ގައުމުތަކުގައި ނޫސްވެރިކަމުގެ މިނިވަންކަން އޮންނަ ވަރު ބަލާ ޖަމިއްޔާ "ރިޕޯޓާސް ވިތައުޓް ބޯޑާސް" ކޮންމެ އަހަރަކު އާންމު ކުރަމުން އަންނަ "ވޯލްޑް ޕްރެސް ފްރީޑަމް އިންޑެކްސް" ގައި ރާއްޖެ މިދިޔަ އަހަރަށް ވުރެ 15 ދަރަޖަ ފަހަތަށް ވެއްޓުމަކީ ލަދުވެެތި ކަމެއް ކަމުގައި އެމްޑީޕީގެ ޕާލިމަންޓްރީގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
މިއަދު ފަހާގަކުރާ ނޫސްވެރިކަމުގެ މިނިވަންކަމުގެ ބައިނަލްއަގްވާމީ ދުވަހާ ގުޅިގެން އެ ޖަމިއްޔާ އިން އާންމުކުރި އިންޑެކްސްގައިވާ ގޮތުން، މި އަހަރު ރާއްޖެ އޮތީ 87 ވަނައިގައެވެ. މިދިޔަ އަހަރުގެ އެ އިންޑެކްސްގައި ރާއްޖެ އޮތީ 72 ވަނައިގަ އެވެ. އެހެންކަމުން އެއީ 15 ދަރަޖައިގެ ވެއްޓުމެކެވެ.
މިއީ ފާއިތުވި ހަތަރު އަހަރުގެ ތެރޭގައި، އެ އިންޑެކްސްގައި ރާއްޖެ އެންމެ ފަހަތަށް ދިޔަ ފުރަތަމަ ފަހަރެވެ. އެ އިންޑެކްސްގައި 2018 ވަނަ އަހަރު ރާއްޖެ އޮތީ 120 ވަނައިގަ އެވެ އަދި 2019 ވަނަ އަހަރު 98 ވަނައިގައި އޮތް އިރު، 2020 ވަނަ އަހަރު އޮތީ 79 ވަނައިގައެވެ.
މީޑިއާގެ މިނިވަންކަމުގައި ރާއްޖެ އަނެއްކާވެސް ފަހަތަށް ދިއުމަކީ ވަރަށް ލަދުވެތި ކަމެއްގެ ގޮތުގައި ވައްޑެ ވަނީ ވިދާޅުވެފައެވެ. ވާދަވެރިކަން ބޮޑުވެފައިވަ އެމްޑީޕީގެ ޗެއާޕާސަން އިންތިޚާބުގައި އިންތިގެ ސްޕޯކްސްޕާސަންގެ މަޤާމުވެސް ފުރުއްވާ ވައްޑެ ވަނީ މިއިންތިޚާބުގައިވެސް ސަރުކާރުން މީޑިއާތަކަށް އިންތިހާއަށް ނުފޫޒު ފޯރުވާކަން ފާހަގަކޮށްފައެވެ.
މީޑިއަތަކުގައި ފައިސާދީގެން އާޓިކަލް ޖެހުމާއި، ރައީސުލްޖުމްހޫރިއްޔާގެ ޕްރޮމޯޝަނަލް މަސައްކަތްތައް ފައިސާދީގެން ކުރާމައްސަލާގައި ވައްޑެ ވަނީ މީގެ ކުރިން ތަކުރާރުކޮށް ސަރުކާރަށް ފާޑުވިދާޅުވެފައެވެ. އަދި މިއީ ރާއްޖޭގައި އޮތް މިނިވަން ނޫސްވެރިކަން ނެތިކޮށްލައި، ވަކި ގޮތަކަށް ނޫސްތައް ބައްޓަން ކުރުމަށް ސަރުކާރުން ކުރާ ވަރަށް ދަށު ދަރައިޖައިގެ ކަމެއްކަމަށް ވަނީ ބުނެފައެވެ.
ސަރުކާރުން ވަކި މީޑިއާތަކަކަށް ފައިސާދީގެން އާޓިކަލްތައް ޖެހުމާއި، ޚަބަރު ގެނެސްދޭން މަސައްކަތް ކޮށްފައިވާކަން ދާދިފަހުން ރައީސް އޮފީހުން އާންމުކުރި މައުލޫމާތުތަކުން ވަނީ ހާމަވެފައެވެ.
