މި އަހަރުގެ ބަރަކާތްތެރި ފިޠުރު ޢީދުގެ ޗުއްޓީއަކީ ގިނަ އަދަދެއްގެ ބަޔަކު ކަނޑުމަގުން އެއްރަށުން އަނެއް ރަށަށް ޢާއިލާއާއި ރަހްމަތްތެރިން ކައިރިއަށް ދަތުރު ކުރަމުންދާ ދުވަސްވަރެއް ކަމުން، ކަނޑުމަގުން ދަތުރުކުރައްވާ ހުރިހާ ފަރާތްތަކުން ވެސް މޫސުމާ ބެހޭ އެންމެ ފަހުގެ މަޢުލޫމާތު ހޯއްދަވައިގެން ދަތުރުތައް ރޭއްވެވުމަށް އިލްތިމާސް ކޮށްފިއެވެ.
އެމްއެންޑީއެފް ކޯސްޓު ގާޑުން ނެރުނު ބަޔާނެއްގައި ބުނެފައިވަނީ އޮޑިވެރިންނާއި، ކެޕްޓަނުން އަދި ފަޅުވެރިންނާއި ދަތުރުތަކުގައި ބައިވެރިވާ ޢާއިލާތަކާއި ރަހްމަތްތެރިން ވެސް މި ދަތުރު ކުރެވެނީ ސަލާމަތާއި ރައްކާތެރި އުޅަނދެއްގައިކަން ޔަޤީންކުރައްވައިގެން ކަނޑުމައްޗަށް އެރުއްވުމަށް އިރުޝާދު ދޭކަމަށެވެ.
ދަތުރު ކުރައްވާއިރު އެއްވެސް ކަމެއް ދިމާވެއްޖެނަމަ، ލަސްނުކުރައްވައި އެމްއެންޑީއެފް ކޯސްޓްގާޑު ހިލޭ ގުޅޭ ނަންބަރު 191 އަށް ގުޅުއްވައި، އަދި ދަތުރަށް ފެށުމުގެ ކުރިން މޫސުމަށް ބައްލަވައި ރައްކާތެރި މަގެއް ޚިޔާރުކުރައްވައި ދަތުރުކުރެއްވުމަށް ވެސް ވަނީ ދަންނަވާފައެވެ.
މޫދު ކުޅިވަރު ކުޅޭ ފަރާތްތަކުން ވެސް ސަލާމަތީ ކަންކަމަށާއި މޫސުމަށް ބައްލަވައިގެން މިފަދަ ކަންކަން ރޭއްވެވުމަށް ވެސް ވަނީ ދަންނަވާފައެވެ. ފާއިތުވެ ދިޔަ އަހަރުތަކެކޭ ވެސް އެއްފަދައިން މި އަހަރު ވެސް ކޯސްޓްގާޑުން ކަނޑުމަތީ އުޅަނދުފަހަރުގެ ސަލާމަތީ ކަންކަން ބަލަމުން ގެންދާނެ ކަމަށް ކޯސްޓް ގާޑުން ވަނީ ބުނެފަައެވެ.
