އަޑު އިވުމުން މަހުރޫމު ވެފައިވާ މީހުންނަށް މަޖިލީހުގެ ޖަލްސާތައް އިޝާރާތުގެ ބަހުރުވަ (ސައިން ލެންގްއޭޖް) އިން ކިޔައިދޭ ގޮތަށް ހަމަޖައްސައިފިއެވެ.
ހޯމަ ދުވަހުގެ ޖަލްސާއިން ފެށިގެން ސައިން ލެންގްއޭޖުން މަޖިލީހުގެ ޖަލްސާތައް ގެނެސްދޭނީ އިންޓަޕްރިޓާ މަރިޔަމް ފަޒްނީއެވެ. ފަޒުނީއަކީ ނުކުޅުދުންތެރިކަން ހުންނަ މީހުންގެ ތެރެއިން އަޑުއިވުމުން މަހުރޫމް ވެފައިވާ މީހުންނަށް ބޭނުންވާ މައުލޫމާތު ފޯރުކޮށް ދިނުމުގައި ފާއިތުވެދިޔަ ދުވަސްތަކުގައި ވަރަށް މުހިންމު ދައުރެއް އަދާކޮށްފައެވެ. އެންމެ ބޮޑަށް އޭނާ ފާހަގަވެގެން ގޮސްފައިވަނީ ކޯވިޑް-19ގެ ތެރޭގައި ކޮންމެ ދުވަހަކު އޭރު ބައްވަމުންދިޔަ ޕްރެސް ކޮންފަރެންސްތައް އިޝާރާތުން ގެނެސްދިން ހިސާބުންނެވެ.
މަޖިލީހުގެ ޖަލްސާތައް އިޝާރާތުގެ ބަހުރުވައިން އިވުމުން މަހުރޫމް ވެފައިވާ މީހުންނަށް ގެނެސްދޭން ނިންމާފައިވަނީ މީގެ ދުވަސްކޮޅެއް ކުރިން މަޖިލީހުން ކުރިއަށް ގެންދިޔަ "ޕްރެކްޓިސް ޕާލިއަމެންޓް ފޯ ޔޫތް" ޕްރޮގްރާމްގައި ބައިވެރިވި އިވުމުން މަހުރޫމް ވެފައިވާ "ނާއިޝް" މަޖިލީހުގައި އެދުމުންނެވެ. މަޖިލިސް ރައީސް މުހައްމަދު ނަޝީދު ވަނީ އެދުވަހު މިކަން ކުރެވޭނެ އިންތިޒާމު ވީހާވެސް އަވަހަށް ހަމަޖައްސަވައި ދެއްވާނެ ކަމަށް ވިދާޅުވެފައެވެ.
އޭގެ ކުރިންވެސް އަދި އޭގެ ފަހުންވެސް ފަޒުނީ ވަނީ އަޑުއިވުމުން މަހުރޫމް ވެފައިވާ މީހުންނަށް ބޭނުންވާ މައުލޫމާތު ފޯރުކޮށް ދިނުމަށް ގިނަ މަސައްކަތްތަކެއް ކޮށްފައެވެ. އެގޮތުން ޤައުމީ ފެންވަރުގައި ބާއްވާ ބޮޑެތި ޖަލްސާތަކާއި، އެކި އޮފީސްތަކުގެ އިވެންޓުތައްވެސް އޭނާ ވަނީ ރައްޔިތުންނާއި ހަމަައަށް އިޝާރާތުގެ ބަހުރުވައިން ގެނެސްދީފައެވެ.
ރައްޔިތުންގެ މަޖިލީހަކީ ދައުލަތުގެ ތިން ބާރުގެ ތެރެއިން އެއްބާރެވެ. އަދި ރައްޔިތުންނާއި އެންމެ ގުޅުންހުރި ރައްޔިތުން އިންތިޚާބުކޮށްފައިވާ މެމްބަރުންގެ މަސައްކަތްތައް ރައްޔިތުންނާއި ހަމައަށް އެންމެ ގާތުން ފެންނަ އެއްބާރެވެ. މަޖިލީހުގެ ޖަލްސާތަކާއި، ކޮމެޓީތަކުގައި ކުރެވޭ މަސައްކަތްތަކަކީ މީޑިއާތަކުން ވަގުތުން ގެނެސްދޭ މަސައްކަތްތަކެއް ކަމަށްވީނަމަވެސް މިހާތަނަށް އަޑުއިވުމުން މަހުރޫމްވެފައިވާ މީހުންނަށް މަޖިލީހުގެ ޖަލްސާތައް ވަގުތުން ކިޔައިދެވޭނެ އިންތިޒާމެއް ހަމަޖެހިފައި ނުވެއެވެ.
މަޖިލީހުގެ އަމާޒަކަށް ވެފައިވަނީ މަޖިލީހުގެ ޖަލްސާތަކާއި މަޖިލީހުގެ ކޮމެޓީތަކުގައި ކުރެވޭ މަސައްކަތައްވެސް އަޑުއިވުމުން މަހުރޫމް ވެފައިވާ މީހުންނަށް ގެނެސްދެވޭނެ އިންތިޒާމު ހަމަޖެސުމެވެ.
