ރޯދަމަހަކީ އަބަދުވެސް ދިވެހީންނަށް ތަފާތު މައްސަރެކެވެ. އެއީ ދީނީ އަޅުކަންތަކަށް ދިވެހީން ޚާއްސަވާ މުހިންމު މައްސަރަކަށް ވީނަމަވެސް، މިމާތް މައްސަރަށް ދިވެހީން އަބަދުވެސް އެތައް ގޮތަކުން ތައްޔާރު ވެއެވެ. އެއީ ދިރިއުޅުމުގެ ވައްޓަފާޅިއަށް އަންނަ ބަދަލުތަކާއި، ކެއިންބުއިމާއި އަދި އެނޫނަސް އެތައް ކަމަކަށް އަންނަ ބަދަލުތަކާއި ގުޅިގެންވެސްމެއެވެ.

ހަމައެއާއެކު، ރޯދަމަސް އަބަދުވެސް ފެނިގެން ދަނީ، މާލީ ގޮތުންވެސް އާންމު ރައްޔިތުން އެހެން މަސްމަހުގައި އުފުލާންނުޖެހޭ އެތައް ބުރަތައް އުފުލާންޖެހި، ޚަރަދުތައް ބޮޑު މައްސަރެއްގެ ގޮތުގައިވެސް މެއެވެ. އޭގެ އެންމެ ބޮޑު އެއް ސަބަބަކީ ރޯދަމަހުގައި، ކާބޯ ތަކެތީގެ ގޮތުގައި ބޭނުންކުރެވޭ ގިނަ ބާވްތަތަކުގެ އަގުތައް އުފުލިގެން ދިއުމާއެކު، ބައެއް ހާލަތްތަކުގައި އާންމުކޮށް ލިބެން ހުންނަ ބާވަތްތަކުގެ އަދަދު އިންތިހާއަށް މަދުވެ، އާދަޔާއި ޚިލާފަށް ޖީބަށް ބާރު ބޮޑުވެގެން ދިއުމެވެ.

އެހެންނަމަވެސް، ފާއިތުވެދިޔަ ރޯދަމަސްތަކާއި ޚިލާފަށް މި ރޯދަމަސް ވެގެން ދިޔައީ، ދުނިޔެ ބޮޑު ދެ ކާރިސާއަކާއި ކުރިލަމުން ދަނިކޮށް ދުނިޔޭގެ އެކި ކަންކޮޅުތަކުގައި މުސްލިމުންނާއި ކުރިމަތިލީ މައްސަރަކަށެވެ. މިގޮތުން ކޯވިޑް ކާރިސާގެ ސަބަބުން އާންމު ރައްޔިތުންގެ ވަޒީފާތައް ގެެއްލި، އާމްދަނީ ލިބޭނެ ވަސީލަތްތައް ނެތިގޮސް، ގައުމުތައް އިގްތިސާދީ ގޮތުން އިނދަޖެހިގެން ގޮސްފައިވަނިކޮށް، މިއަހަރުގެ ރޯދަމަސް އާންމު ރައްޔިތުންނާއި ބައްދަލު ކުރިއިރު، 2020ވަނަ އަހަރު ދުނިޔެ ކުރިމަތިލީ ކޯވިޑް ކާރިސާއަށް ނިމުން އައިސްފައެއް ނުވެއެވެ.

ހަމަ އެއާއިއެކު، ކޯވިޑް ކާރިސާއިން ދުނިޔެއަށް އަރައި ނުގަނެވި ވަނިކޮށް، މިއަދު ދުނިޔެ މިވަނީ މުޅިން އާހަނގުރާމައެއްގެ ކަޅުބޯ ވިލާގަޑެއްގެ ދަށުވެފައެވެ. ރަޝިއާއިން ޔޫކުރެއިންއަށް ދޭންފެށި އުދުވާނީ ހަމަލާތައް ދިގުލައިގެން ގޮސް، މި ހަނގުރާމައިގެ އަސަރުތައް މިއަދު މިވަނީ، ހަނގުރާމަ ހިނގަމުންދާ ސަރަހައްދުތައް ފަހަނައަޅާގޮސް، ދުނިޔޭގެ އެކި ކަންކޮޅުތަކާއި ހަމައަށްވެސް ފޯރން ފަށާފައެވެ.

ކުރިޔަށް އޮތް ދުވަސްތައް އިގްތިސާދީގޮތުން ދަތިވާނެ!

