ކޯވިޑް-19ގެ ސަބަބުން ބަންދުކޮށްފައިވާ އޮލިމްޕަސް މި އަަހަރުގެ މެދެތެރޭގައި ހުޅުވަން މަސައްކަތް ކުރަމުން ދާކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
ޔުމްނާ މިހެން މި ވިދާޅުވެފައިވަނީ އޮލިމްޕަސް ނުހުޅުވައިގެން، ރާއްޖޭގެ އެންމެ ބޮޑު އެއް ފިލްމު ޕްރޮޑަކްޝަން ހައުސް، ޑާކްރެއިން އެންޓަޓައިންމެންޓުން ކަންބޮޑުވުން ފާޅުކޮށްފައި ވަނިކޮށެވެ.
ޔުމްނާ ވިދާޅުވީ އޮލިމްޕަސް މަރާމާތު ކުރުމުގެ މަސައްކަތް ކޯވިޑް-19 އަށް ބަންދުކުރުމުން، މިދިއަ އަހަރު ފަށާފައިވާ ކަމަށެވެ. އޭގެތެރޭގައި ފެން ލީކުވުން ހުއްޓުވުމަށްޓަކައި ޓެރަސް މަރާމާތުކޮށް، އޮލިމްޕަހުގެ އެކި ހިސާބުތަކުގައި ޝީޓު ކަނޑައިގެންދިއުމާއި، ރެނދުލުމުގެ ސަބަބުން ލިބިފައިވާ ގެއްލުންތައް މަރާމާތު ކުރަމުން ދާކަން މިނިސްޓަރ ވަނީ ފާހަގަކުރައްވާފައެވެ.
މީގެ އިތުރުން އޮލިމްޕަސް ޒަމާނީ ކުރުމުގެ ގޮތުން އެތާގެ އެތެރޭގައި ފިލްމުތަކުގެ ޓްރެއިލާއާއި ފިލްމު ޝެޑިއުލް އަދި އެހެނިހެން މަޢުލޫމާތާއި އިޝްތިހާރު ދެއްކުމަށް ސްކްރީންތަކެއް ޤާއިމްކުރުމުގެ މަސައްކަތްވެސް ކުރަމުންދާކަމަށް ޔުމްނާ ވިދާޅުވިއެވެ.
މި މަސައްކަތް ތަކުގައި ބޭނުން ކުރާ ސާމާނަކީ ރާއްޖެއިން ބޭރުން ގެންނަ އެއްޗެއްސަށް ވުމުން ވަގުތު ނަގާކަން ވެސް ޔުމްނާ ވަނީ ފާހަގަ ކުރައްވާފައެވެ.
