ގަލޮޅުގައި ހުރި ގަރާޖެއްގައި އަލިފާންރޯވެ ހިނގި ހާދިސާއާއި ގުޅިގެން ނޭޝަނަލް ޑިޒާސްޓާރ މެނޭޖްމަންޓް ސެންޓާރުން އެހީތެރިކަން ފޮރުކޮށް ދީފިއެވެ.
މި ޙާދިސާ ހިނގާފައިވަނީ ގަލޮޅު ނިއު ކޮލަމްބިއާ ނަމަކަށް ކިޔާ ގެއަކާ އިންވެގެންހުރި ގަރާޖުގައެވެ. ގަރާޖުގައި އަލިފާން ރޯވެގެން އެމް.އެން.ޑީ.އެފްއަށް ރިޕޯޓްކޮށްފައިވަނީ މިއަދު ހަވީރު 16:26 ހާއިރެވެ. އަދި އެމް.އެން.ޑީ.އެފްގެ ފަޔަރ އެންޑް ރެސްކިއު ޓީމުން އެ ސަރަޙައްދަށްގޮސް ކުރި މަސައްކަތުން އަލިފާންގަނޑު ކޮންޓްރޯލްކޮށްފައިވަނީ 16:53 ހާއިރުކަމަށް އެމް.އެން.ޑީ.އެފުން ވިދާޅުވެއެވެ.
ގަރާޖުގައި އަލިފާން ރޯވާން މެދުވެރިވި ސީދާ ސަބަބެއް އަދި ސާފުވެފައެއްނުވެއެވެ.މި ޙާދިސާގައި އެއްވެސް މީހަކަށް ގެއްލުމެއް ލިބިފައެއްނުވެއެވެ. އެހެންނަމަވެސް އަލިފާނުގެ ސަބަބުން ގަރާޖުގައި ހިފައިގެންގުޅޭ ސާމާނަށާއި، އިމާރާތައް ބޮޑެތި ގެއްލުންތަކެއް ވަނީ ލިބިފައެވެ. ހަމައެހެންމެ ގަރާޖް ކުރިމަތީ ޕާކުކޮށްފައި ހުރި ބައެއް ވެހިކަލްތަކަށްވެސް ބޮޑެތި ގެއްލުންތަކެއް ލިބިފައިވެއެވެ.
މި ޙާދިސާއާއި ގުޅިގެން ގެއްލުން ލިބުނު ފަރާތްތަކަށް އެންޑީއޭ ފަރާތުން ވަނީ އެހީތެރިކަން ފޯރުކޮށްދީފައެވެ. އަދި މިކަމާ ގުޅިގެން އިތުރަށް ބަލަން ޖެހޭ ކަންކަން ބަލަމުންދާކަމަށް އެންޑީއޭއިން ވަނީ ބުނެފައެވެ.
