ކުރިއަށް އޮތް އެމްޑީޕީގެ ޗެއާޕާސަން އިންތިހާބުގައި ވާދަކުރައްވާ ވަޒީރަށް ވޯޓު ނުދެއްވައިފި ނަމަ ރަށްރަށުގެ ތަރައްގީގެ މަޝްރޫއުތައް ހުއްޓޭނެ ކަމަށް ބުނެ މަލާމާތް ކުރަން ޖާގަ ނުދެއްވުމަށް ރައްޔިތުންގެ މަޖިލީހުގެ ނައިބު ރައީސް, ގަލޮޅު އުތުރު ދާއިރާގެ މެމްބަރު އީވާ އަބްދުالله އެދިވަޑައިގެންފި އެވެ.
ޗެއާޕާސަންގެ އިންތިހާބުގައި ވާދަކުރައްވާ އިމްތިޔާޒު ފަހުމީގެ ކެމްޕެއިން ޖަގަހަ ހުޅުވުމަށް ލ. ފޮނަދޫގައި ބޭއްވި ރަސްމިއްޔާތުގައި ވާހަކަ ދައްކަވަމުން އީވާ ވިދާޅުވީ ވަޒީރަށް ވޯޓު ނުދެއްވައިފި ނަމަ ރަށުގެ ތަރައްގީގެ މަޝްރޫއުތައް ހުއްޓޭނެ ކަމަށް ބުނެ ވާހަކަ ދައްކަމުން ދާ ކަމަށެވެ. އެއީ ކުރާ މަލާމާތެއް ކަމަށް އޭނާ ވިދާޅުވި އެވެ.
އެވަރު މަލާމާތެއް އެމްޑީޕީގެ މެމްބަރުންނަށް ކުރިއަ ނުދެއްވާތި. އަޅުގަނޑުމެން މި ޕާޓީ އުފެއްދީ އެމީހަކަށް ހައްގުވާ މިންވަރު ގަދަރުވެރިކަމާއެކީގައި ސަރުކާރެއްގެ ކިބައިން ޑިމާންޑް ކުރަން ވެގެން. އެއީކީއެއް ކޮންމެހެން އަޅުވެތިކަމާއެކީގައި ކުރަންޖެހޭ ކަމެއް ނޫން އެއީކީ.
– އީވާ ވިދާޅުވި އެވެ.
މި ސަރުކާރަކީ އެމްޑީޕީގެ މެމްބަރުން ވޯޓު ދީގެން ގެނައި ސަރުކާރެއް ކަމަށާއި ކޮންމެ މީހަކު އެމްޑީޕީގެ ޗެއާޕާސަން ކަމަށް އިންތިހާބުވި ނަމަވެސް ސަރުކާރު ގެންނަން ވީ ވައުދުތައް ފުއްދަން ޖެހޭނެ ކަމަށް އީވާ ވިދާޅުވި އެވެ. ސަރުކާރު އަންނަން ވީ ވައުދުތަކާއި އެމްޑީޕީގެ އެތެރޭގެ އިންތިހާބާ ނުގުޅުވޭނެ ކަމަށް އީވާ ވިދާޅުވި އެވެ. އަދި 2023 އެމްޑީޕީއަށް ކާމިޔާބު ވާނީވެސް އެ ވައުދުތައް ފުއްދައިގެން ކަމަށް އޭނާ ވިދާޅުވި އެވެ.
އެމްޑީޕީގެ ޗެއާޕާސަން އަކަށް އަޅުގަނޑުމެން އިންތިހާބުކުރަން ޖެހޭނީ އެމްޑީޕީއިން ބޭނުންވާ ޗެއާޕާސަންއެއް. އެމްޑީޕީ އެ ސިފަކުރި އަޅުގަނޑުމެން އެ ލޯބިވާ ޕާޓީގެ އަސާސްތަކުގައި ހިފައިގެން ޕާޓީ ކުރިއަށް ގެންދާނެ ޗެއާޕާސަންއެއް އަޅުގަނޑުމެން ބޭނުމީ. އެހެން ޕާޓީއެއްގެ ސިފަ ޖައްސާކަށް އަޅުގަނޑުމެނެއް ބޭނުމެއް ނޫން.
– އީވާ ވިދާޅުވި އެވެ.
ޕާޓީއަށް އޮތް އިތުބާރު ހިފަހައްޓަން ބޭނުން ނަމަ އިމްތިޔާޒު ފަހުމީ އިންތިހާބު ކުރަން ޖެހޭ ކަމަށް އީވާ ވިދާޅުވި އެވެ. އެމްޑީޕީގެ ޗެއާޕާސަންއަކީ އިމްތިޔާޒު ފަހުމީއޭ ބުނުމުންވެސް އިތުބާރު ކުރާނޭ އެތައް ބައިވަރު މީހުން ތިބޭނެ ކަމަށް އީވާ ވިދާޅުވި އެވެ.
ކުރިމަގުގައި ޕާޓީއަށް ކާމިޔާބީތައް ހޯދައި ކުރިއަށް އޮތް އިންތިހާބުތައް ކާމިޔާބު ކުރުމަށް އިމްތިޔާޒު ފަހުމީ އެމްޑީޕީގެ ޗެއާޕާސަންއަކަށް އިންތިހާބުކޮށްދިނުމަށް އީވާ އެދިވަޑައިގަތެވެ. ޗެއާޕާސަން ކަމުގެ އިންތިހާބުގެ ވޯޓުލުން އޮތީ މޭ 14 ވަނަ ދުވަހުއެވެ.