2019ވަނަ އަހަރު ނިމެމުން ދަނިކޮށް، މުޅި ދުނިޔެ ކުރިމަތި ލާންޖެހުން ކޯވިޑް ކާރިސާގެ ނަތީޖާއެއްގެ ގޮތުން، ކުޑައެއް ބޮޑެއް ތަފާތު ވުމެއްނެތި، ދުނިޔޭގެ ހުރިހާ ގައުމުތަކެއްގެ އިގްތިސާދުތައް ކަހަލަ ގޮތަކަށް އިނދަޖެހިގެން ދިޔައެވެ. ދުނިޔޭގެ އެތައް މިލިއަން މީހުންގެ ވަޒީފާތައް ގެއްލި، އެތައްބަޔަކު ފަގީރުވެގެން ދިޔައެވެ.

އިންޓަރނޭޝަނަލް މަނިޓަރީ ފަންޑުން އާންމު ކޮށްފައިވާ ހިސާބުތަކަށް ބަލާއިރު، އެމެރިކާގައި، ވަޒީފާ ނެތް މީހުންގެ ނިސްބަތް 2019ވަނަ އަހަރު 3.7 އިންސައްތާގައި ހުރިއިރު، މި މިންގަޑު 2020ވަނަ އަހަހަރު އެގައުމުގައި 9.7 އިންސައްތައަށް އުފުލިގެން ދިޔައެވެ. އަދި ދުނިޔޭގައި އެންމެ ވަރުގަދަ އިގްތިސާދެއް އޮތް އެއް ގައުމުކަމުގައިވާ ޖަޕާނުގައި 2019ވަނަ އަހަރު ނިމިގެން ދިޔައިރު، ވަޒީފާ ނެތް މީހުންގެ ނިސްބަތް 2.4 އިންސައްތާގައި ހުރިއިރު، 2020 ވަނަ އަހަރު މިނިސްބަތްވަނީ 3.3 އިންސައްތައަށް މަތިވެގެން ގޮސްފައެވެ.

2020ވަނަ އަހަރު ނިމިގެން ދިޔައިރު، ޗައިނާ ފިޔަވާ ދުނިޔޭގެ އެހެން ހުރިހާ އިގްތިސާދެއްވެސް ވަނީ ރިސެޝަންއަށް ގޮސްފައެވެ. އެހެންނަމަވެސް، ކޯވިޑް19އާއި ދެކޮޅަށް ވެކްސިންތައް އީޖާދުކޮށް، 2021ވަނަ އަހަރު ނިމިގެން ދިޔައިރު، ދުނިޔެ މިވަނީ ކޯވިޑް ކާރިސާއިން އަރައިގަތުމާއި ދިމާލަށް މިސްރާބު ހިފާފައެވެ.

މިގޮތުން، ކޯވިޑް ކާރިސާއިން ދުނިޔެއަށް އަރައިގަނެވެން ފެށުނު ނަމަވެސް، 2021ވަނަ އަަހަރު ނިމި، 2022 ވަމަ އަހަރު ފެށިގެން މިދިޔައީ، ފަހުގެ ޒަމާނެއްގައި ދުނިޔެ ދެކެފައި ނުވާފަދަ ބޮޑު ހަނގުރާމައެއްގެ ނުރައްކާ މުޅި ދުނިޔެއަށް ކުރިމަތި ކުރުވާ، އަދި ހަނގުރާމާއިގެ ބިރުވެރިކަން އަމަލީގޮތުން ކުރިމަތި ކުރުވަމުންނެވެ.

ރަޝިއާއި ޔޫކުރެއިންއަކީ، ދުނިޔޭގެ ކެއިން ބުއިމަށް ބޭނުންވާ ކާބޯތަކެތީގެ ވަރަށް މުހިންމު ބާވަތްތައް ހައްދާ ދެގައުމެވެ. މިގޮތުން، ދުނިޔޭގެ މާރކެޓަށް ސަޕްލައި ކުރަމުންދާ ވީޓް އާއި ބާރްލީގެ (ކުދިބަތާއި ގޮދަނނައިގެ ބާވަތްތައް) %30 ހިއްސާ ކުރަމުންދަނީ ރަޝިއާއާއި ޔޫކުރެއިންއިންނެވެ. އަދި މީގެ އިތުރުން، ދުނިޔެއަށް ސަޕްލައި ކުރާ ޒުވާރީގެ ފަސްބައިކޮށްފަ އެއްބައި ރަޝިއާއި ޔޫކުރެއިން ސަޕްލައި ކުރާއިރު، ދުނިޔޭގެ މާރކެޓްތަކަށް ސަޕްލައި ކުރަމުންދާ ސަން ފްލާވާރ އޮއިލްގެ %50 ސަޕްލައި ކުރަމުންދަނީވެސް މިދެގައުމުންނެވެ. އަދި ހަމަ އެއާއެކު، ރަޝިއާއި، އެގައުމުގެ އަވައްޓެރި ބެލަރޫސްއަކީ މުޅި ދުނިޔެއަށް ސަޕްލައިކުރަމުންދާ ފާރޓިލައިޒަރ (ގަސްކާނާ)ގެ ފަސްބައިކޮށްފަ އެއްބައިސަޕްލައި ކުރަމުންދާ ދެގައުމެވެ.

