މަޝްރޫޢުތައް ކުރިއަށްގެންގޮސް ނިންމާލެވޭވަރަށް ޔޫތު މިނިސްޓްރީގެ ބަޖެޓުގައި ފައިސާ ހިމެނިފައިނުވާކަމަށް ޔޫތު މިނިސްޓަރ އަޙްމަދު މަޚްލޫފް ވިދާޅުވެއްޖެއެވެ.
މަޚްލޫފް މިހެން ވިދާޅުވީ، ރ.މާކުރަތު ފުޓްބޯޅަ ދަނޑުގެ މަސައްކަތް ނުނިމި ލަސްވަމުންދާތީ އުނގޫފާރު ދާއިރާގެ މެންބަރު މުޙައްމަދު ވަހީދު ދެންނެވި ސުވާލަކަށް ޖަވާބުދެއްވަމުންނެވެ. މަޚްލޫފް ވިދާޅުވީ، ބަޖެޓުގައި ފައިސާ ހިމަނާފައި ހުރީ އެއްވެސް މަޝްރޫޢެއް ފަށާގޮތަށް ގެންގޮސް ނިންމައިލެވޭ މިންވަރަށްކަށް ނޫންކަމަށާއި، އެހެން މަޝްރޫޢުތަކަށް ކަނޑައަޅަފައިވާ ފައިސާއިން މަޝްރޫއުތައް ހަމަޖައްސަން ޖެހޭކަމަށެވެ. މިއަހަރުވެސް ގިނަ މަޝްރޫޢުތަކެއް ހިންގުމަށް ނިންމާފައިވާކަމަށާއި، ހުރިހާ މަޝްރޫޢުއެއްވެސް ވިހާވެސް އަވަހަށް ނިންމާލެވޭތޯ މ ަސައްކަތް ކުރައްވަމުންގެންދަވާކަމަށް މަޚްލޫފް ވިދާޅުވިއެވެ.
ފުޓުބޯޅަ ސްޓޭޑިއަމެއްގެ ސަބްބޭސް އަޅައި ޓާފް އެޅުމަށް ޖުމްލަ އެކީގައި 8 މިލިއަނެއްހައި ހޭދަވާކަމަށްވެސް މަޚްލޫފް ވިދާޅުވިއެވެ. ބައެއް މަޝްރޫޢުތައް ހިންގުމަށް ލައްކައެއްހައި ރުފިޔާ ބަޖެޓުގައި ހިމަނާފައިވާކަމަށާއި، އެހެންކަމުން މަޝްރޫޢުތައް ބޭނުންވާ ދުވެލީގައި ހިންގުމަށް ދަތިތަކެއް ކުރިމަތިވާކަަމށްވެސް މަޚްލޫފް ވިދާޅުވިއެވެ.
މަޖިލީހުގެ ޖަލްސާގައި މެންބަރުން ވަނީ އެދާއިރާތަކުގައި ހިންގުމަށް ކަނޑައަޅަފައިވާ ކުޅިވަރުގެ ބައެއް މަޝްރޫޢުތައް ލަސްވާތީ ކަންބޮޑުވުން ފާޅުކުރައްވާފައެވެ.
