އެމްޑީޕީއަށް މިހާރު އޮތް އެންމެ ރަނގަޅު ގޮތަކީ ވެރިކަމުގެ ކޯލިޝަނުން ވަކިވެ، ފެތެމުންދާ ސަރުކާރާއި ފެޔަށް ޖެހުން ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބުގައި ދެކެވޭ ވާހަތަކާއި، ގުޅިގެންކަމަށް ބެލެވެއެވެ. އެމްޑީޕީގެ ވަޓްސްއަޕް ގްރޫޕަކަށް ނަޝީދު ފޮނުއްވި މެސެޖުގައި ވިދާޅުވީ، މިހާރު އޮތް ވެރިކަމަކީ އެމްޑީޕީގެ އެކަނި ވެރިކަމެއް ނޫންކަމަށެވެ. މިސަރުކަރަށް އެމްޑީޕީގެ އާންމު މެމްބަރުން ބޭނުންވި ކަންކަން ހާސިލް ނުކޮށް ދެވުނުއިރު، ފެތެމުންދާ ސަރުކާރެއްގައި ތިބުމުގެ މާނައެއް ނެތްކަމަށް ރައީސް ނަޝީދު ވިދާޅުވިއެވެ.

މިވަގުތު މި ޕާޓީއަށް ރަނގަޅު ގޮތަކީ ފެތެމުންދާ ސަރުކާރާއެކީ މި ޕާޓީ ނުފެތުން، ސަރުކާރަކީ އެމްޑީޕީ އެކަނި ސަރުކާރު ނޫން ކަމުން، އެމްޑީޕީ މެންބަރުން އެދޭ ގޮތް އަދި މިޕާޓީގެ ވައުދުތައް ނުފުއްދޭނީ.

– އެމްޑީޕީގެ ވަޓްސްއެޕް ގްރޫޕަށް ނަޝީދު ފޮނުއްވި މެސެޖްގައި ވިދާޅުވިއެ.

ވާދަވެރިކަން ބޮޑުވެފައިވާ އެމްޑީޕީގެ ޗެއާޕާސަން އިންތިޚާބާއި ގުޅިގެން ރައީސް ނަޝީދާއި، ރައީސް ޞާލިހަށް ތާއީދު ކުރާ މެމްބަރުންގެ މެދުގައި ދަނީ ބަހުގެ ހޫނު ހަމަލާތައް ބަދަލު ކުރެވެމުންނެވެ. މިއިންތިޚާބަކީ މިނިސްޓަރ ފައްޔާޟާއި، މެމްބަރު އިންތިޔާޒުގެ މެދުގައި އޮތް އިންތިޚާބަކަށް ވީނަމަވެސް މިއީ އެމްޑީޕީގެ ރިޔާސީ ޓިކެޓާއިމެދު ރައީސް ނަޝީދާއި، ރައީސް ޞާލިހު ކުރައްވާ ހަނގުރާމައިގެ ފެށުންކަމަސް ގިނަ ބަޔަކު ދެކެއެވެ.

މިއިންތިޚާބުގެ މަންޒަރުތައް މިހާރު ފެންނަ ގޮތުން އިންތިޚާބު ކާމިޔާބު ކުރާނެކަމަށް ބެލެވެނީ މިނިސްޓަރ ފައްޔާޟު އިސްމާއިލެވެ. އިންތިޚާބުގެ ވާދަވެރިކަން ބޮޑުވާ ވަރަކަށް އެމްޑީޕީގެ ރައީސް ނަޝީދު ގެންދަވަނީ ސަރުކާރަށް އެކި ތުހުމަތުކުރަމުންނެވެ. އެމްޑީޕީގެ ގައުމީ މަޖިލީހުގެ މެންބަރުންނަށް ހާއްސަ ވަޓްސްއެޕް ގުރޫޕަށް ފޮނުވި މެސެޖެއްގައި ރައީސް ނަޝީދު ވިދާޅުވީ އެމަނިކުފާނުގެ ނަޒަރުގައި އެމްޑީޕީއަށް ރައްޔިތުންގެ ވޯޓްގެ 50 ޕަސެންޓް ހޯދުން ވަރަށް އުނދަގޫ ވާނެ ކަމަށެވެ. އެ މިންވަރަށް ތާއީދު ހޯދޭވަރަށް ވުރެ މާ ގިނަ ގޯސްތައް ހަދާފައިވާ ކަމަށް ވިދާޅުވިއެވެ. އަދި އެ ގޯސްތައް އެއް ބަޔަކު ގަބޫލު ނުކުރާ ކަމަށްވެސް ވިދާޅުވިއެވެ.

ނަޝީދު ވިދާޅުވީ ރައްޔިތުންގެ ވަރަށް ބޮޑު ތާއީދެއް އޮތް ކަމަށް މި ސަރުކާރަށް ހީވާ ކަމަށެވެ. ނަމަވެސް ރައްޔިތުން ތިބީ ވަރަށް ބޮޑަށް މާޔޫސްވެފައި ކަމަށާއި، މިސަރުކާރަށް ދެން ވެރިކަމަށް އާދެެވޭ ވަރަށް ވޯޓު ލިބުމަކީ ދުރުކަމެއްކަމަށް ނަޝީދު ވިދާޅުވިއެވެ. ނަޝީދު ވަނީ ކުރެއްވި މެސެޖުގެ ތަފްސީލްވެސް ދެއްވާފައެވެ. އެގޮތުން މިއަހަރަކީ ދައުލަތުގައި އޮތް ބޮޑު ދަރަނި ދައްކަންޖެހޭ އަހަރަށް ވާއިރު މިކަމާއި އެއްވެސް ވަރެއްގެ ސަމާލުކަމެއް ސަރުކާރުން ދޭތަނެއް ނުފެންނަ ކަމަށެވެ. ފެނިގެންދަނީ އަމިއްލަ މަސައްކަތްތައް ހިތުހުރި ގޮތަކަށް ކުރަމުންދާތަން ކަމަށެވެ.

ސިޔާސީ ގޮތުން ބާރުވެރިކަން ހޯދުމަށް ރައީސް ނަޝީދު ކުރައްވާ މަސައްކަތުގައި އެމަނިކުފާނަށް އެމްޑީޕީ އަތުން ގެއްލިގެންދާ ކަމުގެ އިހުސާސް މިހާރުވުމާއިއެކު ގެންދަނީ ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. އަދި މީގެ ކުރިން ވަނަީ ރައީސް ޞާލިހަށް އެއްބާރުލުން ނުދެއްވާނެކަމަށްވެސް ވިދާޅުވެފައެވެ.