ހަތަރު އަހަރުގެ ތެރޭގައި، އެ އިންޑެކްސްގައި ރާއްޖެ އެންމެ ފަހަތަށް ދިޔަ ފުރަތަމަ ފަހަރެވެ.
ނަމަވެސް އިއްޔެ ރައީސުލްޖުމްހޫރިއްޔާ ވިދާޅުވެފައިވަނީ ހަރުކަށި ހިފެހެއްޓުންތަކެއްގެ ތެރޭގައި މީގެ ތިން އަހަރު ކުރިން އޮތް ދިވެހި ނޫސްވެރިކަމަށް ފުރިހަމަ މިނިވަންކަން ހޯދައި ދެއްވިއްޖެކަމަށެވެ. ރައީސް ވިދާޅުވެފައިވަނީ އޭޝިޔާ ސަރަޙައްދުން ދިވެހިރާއްޖެއަކީ ނޫސްވެރިކަމުގެ މިނިވަންކަމުގެ ޙައްޤު، މިހާރު އެންމެ ފުރިހަމައަށް ލިބިދީފައިވާ، އަދި އެ ޙައްޤުގެ ބޭނުން އެންމެ ފުރިހަމައަށް ހިފާ މަދު ޤައުމުތަކުގެ ތެރެއިން އެއް ޤައުމުކަމަށެވެ.
ރައީސްގެ ވާހަކަފުޅު މިހެން ހުރި ނަމަވެސް އެމްޑީޕީގެ ލީޑަރޝިޕްގައި ހިމެނޭ ރައީސް މުހައްމަދު ނަޝީދަށް ތާއީދު ކުރާ މެމްބަރުން ދަނީ ރާއްޖޭގެ މީޑިއާގެ މިނިވަންކަމުގެ ހާލަތު އޮތް މިންވަރު ހާމަކޮށްދީފައެވެ. އެމްޑީޕީގެ އިސްސަފުގައި ހަރަކާތްތެރިވާ އަދި މަޖިލީހުގެ ނައިބް ރައީސް އީވާ ވިދާޅުވެފައިވަނީ ސަރުކާރުން ސްޕޮންސާ ދީގެން މީޑިއާތައް ކޮންޓްރޯލް ކުރަން އުޅުމަކީ ހިތާމަކުރަންޖެހޭ ކަމެއްކަމަށެވެ. ފެނިގެންދަނީ ސަރުކާރުން ބޭނުންވާ ވަކި އެޖެންޑާތަކެއް ފެތުރުމަށްޓަކައި ވަކިވަކި މިނިސްޓްރީތަކާއި، ކުންފުނިތަކުން މިލިޔަނުން ޚަރަދު ކުރަމުންދާ މަންޒަރުކަމަށެވެ. ސަރުކާރުން މަސައްކަތް ކުރަންޖެހޭނީ މިނިވަން މީޑިއާއަކަށް ފުރުސަތު ދޭންކަމަށާއި، މީޑިއާތައް ގަނެލައިގެން ސަރުކާރުން ބޭނުންވާހާ ގޮތަކަށް ޕްރޮޕެގެންޑާ ފަތުރާކަށް ނޫންކަމަށް އީވާ ވިދާޅުވިއެވެ.
ސްޕޮންސަރތައް ދީގެން ދައުލަތުން މީޑިއާތައް ކޮންޓްރޯލްކުރުމަކީ ހިތާމަ ކުރަންޖެހޭ އާދައެއް. ސަރުކާރުގެ އެޖެންޑާ ފެތުރުމަށް, ރައީސް އޮފީހުންނާއި މިނިސްޓްރީ ތަކުންނާއި ދައުލަތުގެ ކުންފުނިތަކުން މިލިއަނުން, ދައުލަތުގެ މާލިއްޔަތުން ޚަރަދު ކުރުމަކީ ސަރުކާރުން މީޑިއާތަކަށް ނުފޫޒު ފޯރުވުން. ސަރުކާރުގެ ދައުރަކަށް ވާންވާނީ މިނިވަން މީޑިއާއަށް ހިތްވަރު ދިނުން, މީޑިއާތައް ގަނެލުމެއް ނޫން.
– އީވާ ވިދާޅުވިއެވެ.
