އެކްޓަރަކާ ލޯބީގެ ގޮތުން ގުޅުނު ކަމަށާއި، އެކަމަކު އޭނާ ބޭވަފާތެރިވީ ކަމަށް ބޮލީވުޑްގެ ކުރީގެ މަޝްހޫރު އެކްޓްރެސް މިނީޝާ ލާމްބާ ބުނެފިއެވެ.
މިނީޝާ ބޮލީވުޑަށް ނުކުތީ 2005 ވަނަ އަހަރު، "ޔަހާން" ކިޔާ ފިލްމަކުންނެވެ. އޭގެ ފަހުން ބައެއް ފިލްމުތަކުގައި ބަތަލާގެ ރޯލު ކުޅުނަސް، އޭނާއަށް މާ ބޮޑު ކުރިއެރުމެއް ލިބިފައެއް ނުވެއެވެ. ވުމާއެކު އޭނާ ވަނީ ފިލްމީ ދާއިރާއާ ދުރަށް ގޮސްފައެވެ.
އިންޑިއާގެ މުނިފޫހިފިލުވުމުގެ ޚަބަރުތައް ގެނެސްދޭ ނޫހަކަށް ދިން އިންޓަވިއުއެއްގައި މިނީޝާ، 36، ވަނީ އޭނާގެ ހަޔާތާ ބެހޭގޮތުން ވާހަކަދައްކާފައެވެ.
އެގޮތުން 2015 ގައި ކުރި ކައިވެނި 2020 ވަނަ އަހަރު ރޫޅުނު ވާހަކައަށް އަލިއަޅުވާލުމަށްފަހު، މިނީޝާ ވަނީ އޭނާ ކުރިން ރައްޓެހިވި މީހެއްގެ ވާހަކަ ކިޔައިދީފައެވެ. މިނީޝާ ބުނީ އޭނާ އެކްޓަރަކާ ލޯބީގެ ގޮތުން ގުޅިފައިވާނެ ކަމަށާއި، އެކަމަކު އެމީހާ ދިނީ ލަނޑެއް ކަމަށެވެ.
އެ އެކްޓަރުގެ ނަން ހާމަނުކޮށް މިނީޝާ ބުނީ، އޭނާ އެހެން އަންހެން ކުއްޖެއް ކައިރިއަށް ގޮސް މިނީޝާއަށް ބޭވަފާތެރިވީ ކަމަށެވެ. އަދި އެއީ ގިނަ އަންހެން ކުދިންނާ "ފްލާޓް" ކޮށް އުޅޭ އެކްޓަރެއް ކަމަށްވެސް ބުންޏެވެ.
ހަމަ އެހެންމެ، ފިލްމީ ދާއިރާއަށް ނިސްބަތްވާ މީހުންނާ ރައްޓެހި ނުވަނީ އޭނާގެ ފަރާތުން ލިބުނު ފިލާވަޅަށް ފަހުގައި ކަމަށް ބުންޏެވެ.
"އެކަމަކު އަހަންނެއް ނުބުނާނަން ހުރިހާ އެކްޓަރުންނަކީ ބޭވަފާތެރިންނެކޭ"
– މިނީޝާ ފާހަގަކުރިއެވެ.
މިނީޝާއަށް ބޭވަފާތެރިވީ ކޮން އެކްޓަރެއްކަން އޭނާ ހާމަނުކުރިޔަސް، އޭނާ މީގެކުރިން އެކްޓަރު އާރްޔާ ބައްބަރާ ލޯބީގެ ގޮތުން ގުޅެފައިވެއެވެ.