އެހެންކަމުން، މިހާރު ހިގަމުންދާ ޔޫކުރެއިން ހަނގުރާމައަކީ، ސީދާ ގޮތެއްގައި، ރަޝިއާ ޔޫކުރެއިން އަދި ބެލަރޫސްވެސް މިހަގުރާމާގައި ބައިވެރިވަމުންދާ ހަގުރާމައަކަށް ވުމާއެކު، މި ގައުމުތަކުން ދުނިޔޭގެ މާރކެޓަށް ސަޕްލައި ކުރަމުންދާ، ކާބޯތަކެއްޗާއި ގުޅުންހުރި ބާވަތްތަކުގެ ސަޕްލައިއަށް މިހާރުވެސް ވަނީ ނޭދެވޭ އަސަރު ކުރަން ފަށާފައިކަމަށް ޔޫއެންއިން މިހާރުވެސް ވަނީ ބުނެފައެވެ. އަދި ދުނިޔޭގެ އެވެރްޖެ ކާބޯތަކެތީގެ އަގުތަށް ފާއިތުވެދިޔަ އަހަރާ އަޅާބަލާއިރު، މިހާރުވެ 34 އިންސައްތަ މަތިފައި ވާކަމަށް، ޔުނައިޓެޑް ނޭޝަންސް ފުޑް އެންޑް އެގްރިކަލްޗަރ އޯގަނިޒޭޝަން (FAO)އިން، ވަނީ ބުނެފައެވެ.

އަދި އޭގެ މީގެ އިތުރުން، ރަޝިއާއަކީ، ދުނިޔޭގައި އެންމެ ގިނައިން ގުދުރަތީ ގޭސް އެކްސްޕޯޓުކުރާ ގައުމެވެ. އަދި އެގައުމަކީ ދުނިޔޭގެ ދެވަނައަށް އެންމެ ގިނައިން ސާފު ނުކުރާ ތެޔޮ (ކުރޫޑް އޮއިލް) އެކްސްޕޯޓު ކުރާ ގައުމުވެސްމެއެވެ.

ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށުމާއެކު، އެމެރިކާއާއި ޔޫރަޕްގެ ގައުމުތަކުގެ އިތުރުންވެސް ކެނެޑާ ޖަޕާންފަދަ ދުނިޔޭގެ ބޮޑެތި އިގްތިސާދުތަކުން ރަޝިއާއި ދެކޮޅަށް އަޅަންފެށި އިގްތިސާދީގޮތުން ދަތިކުރުމުގެ ވަރުގަދަ ފިޔަވަޅުތަކުގެ އަސަރުތައް ދުނިޔޭގެ ތެލުގެ އިންޑްސްޓްރީންވެސް ދަނީ ވަރަށްވެސް ނުރަގަޅުކޮށް ފެންނަމުންނެވެ. މިގޮތުން، ދުނިޔޭގެ ބާޒާރުގައި ކުރޫޑް އޮއިލް (ސާފު ނުކުރާ ތެޔޮ)ގެ އަގު މިހާރުވަނީ %60 އުފުލިގެން ގޮސްފައެވެ.

އެހެންކަމުން، ހުރިހާ ގޮތަކުން ބެލި ކަމުގައިވި ނަމަވެސް، މުޅި ދުނިޔެ މިވަނީ ފުން އިގްތިސާދީ ވަޅުގަޑެއްގެ ތެރޭގައެވެ. ފާއިތިވެދިޔަ 3 އަހަރުގެ އިގްތިސާދީ ގޮންޖެހުންތަކުން އަރައިގަނެވޭ މަގެއް އަދި ފެންނާކަށް ނެތެވެ. ކުރިޔަށްހުރި އަހަރުތަކުގައި މި ބޮޑެތި ގޮންޖެހުންތަކުން އަރައިގަނެވޭނޭ މަގުތަކެއް އަދި މިހާތަނަށް ފެންނާކަށް ނުވެސް ނެތްމެއެވެ.

