ހުސްވެފައިވާ ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރުކަމަށް މޯލްޑިވްސް ނޭޝަނަލް ޕާޓީގެ ފަރާތުން ވާދަކުރާ އާމިނަތު ޝީޒާގެ ވިލިމާލެ ކެމްޕޭން ޖަގަހަ މިރޭ ހުޅުވާގޮތަށް ހަމަ ޖައްސައިފިއެވެ.
ހުޅުމާލޭ ޝެއިޚް އަބުދުއްރަހުމާން މަގުގައި ހަދާފައިވާ، ޝީޒާގެ ވިލިމާލެ ކެމްޕޭން ޖަގަހަ ހުޅުވުމަށް ހަމަޖެހިފައިވަނީ މިރޭ 9:45ގައެވެ. އެމްއެންޕީން މައުލުމާތު ދީފައިވާ ގޮތުގައި މިރޭގެ ޖަގަހަ ހުޅުވުމުގެ ރަސްމިއްޔާތުގައި ޕާޓީގެ ރައީސް ކާނަލް ނާޒިމްގެ އިތުރުން، ޕާޓީގެ ލީޑަރޝިޕްގެ ބޭފުޅުންނާއި، އާންމު މެމްބަރުންވެސް ބައިވެރިވާނެއެވެ.
ހުސްވެފައިވާ ވިލިމާލެ ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރުކަމަށް ވާދަކުރަނީ އެމްއެންޕީންނާއި ޕީޕީއެމްއިން އެކަންޏެވެ. ޕީޕީއެމްގެ ފަރާތުން މިއިންތިޚާބުގައި ވާދަކުރަނީ ފާތިމަތު ނާޒިމާއެވެ. މިއިންތިޚާބުގައި ވެރިކަންކުރާ މައި ޕާޓީ އެމްޑީޕީން ކެނޑިޑޭޓް ނެރުމަށް ހުޅުވާލިނަމަވެސް، މުއްދަތު ހަމަވިއިރު ކެނޑިޑޭޓަކު ކުރިމަތިލާފައި ނުވެއެވެ.
އިލެކްޝަންސް ކޮމިޝަނުންވަނީ، މި އިންތިޚާބުގައި ވާދަކުރާ ދެ ކެނޑިޑޭޓުންގެ މެދުގައި ގުރުއަތުލުން މިމަހުގެ 16ވަނަ ދުވަހު ބާއްވާފައެވެ.
ނަން ތަރުތީބު ކުރެވިފައިވާ ގޮތް:
1. ފާތިމަތު ނާޒިމާ / ޕީޕީއެމް، ކެނޑިޑޭޓް ނަންބަރު 1
2. އާމިނަތު ޝީޒާ / އެމްއެންޕީ، ކެނޑިޑޭޓް ނަންބަރު 2
މި އިންތިޚާބުގައި ވޯޓުލާ ދުވަހަކީ އަންނަ މަހުގެ 16ވަނަ ދުވަސްކަމުގައި ކުރިން ހަމަޖައްސާފައިވި ނަމަވެސް، އިލެކްޝަންސް ކޮމިޝަނުން މިހާރުވަނީ، މި ތާރީޚު ބަދަލުކޮށް، ބައި-އިލެކްޝަންގެ ވޯޓުނެގުމަށް ހަމަޖެހިފައިވާ ތާރީޚާއި ގަޑި 2022 މޭ 14 ވާ ހޮނިހިރު ދުވަހުގެ ހެނދުނު 8:00 އިން ހަވީރު 4:00 ކަމުގައި ހަމަޖައްސާފައެވެ.
އިލެކްޝަންސް ކޮމިޝަނުން ބުނެފައިވަނީ ތާރީޚު އަވަސްކުރަން ނިންމީ، ވޯޓުލާ މަރުކަޒުތައް ގާއިމްކުރުމަށް ބޭނުންވާ ތަން ލިބުމުގައި ދަތިތަކެއް ދިމާވެފައިވާތީއާއި، ބައި-އިލެކްޝަން ބާއްވާ ދުވަހަކީ ރަސްމީ ދުވަހަކަށް ވުމުން ގިނަ އަދަދެއްގެ ރައްޔިތުންނަށް ވޯޓުލާން ދިޔުމަށް ދަތިތަކެއް ދިމާވެދާނެތީ ކަމުގައެވެ.
އެމްއެންޕީއަކީ ރާއްޖޭގައި އެންމެފަހުން ރަޖިސްޓްރީ ކުރެވުނު ސިޔާސީ ޕާޓީކަމުގައިވިނަމަވެސް އެޕާޓީންދަނީ ގިނަ އިންތިޚާބުތަކެއްގައި ވާދަކޮށް، ރަގަޅު ނަތީޖާތަކެއް ނެރެމުން ކަމުގައި ފާހަގަ ކޮށްލެވެއެވެ. އަދި އެމްއެންޕީއަކީ، ރާއްޖޭގައި ރަޖިސްޓްރީ ކުރެވުނު ޕާޓީތަކުގެ ތެރެއިން، އެންމެ ކުރު މުއްދަތެއްގައި 10،000 މެމްބަރުން ހަމަކޮށްފައިވާ ޕާޓީވެސްމެއެވެ.
