ރަންބީރު ކަޕޫރާއި އާލިއާ ބަޓްގެ ކައިވެނި މިމަހުގެ 17 ގައި ކުރުމަށް ހަމަޖެހިފައި ވާއިރު މިހާރު ކުރިއަށް ދަނީ ކައިވެނީގެ ކުރިން އޮންނަ ސެރެމޮނީ ތަކެވެ.
މީގެ ދެދުވަހެއް ކުރިން އެމީހުން ކައިވެނި ކުރުމަށް ހަމަޖެހިފައިވާ ގޭގައި ކުލަބޮކި ދަމާ ޒީނަތްތެރިކޮށް ގެ ވެސް ވަނީ ދިއްލާލައިފައެވެ.
އާލިއާ އާއި ރަންބީރުގެ ލޯބީގެ ފެށުމަކީ އެމީހުން އެކުގައި ކުޅުނު ފިލްމު "ބްރަމަސްތުރާ"އެވެ. އެކިއެކި ސަބަބުތަކާހުރެ ފިލްމުގެ ޝޫޓިން ނިންމަން 5 ވަރަކަށް އަހަރު ހޭދަވި މި ފިލްމު ސެޕްޓެމްބަރު 9 ވަނަ ދުވަހު ރިލީޒް ކުރުމަށް އަންނަނީ ތައްޔާރު ވަމުންނެވެ.
ފިލްމް ކިތަންމެ ސްލޯކޮށް ދިޔަ ކަމުގައިވިޔަސް އެމީހުންގެ ލޯބި ދިޔައީ ވަރަށް ބާރު ސްޕީޑުގައި ކުރިއަށެވެ.
ފިލްމުގެ ޑައިރެކްޓަރު އަދި ރަންބީރުގެ ވަރަށް ގާތް އެކުވެރިއެއް ކަމުގައިވާ އަޔާން މުކަރްޖީ ވަނީ އެމީހުންގެ ކައިވެނިގެ ހަދިޔާ އަކަށް ފިލްމްގައި މިހެނޭ ލަވައެއް ކަމުގައިވާ "ކޭސަރިޔާ"ގެ ޓީޒާއެއް އާންމުކޮށްފައެވެ.
View this post on Instagram
އާލިއާ އާއި ރަންބީރުގެ ކައިވެންޏަކީ މިހާރު އެންމެ ގިނަ ބަޔަކު އިންތިޒާރު ކުރަމުން އަންނަ ކައިވެންޏެވެ. މި އަހަރު ފަހުކޮޅު ކައިވެނި ކުރަން އެމީހުން ކުރިން ނިންމި ނަމަވެސް ކައިވެނި އަވަސް ކޮށްފައިވަނީ އާލިއާގެ މަންމަ ފަރާތު ކާފަގެ އެދުމުގެ މަތިންނެވެ.