ރޯދަމަސް ނިމުމަސް ފަހު އާންމު ދިރިއުޅުމަކަށް! އެހެންނަމަވެސް އިގްތިސާދު ކުރުން މުހިންމު!

މިރޭ ރާއްޖޭގައި އީދަށް ހަނދު ބަލާއިރު، މާދަމާއަކީ ފިތުރު އީދު ދުވަސްކަމުގައި ވެގެން ދިއުމަކީ އެކަށީގެންވާ ކަމެކެވެ. އަދި އެއަށްފަހު، ރޯދަމަސް ނިންމާ އާންމު ދިރިއުޅުމަކަށް އާންމު ރައްޔިތުން ރުޖޫޢަވާއިރު، ގަބޫލުކުރަން ޖެހިފައިވާ އެއް ހަގީގަތަކީ، ދުނިޔެއަށް ކުރިމަތިވެފައިވާ އިގްތިސާދީ ދެކާރިއާސާއަކުން ގައުމުތަކަށް އަރައިގަނެވިފައި ނުވާކަމެވެ. އަދި އާންމު އިގްތިސާދީ ހާލަތު އަސްލަށް ރުޖުޢަ ވެގެން ގޮސްފައިވެސް ނުވާކަމެވެ.

ދުނިޔޭގެ ބާޒާރުގައި ތެލުގެ އަގުތައް ދަނީ އުފުލެމުންނެވެ. އޭގެ ނަތީޖާއެއްގެ ގޮތުން، އާންމު ދަތުރު ފަތުރުގެ އަގުތަށްވެސް ދަނީ އުފުލެމުންނެވެ. އަދި ދުނިޔޭގެ ތެލުގެ ބާޒާރަށް އަންނަމުންދާ މި ނުރަގަޅު ބަދަލުގެ އަސަރު، އެސްޓީއޯއިން ވިއްކަމުންދާ ތެލުގެ އަގުން މިހާރުވެސްވަނީ ފެންނަން ފަށާފައިކަން މިފުރުސަތު ފާހަގަ ކޮށްލާން ޖެހެއެވެ. ފާއިތިވެދިޔަ 2 މަހެއްހާ ދުވަހުގެ ތެރޭގައި 3 ފަހަރެއްގެ މަތިން އެސްޓީއޯއިން ވިއްކަމުންދާ ތެލުގެ އުފުލިގެން ގޮސްފައިވާވުން މީގެ ހެއްކަކަށް ފުދެއެވެ.

ހަމަ އެއާއެކު، ދުނިޔޭގެ ކާބޯތެތީގެ އަގަށް އަންނަމުންދާ ނުރަގަޅު ބަދަލުތަކުގެ އަސަރު ރާއްޖޭގެ އައްސޭރިފަށާއި ހަމައަށްވެސް ނުކޮށް ނުދާނޭ ކަމުގައިވެސް ގަބޫލު ކުރަންޖެހެއެވެ. ނަތީޖާއަކަށް ވެގެންދާނީ، އާންމު ރައްޔިތުންގެ ޖީބުތައް ފަގީރުވެގެން ދިއުމެވެ. ފައިސާގެ އަގުވެއްޓި، އާންމު ރައްޔިތުމީހާ ނިކަމެތި ވެގެން ދިއުމެވެ،

އެހެންކަމުން، ހުރިހާ ގޮތަކުން ބެލިކަމުގައިވި ނަމަވެސް، ނިމިގެން މިދަނީ ދަތި ރޯދަމަހަކަށް ވެގެން ދާއިރު، ކުރިޔަށް އޮތި އަދި މާ ދަތި ދުވަސްތަކެއްކަމުގައި ދަންނަވާން ޖެހެއެވެ. ފަރުދީ ހައިސިއްޔަތުން އިގްތިސާދު ނުކޮށްފިނަމަ، ކުރިމަތިވެފައިވާ މިދަތިކަން އޭގެ އިންތިހާއަށް ބޮޑުވެގެން ދާނެކަމީ ކަށަވަރުވެ ޔަގީންވާކަމެކެވެ.