އިވާގެ އިތުރުން އެމްޑީޕީގެ ޗެއާޕާސަންގެ މަޤާމަށް ވާދަކުރާ އިމްތިޔާޒު ފަހުމީ ވިދާޅުވީ ނޫސްވެރިކަމުގެ މިނިވަން ހޯދުމަށާއި، މިނިވަންކަން ލިބިގަތުމަކީ އެމްޑީޕީން ކުރަން ނިކުތް އެންމެ ބޮޑު އެއްމަސައްކަތް ކަމުގައެވެ. މިއަދު އަނެއްކާވެސް ނޫސްވެރިކަމުގައި ދިވެހިން އެތައް ގުނައެއް ފަހަތަށް ދިއުމަކީ ނުހަނު ކަންބޮޑުވާކަމެއްކަމަށެވެ. މިނިވަން މީޑިއާއެއް ހިންގޭނީ ސަރުކާރުގެ ނުފޫޒާއި، ބާރު ނެތި މިނިވަންކަމާއިއެކު ނޫސްވެރިކަން ކުރެވޭނެ ފަދަ މާހައުލެއް ގާއިމްކޮށް ދެވިގެން ކަމުގައި އިންތި ވިދާޅުވިއެވެ.
ނޫސްވެރިކަމުގެ މިނިވަންކަން އޮތުމަކީ އަޅުގަނޑުމެން ލޮލުން ބޮލުން އެދިގެން ކުރާން ނުކުތް އެއްކަންތައް. ނޫސްވެރިކަމުގެ މިނިވަންކަން ސޮއްސާލައިގެން ދާދިޔުމަކީ ވަރަށް ކަންބޮޑުވާ ކަމެއް. ސަރުކާރުން ކޮންޓްރޯލް ނުކުރާ މިނިވަން ނޫސްވެރިކަމެއް އޮތުމަކީ ޑިމޮކްރެޓިކް ވެރިކަމެއްގެ އެއް ރުކުން.
– އިންތި ވިދާޅުވިއެވެ.
އިންތިގެ އިތުރުން މެމްބަރު ވައްޑެވެސް ވަނީ މީޑިއާތައް ކޮންޓްރޯލް ކުރުމަށް ސަރުކާރުން އިންތިހާއަށް ނުފޫޒު ފޯރުވާކަމަށް ވިދާޅުވެފައެވެ. އަދި މިއީ ލަދުވެތި ކަމެއްގެ ގޮތުގައި ވައްޑެވަނީ ސިފަ ކޮށްފައެވެ.
މީިގެ އިތުރުން އެމްޑީޕީ ސަރުކާރުގެ ކުރީގެ ފޮރިން މިނިސްޓަރ އަދި އދ.ގެ ޚާއްޞަ ރެޕަޓުއަރ ޑރ.އަޙްމަދު ޝަހީދުވެސް ވަނީ ސަރުކާރުން މިހާރު މީޑިއާތަކަށް ނުފޫޒު ފޯރުވައި މިނިވަންކަން ނަގާލުމަށް ކުރާ މަަސައްކަތް ހިއްސާކޮށްފައެވެ. ޝަހީދު ވިދާޅުވީ ނޫސްވެރިކަމުގެ މިނިވަންކަން ފާހަގަކުރާއިރު، ރާއްޖޭގައި މީޑިއާ އޮތީ ސަރުކާރުގެ ޖީބުގައިކަމަށެވެ. ކަންކަމާއި ގުޅޭ މަޢުލޫމާތު ސަރުކާރުން ދިނުމުގައި ދޭ ސަމާލުކަން ވަނީ ދަށަށް ގޮސްފައިކަމަށާއި، ސަރުކާރުން ފަތުރާ ސައްޙަ ނޫން ނުވަތަ ދޮގު މަޢުލޫމާތު ފެތުރުން އިތުރުވެފައިވާކަމަށްވެސް ޝަހީދު ވިދާޅުވިއެވެ.
Press Freedom Day mi aharu faahaga kuraa iru media othee Sarukaaruge jeebuga! Access to Informationah sarukaarun dhey samaalukan vany dhashah gosfa. Sarukaarun fathuraa disinformation vany ithuru. Media manipulation ves vany ithuru. Kanthahthah olhuvaalumaai foruvun dhany kuriah.
— Ahmed Shaheed (@ahmedshaheed) May 3, 2022
މީޑިއާގެ މިނިވަންކަން ހޯދުމަށް އެންމެ ބޮޑަށް ވަކާލާތު ކުރި ސަރުކާރަށް މިޑިއާގެ މިނިވަންކަމުގައި މިހާބޮޑަށް ދަށަށް ދިއުމަކީ އަލުން މީޑިއާގެ މިނިވަންކަން ހޯދަން ޖެހިފައިވާ ކަމެއްގެ ގޮތުގައި އެމްޑީޕީގެ ގިނަ ބޭފުޅުން ދަނީ ވިދާޅުވަމުންނެވެ. "ރިޕޯޓާސް ވިތައުޓް ބޯޑާސް" ގެ ރިޕޯޓާއި ގުޅިގެން އިދިކޮޅު ފަރާތްތަކުން ނުކިޔާ މިންވަރަށް އެމްޑީޕީން މިކަމަށް ފާޑު ކިޔަނީ ސަބަބުތަކެއް އޮތުމުންކަމަށް ގިނަ ބަޔަކު ދެކެއެވެ.
