އިންޑިއާގެ މަޝްހޫރު ކޮމޭޑިއަން ބާރްތީ ސިންގ އަށް އަލަތު ދަރިފުޅު ލިބުނު ކަން އިއުލަން ކުރީ މިމަހުގެ 5 ވަނަދުވަހުއެވެ. އޭނާ އަށް ލިބުނީ ފިރިހެން ކުއްޖެކެވެ.
ބާރްތީ ވިހެއުމުގެ ކުރިން ދިއައީ ރިއަލިޓީ ޓީވީ ޝޯ "ހުނަރުބާޒް"ގެ ހޯސްޓްގެ ގޮތުގައި ހަރަކާތްތެރިވަމުންނެވެ. މި ޝޯގެ ހޯސްޓުންނަކީ ބާރްތީ އާއި އޭނާގެ ފިރިމީހާ ހަރްޝް ލިމްބާޗިޔާއެވެ. ނަމަވެސް ވިހެއުމާއި ގުޅިގެން ބާރްތީގެ ބަދަލުގައި ޝޯގައި ހޯސްޓެއްގެ ގޮތުގައި ހަރްޝްއާއި އެކުގައި ފެނިގެން ދިއައީ ސުރްބީ ޗަންދްނާއެވެ.
ވިހައިގެން 12 ދުވަސް ފަހުން އަނެއްކާވެސް ބާރްތީ ވަނީ އެނބުރި މަސައްކަތަށް ނުކުމެފައެވެ. "ހުނަރްބާޒް" ސެޓުގައި ނޫސްވެރިންނާއި ވާހަކަދައްކަމުން ބާރްތީ ބުނެފައިވަނީ އޭނާ ޝޫޓިންއަށް އެނބުރި އައީ ރޮމުން ކަމަށެވެ.
ޝޯ ފެށީ އޭނާ ކަމަށާއި އެހެން ކަމުން ގްރޭންޑް ފިނާލޭވެސް ހުށައަޅައިދޭން ޖެހޭނީ އޭނާ ކަމަށް ގަބޫލު ކުރެވޭ ކަމަށާއި، މިއީ މާކުރިން އެއްބަސްވެފައިވާ ކަމަކަށް ވާތީ އެކަން ކުރަން މަޖްބޫރުވީ ކަމަށް ބާރްތީ ވަނީ ބުނެފައެވެ. "ހުނަރްބާޒް" ޝޯ މިހާރުވަނީ ނިންމާލާފައެވެ.
ބާރްތީ މިހާ އަވަހަށް މަސައްކަތަށް ނުކުތުމުން ގިނަބައެއްގެ ފާޑުކިއުން އަންނަނީ އޭނާއަށް އަމާޒުވަމުންނެވެ. ނަމަވެސް މިފަދަ ފާޑުކިއުންތަކަށްވެސް ބާރްތީ ވަނީ ޖަވާބު ދީފައެވެ. އޭނާ ބުނެފައިވަނީ ވަރަށް ގިނަ މަސައްކަތްކުރާ މަންމައިން އެމީހުންގެ ދަރީން ހަފްތާއެއް ނުވަނީސް ދޫކޮށްލާފައި މަސައްކަތަށް ނުކުމެފައި އެބަހުރި ކަމަށެވެ. އަދި އޭނާގެ ވެސް ނުނިމި ހުރި އެތަށް މަސައްކަތެއް ހުރި އިރު އޭނާއަކީ ވަކި މަތިން ފޭބި ޕަރީއެއް ނޫންކަމަށާއި ދިރި އުޅެވޭނީ މަސައްކަތް ކޮށްގެން ކަމަށް ބާރްތީ ވަނީ ބުނެފައެވެ.
