ރަޝިއާއިން ޔޫކުރެއިންއަށް ދެމުންދާ އުދުވާނީ ހަމަލާތަކަށް ނިމުން އަންނާނޭކަމުގެ އެއްވެސް ނިޝާނެއް ފެނިގެން ގޮސްފައި ނުވާއިރު، އެމެރިކާއިން ޔޫކުރެއިންއަށް އިތުރު 800 މިލިއަން ޑޮލަރުގެ ހަތިޔާރު ފޯރުކޮށްދޭން ނިންމާފައިވާކަން އެމެރިކާގެ ރައީސް ޖޯ ބައިޑްން ބުރާސްފަތިދުވަހު އިއުލާން ކުރައްވައިފިއެވެ.
އެމެރިކާއިން ޔޫކުރެއިންއަށް ހަތިޔާރުގެ އެހީ، ކިހާ ދިގު މުއްދަތަކަށް ފޯރުކޮށްދެމުން ދާނެތޯ ކުރެވުނު ސުވާލުގެ ޖަވާބުގައި ބައިޑްން ވިދާޅުވެފައިވަނީ، ދިގު މުއްދަތަކަށް ޔޫކުރެއިންއަށް ހަތިޔާރު ފޯރުކޮށްދެމުން ދިއުމުގެ ގާބިލްކަން އެގައުމަށް ލިބިފައި ވާކަމުގައެވެ.
އެމެރިކާގެ ދިފާޢީ ވުޒާރާ ޕެންޓަގަންއިން އިއުލާން ކޮށްފައިވާ، ޔޫކުރެއިންއަށް ފޯރުކޮށް ދިނުމަށް ހަމަޖެހިފައިވާ ހަތިޔާރުގެ ބާވަތްތަކަކީ:
- 72 155 މިލިމީޓަރުގެ ހޯވިޒަރސް 144,000 އާރޓިލަރީ ރައުންޑްސް
- 72 ޓެކްޓިކަލް ހަގުރާމަތީ އެއްގަމު އުޅަނދު
- 121 ފޯނިކްސް ގޯސްޓް ޓެކްޓިކަލް އަންމޭންޑް އޭރިއަލް ސިސްޓަމްސް
- ފީލްޑް އެކުއިޕްމަންޓާއި ސްޕެއަރޕާރޓްތައް
ޕެންޓަގަންގެ ތަރުޖަމާން ޖޯން ކިރުބީ ވިދާޅުވި ގޮތުގައި، އެންމެ ފަހުން ފޯރުކޮށްދިން އެހީއާއެކު، ބައިޑްންގެ ވެރިކަމުގައި އެމެރިކާއިން ޔޫކުރެއިންއަށް ފޯރުކޮށްދީފައިވާ އެހީތެރިކަމުގެ އަދަދު 4 ބިލިއަން އެމެރިކާ ޑޮލަރަށް އަރައިގެން ދާނެކަމުގައެވެ. އަދި ވިދާޅުވެފައިވަނީ، ފާއިތުވެދިޔަ ފެބްރުއަރީމަހު ރަޝިއާއިން ޔޫކުރެއިންއަށް އުދުވާނީ ހަމަލާދޭން ފެށިފަހުން، 3.4 ބިލިއަން ޑޮލަރުގެ އެހީ އެމެރިކާއިން އިއުލާން ކޮށްފައިވާ ކަމުގައެވެ.
އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން ވިދާޅުވެފައިވަނީ، އެމެރިކާއިން ފޯރުކޮށް ދެމުންދާ ހަތިޔާރުގެ ބޭނުން، އެގައުމުގެ ބިން ދިފާޢުކުރުމަށްޓަކާ، އެންމެ ރަގަޅު ގޮތުގައި ހިފަމުންދާ ކަމުގައެވެ.
ޔޫކުރެއިންގެ ހަގުރާމަށް 2 މަސްދުވަހާއި ގާތް ކޮށްފައިވާއިރު، މި ހަނގުރާމާގައި ރަޝިއާއަށް މިހާތަނަށް އެގައުމުގެ ބާރުގެދަށަށް ގެންދެވިފައިވަނީ، ޔޫކުރެއިންގެ ޕޯޓު ސިޓީއެއްކަމުގައިވާ މަރިއޮޕޯލް އެކަންޏެވެ.
