ހިޔާ ޓަވަރު 11 ގައި ގާއިމުކޮށްފަައިވާ މެނޭޖްމަންޓް އޮފީހުން ފްލެޓް ކުލި ބަލައިގަތުގެ އިންތިޒާމު ހަމަޖައްސާފައިވާ ކަމަށް އެޗްޑީސީ އިން ބުނެފިއެވެ.
ހިޔާ ފްލެޓްތަކުން ކުލި ނަގަން ފަށާފައި ވަނީ ސަރުކާރުން 3 ފަހަރެއްގެ މަތިން، ކުލި ނެގުން ފަސްކޮށްދިނުމަށް ފަހު މިމަހުގެ ފުރަތަމަ ދުވަހުން ފެށިގެންނެވެ. އެޗްޑީސީ އިން ބުނީ މާދަމާއިން ފެށިގެން ހިޔާ ޓަވަރު 11 ގައި ގާއިމުކޮށްފަައިވާ މެނޭޖްމަންޓް އޮފީހުން ހިޔާ ފްލެޓަށް ފައިސާ ދެއްކޭނެ އިންތިޒާމް ހަމަޖެހިފައިވާނެ ކަމަށެވެ.
ހިޔާ ހައުސިން ޕްރޮޖެކްޓަކީ 6720 ހައުސިން ޔުނިޓެވެ. ފްލެޓްތަކުގެ އެގްރިމެންޓްގައި ފްލެޓްތަކުގެ ވެރިންނާއެކު ސޮއިކޮށް، ފްލެޓްތައް ދޫކުރަން ފަށާފައިވަނީ މިދިޔަ އަހަރުގެ ޖުލައި މަހުއެވެ. އޭރު ސަރުކާރުން ނިންމީ ފްލެޓްތަކުގެ ފިނިޝިންގ މަސައްކަތްތަކަށް 3 މަހުގެ މުއްދަތެއް ދިނުމަށްފަހު ކުލި ނަގަން ފެށުމަށެވެ. މިމުއްދަތު 2021 ވަނަ އަހަރުގެ އޮކްޓޯބަރުމަހުގެ ނިޔަލަށް ހަމަވުމުން ސަރުކާރުން ދެން މުއްދަތު ފަސްކުރީ، މިދިޔަ އަހަރުގެ ނިޔަލަށެވެ.
ހިޔާ ފްލެޓަށް ފައިސާ ދެއްކުމުގެ އިންތިޒާމް، 13 އެޕްރީލް 2022 އިން ފެށިގެން ހިޔާ ޓަވަރު 11 ގައި ގާއިމްކުރެވިފައިވާ މެނޭޖްމަންޓް އޮފީހުން ވަނީ ހަމަޖެހިފައެވެ#MageyHiya #MyHulhumalé pic.twitter.com/PSTT32hMyY
— HDC (@hdcmaldives) April 13, 2022
ނަމަވެސް ގިނަ ފްލެޓްތަކެއްގެ މަސައްކަތް ނިމިފައި ނުވާތީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ނިންމެވީ، 2022 ވަނަ އަހަރުގެ މަރޗް މަހުގެ ނިޔަލަށް މިމުއްދަތު އިތުރުކޮށްދެއްވުމަށެވެ.
ހިޔާ ހައުސިން ޔުނިޓްތަކުގެ ކުލީގެ ގޮތުގައި ސަރުކާރުން ކަނޑައަޅާފައިވަނީ 7500 ރުފިޔާއެވެ. އަދި މެއިންޓަނަންސް ފީގެ ގޮތުގައި އިތުރު 1000 ރުފިޔާއާއެކު، ފްލެޓްތަކުގެ ވެރިން މަހަކު 8500 ރުފިޔާ އެޗް.ޑީ.ސީއަށް ދައްކަން ޖެހޭނެއެވެ. ހިޔާ ހައުސިން ޔުނިޓްތަކަށް މިހާރުވެސް ބޮޑު އާބާދީއެއް ވަނީ ދިރިއުޅުން ބަދަލުކޮށްފައެވެ. އެގޮތުން ހިޔާ ފްލެޓް ލިބުނު 6331 ފަރާތަކާއެކު މިހާތަނަށް އެއްބަސްވުމުގައި ސޮއިކޮށްފައިވާއިރު، އޭގެ ތެރެއިން 4500 އަށްވުރެ ޔުނިޓަށް އާއިލާތަކުން މިހާރު ބަދަލުވެފައިވާކަމަށް އެޗް.ޑީ.ސީން ވިދާޅުވެއެވެ.
އެސަރަޙައްދަށް ބޭނުންވާ އަސާސީ ޚިދުމަތްތައް ފުރިހަމަ ކުރުމުގެ މަސައްކަތް އެޗްޑީސީއާއި، ކަމާ ގުޅުންހުރި ފަރާތްތައް މެދުވެރިވެގެން އަންނަނީ ކުރަމުންނެވެ.
