ރަޝިއާގެ ނޭވީގެ އެންމެ މުހިންމު އެއް މަނަވަރަށް އަމާޒުކޮށް ޔޫކުރެއިން ދީފައިވާ ކުރޫޒު މިސައިލް ހަމަލާތަކެއްގައި އެމަނަވަރު ބޭނުން ނުކުރެވޭ ވަރަށް ހަލާކު ވެއްޖެއެވެ. ބައެއް މީޑިއާތަކުން ރިޕޯޓު ކޮށްފައިވާ ގޮތުގައި މިމަނަވަރު މިހާރުވަނީ ބޭނުން ކުރެވޭވަރަށްވުރެ ބޮޑަށް ހަލާކުވެ ފެންމަތީ ނުވަތަ ބްލެކް ސީގެ އަޑިއަށް ފެތިފައެވެ.
ޔޫކުރެއިން ދިން މިސައިލް ހަމަލާތައް އަމާޒުވެ، ރަޝިއާގެ ނޭވީގެ އެންމެ ބޮޑު އެއް ހަގުރާމަ މަތީ މަނަވަރު ހަލާކުވެެގެން ދިއުން ވެގެން ގޮސްފައިވަނީ، ޔޫކުރެއިންއާއި ދެކޮޅަށް އުދުވާނީ ހަމަލާދެމުންދާތާ 50 ދުވަސް ވެގެން ގޮސްފައިވާ މި ހަގުރާމާކައި ޔޫކުރެއިންގެ ދިފާޢުގެ ފަރާތުން ރަޝިއާގެ އަސްކަރިއްޔާއަށް ލިބގެންދިޔަ އެންމެ ބޮޑު ގެއްލުން ކަމުގައެވެ.
ރަޝިއާގެ ބްލެކް ސީ ފްލީޓުގައި ހިމެނޭ، ގައިޑެޑް މިސައިލް ކުރޫޒާއެއް ކަމުގައިވާ، މޮސްކޯވާގެ ނަންދީފައިވާ މި މަނަވަރަށް އަމާޒުކުރި މިސައިލް ހަމާތަކުގައި ބޭނުން ނުކުރެވޭވަރަށް މަނަވަރަށް ގެއްލުން ލިބުމާއި ގުޅިގެން މި މަނަވަރުގެ ކުރޫން މިހާރުވަނީ މަނަވަރުން ބާލާފައެވެ. ރަޝިއާގެ މީޑިއާތަކުން ރިޕޯޓު ކޮށްފައިވަނީ މަނަވަރުން މީހުން ހުސްކޮށްފައިވަނީ، މަނަވަރުގައިވާ ހަތިޔާރުތައް ގޮވުމާއި ގުޅިގެން ކަމުގައެވެ.
ރަޝިއާގެ ޑިފެންސް މިނިސްޓްރީއާއި ހަވާލާދީ، ސްޓޭޓް މީޑިއާ TASS އަދި RIA އިން ރިޕޯޓު ކޮށްފައިވާ ގޮތުގައި ދިމާވި ކުއްލި ހާލަތަކާއި ގުޅިގެން މޮސްކޯވާ މަނަވަރަށް ވަރަށް ބޮޑަށް ގެއްލުން ވެފައި ވާކަމުގައެވެ. އަދި މިހާދިސާ ތަހުގީގު ކުރަމުންދާ ކަމުގައި ވަނީ ބުނެފައެވެ. މިހަމަލާގައި މަނަވަރުގެ ކުރޫންނަށް ލިބުނު ގެެއްލުމުގެ މައުލޫމާތު ރަޝިއާއިން ހާމަ ކޮށްފައެއް ނުވެއެވެ.
މޮސްކޯވާ މަނަވަރަށް ގެއްލުންތަކެއް ލިބިފައިވާ ކަމުގެ މައުލޫމާތު ރަޝިއާއިން ހާމަކުރުމުގެ ކުރިން ޔޫކުރެއިން ވަނީ، އެ މަނަވަށް ކުރޫޒް މިސައިލުން ހަމަލާ ދީފައިވާކަން ހާމަ ކޮށްފައެވެ.
ސީއެންއެންއިން ބުނެފައުވާ ގޮތުގައި، ބްލެކްސީގައި މިހާރު އުފެދި ދަތުރު ކުރަމުންދާ ތޫފާންގެ ސަބަބުން މަނަވަރުގެ އަސްލު ހާލަތު ސެޓްލައިޓް ފޮޓޯތަކުންނާއި ޑާޓާތަކުން ވަނީ ދެނެ ނުގަނެވިަފއެވެ. އެހެންމަވެސް، އެނަލިސްޓުންނާއި ހަވާލާދީ ބުނެފައިވަނީ، މިވަރުގެ ބޮޑު މަނަވަރެއްގައި ގޮވުންތަކެއް ގޮވައިފިނަމަ، ބޮޑެތި ގޮވުންތައް ގޮވާ، މަނަވަރު އަޑިއަށް ދިއުމަކީ ވަރަށް ގާތް ކަމެކެވެ.
މަނަވަށް ކުރިމަތިވި ގޮވުމުގެ ހާދިސާއަކީ ކޮންމެ ސަބަބަކާހުރެ ކުރިމަތިވި ހާދިސާއެއް ނަމަވެސް، މަސްރަހު ދިރާސާކުރާ ފަރާތްތަކުން ބުނަމުންދާ ގޮތުގައި، މި ހަމަލާއަކީ ރަޝިއާގެ ކަނޑުގެ އަސްކަރީ ބާރުގެ "ހިތަށް" އަމާޒު ކުރެވުނު ހަމަލާއެއް ކަމުގައެވެ.
500 ކުރޫން މަސައްކަތް ކުރަމުންދިޔަ 611 ފޫޓު (186 މީޓަރު) ދިގު މޮސްކޯވާ މަނަވަރު ބެލެވިފައިވަނީ، ބްލެކްސީގެ ރަޝިއާގެ ނޭވަލް ފްލީޓުގެ އެއް ޝަރަފް ކަމުގައެވެ.
މިމަނަވަރު އެންމެ ފުރަތަމަ ބޭނުންކުރަން ފަށާފައިވަނީ ސޯވިއެޓް ނޭވީގައި 1986ވަނަ އަހަރުއެވެ. އޭރު މި މަނަވަރަށް ދީފައިވާ ނަމަކީ ސްލާވާއެވެ. އެއަށްފަހު 1995 ވަނަ އަހަރު މި މަވަނަރުގެ ނަން މޮސްކޯވާއަށް ބަދަލުކޮށް، ބޮޑެތި ބަދަލުތަކާއެކު އަލުން ޚިދުމަތަށް ނެރެފައިވަނީ 1998 ވަނަ އަހަރުއެވެ.
މިގޮތުން ކޮސްކޯވާއަކީ، ގިނަ ދުރުމިންތަކަށް ހަމަލާދެވޭ އެންޓި ޝިޕް، އެންޓި އެއަރކުރާފް މިސައިލްތަކުގެ އިތުރުން ޓޯޕިޑޯތަކާއި ނޭވަލް ގަންތަކާއި، ކައިރިން ހަމަލާދެވޭ މިސައިލް ސިސްޓަމެއްވެސް ހަރުކުރެވިފައިވާ މަނަވަރެކެވެ.
