ފުވައްމުލަކުގައި ޑައިވިން އަށް ގޮސް އުޅެނިކޮށް، އެ ރަށު މުހައްމަދު ސައީދު ގެއްލިގެން ހޯދަމުން އަންނައިރު އޭނާގެ އަންހެނުން އައިމިނަތު އިސްމާއީލް އަށް ކޮށްފައިވާ އަސަރު ހާމަކޮށްދޭ އަސަރުގަދަ މެސެޖްތަކެއް ސޯޝަލް މީޑިއާގައި ހިއްސާކޮށްފިއެވެ.
ފިރިމީހާ ގެއްލުނު ފަހުން އިއްޔެ އާމިނަތު ލިޔުނު ފުރަތަމަ ޕޯސްޓްގައި ވަނީ ސައީދަކީ އޭނާ އެންމެ ލޯބިވާ އޭނާގެ ފުރާނަ ކަމަށެވެ. އަދި އެއީ އޭނާގެ ހުރިހާ އުއްމީދު ކަމަށާއި، އެއީ އޭނާގެ ހިނިތުންވުން ކަމަށްވެސް ލިޔެފައި ވެއެވެ.
އައިންތުގެ ހުރިހާ ހިތްހަމަޖެހުން، އައިންތު ދުނިޔޭގައި މި އޮތްހާ ދުވަހު ސަލާމަތުން ހުރުމުގެ ސަބަބު. އައިންތުގެ ފުރާނައެއް ފަދަ ލޯބިވާ ފިރިމީހާ ހެޔޮ ހާލުގައި ފެނުމުގެ ނަސީބު ލެއްވުުމަށް އެންމެން ދުއާ ކޮށްދީ.
– އާމިނަތުގެ އެ ޕޯސްޓްގައި ވެއެވެ.
އެހެން ޕޯސްޓެއްގައި އައިންތުގެ ހަނދާނަށް ގެނެސްފައި ވަނީ ދުވަސްތަކެއް ކުރިން ނިޔާވެފައިވާ މަންމަ އާއި މީގެ ދެ އަހަރު ވަރު ކުރިން ނިޔާވި ކޮއްކޮގެ މަރެވެ. އެ ދެ މަރުގެ މަތިން ވެސް ހަނދާންކޮށް، ދެން އައިންތު ގެނައީ ލޯބިވާ ފިރިމީހާ ސައީދުގެ ވާހަކައެވެ.
ސައީދާއި އައިންތުގެ ތިން ކުއްޖަކު އެބަތިއްބެވެ. އެންމެ ހަގު ކުއްޖާގެ އުމުރަކީ ތިން އަހަރެވެ. އެންމެ ބޮޑު ކުއްޖާ އަށް 16 އަދި ދެވަނަ ކުއްޖާގެ އުމުރަކީ ހަތް އަހަރެވެ.
އޭނާގެ އެ ޕޯސްޓަށް 400 އާ ގާތް ކުރާ އަދަދަކަށް ރިއެކްޓް ލިބިފައިވާއިރު، 147 ޝެއާ ލިބިފައި ވެއެވެ. އަށް 500 އާ ގާތް ކުރާ އަދަދަކަށް ކޮމެންޓް ލިބިފައި ވެއެވެ. އާމިނަތު ހިއްސާ ކުރި އިތުރު ޕޯސްޓެއްގައި ވަނީ ފިރިމީހާ ހެޔޮ ހާލުގައި ސަލާމަތުން އޭނާއަށް ފެނުމުގެ ނަސީބު މިންވަރު ކޮށްދެއްވުމަށް އެދި ދުއާ ކޮށްފައެެވެ.
ސައީދު ހޯދުމުގެ މަސައްކަތް ކޯސްޓްގާޑުން ހުއްޓުމެއްނެތި ދަނި ކުރަމުންނެވެ. އެގޮތުން، ސަޢީދު ހޯދުމަށް ކޯސްޓްގާޑުގެ ޑައިވަރުން ކަނޑު އަޑިން ހޯދަމުންދާއިރު، ކޯސްޓްގާޑް ހާބަރ ޕެޓްރޯލް އުޅަނދުން އަންނަނީ ކަނޑުގެ ސަރަޙައްދު ބަލަމުންނެވެ. އަދި އޮޕަރޭޝަން އިތުރަށްފުޅާކޮށް، އެމްއެންޑީއެފް ޑޯނިއާއާއި ހެލިކޮޕްޓަރު ވެސް ދަނީ އެ ސަރަޙައްދުގައި ހަރަކާތްތެރިވަމުންނެވެ.
ކޯސްޓްގާޑް ޑައިވަރުން އެ ސަރަހައްދު ޑައިވް ކުރުމުގެ ތެރޭގައި 59 މީޓަރު އަޑިން ސަޢީދު މަސްހިފުމަށް ބޭނުންކުރިކަމަށް ލަފާކުރެވޭ އާލާތެއް ކޯސްޓްގާޑް ޑައިވަރުންނަށް ވަނީ ފެނިފައެވެ. ސްލޯޕެއްގޮތަށް އުފެދިފައިވާ މި ސަރަހައްދުގެ ފުންމިނުގައި މި އާލާތްފެނުނު ޕޮއިންޓުން ފެށިގެން 70 އާއި 100 މީޓަރާ ދެމެދުގެ ފުންމިން ހުންނާނެކަމަށް ލަފާކުރެވެއެވެ.
ގެއްލިގެން ހޯދަމުންދާ މުޙައްމަދު ސަޢީދު ޑައިވިނަށް ފޭބީ 2022 މެއި 2 ވަނަ ދުވަހުގެ 14:30 ހާއިރުކަމަށާއި، ފީނަން ފޭބިއިރު އޭނާ ލައިގެން ހުރީ ކަޅުކުލައިގެ ޑައިވިންގ ސޫޓަކާއި ކަޅުކުލައިގެ ފިންސަކާއި އަދި ކަޅުކުލައިގެ މާސްކެއްކަމަށާއި އަދި އޭނާގެ އަތުގައި ރީނދުލާއި އޮރެންޖު ކުލައިގެ ބެލޫނެއް އޮންނާނެކަމަށް ކޯސްޓްގާޑަށް މަޢުލޫމާތު ލިބިފައިވެއެވެ.
ފުވައްމުލަކު "ޓައިގާ ޝާކް" ޑައިވިންގ ޕޮއިންޓަށް ޑައިވިނަށް ފޭބި މުޙައްމަދު ސަޢީދު ގެއްލުނުކަމުގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިއު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ 2022 މެއި 2 ވަނަ ދުވަހު 15:36 ހާއިރުއެވެ.
