ބޮލީވުޑް އެކްޓަރ ޝާހިދު ކަޕޫރުގެ ކުރިއަށް އޮތް ފިލްމު "ޖާޒީ" އެޅުވުން ފަސްކޮށްފިއެވެ.
ޖާޒީއަކީ ތެލެގޫ ފިލްމު "ޖާޒީ"ގެ ހިންދީ ރިމޭކެކެވެ. ގޯތަމް ތިންނަނޫރީ ޑައިރެކްޓްކޮށް، ޝާހިދު ކަޕޫރާއި މުރްނާލް ޓާކޫރު ލީޑް ރޯލުން ފެނިގެންދާ މި ފިލުމު މި މަހުގެ 14 ވަނަ ދުވަހު ރިލީޒް ކުރުމަށް ތާވަލް ކުރި ނަމަވެސް މިހާރު ވަނީ ފަސްކޮށްފައެވެ.
މިހާރު ފިލްމު އެޅުވުމަށް ތާވަލް ކޮށްފައިވަނީ މިމަހުގެ 22 އަށެވެ. މި ފިލްމަކީ ކޯވިޑް-19ގެ ސަބަބުން އެޅުވުން ލަސް ވަމުން އައި ފިލްމެކެވެ.
ކުރިކެޓް ކުޅުންތެރިއެއްގެ ދިރިއުޅުން ދައްކުވައިދޭ ސްޕޯޓްސް ޑްރާމާ ފަސްކުރަން ޖެހުނީ "ކޭޖީއެފް ޗެޕްޓާ-2″ ގެ ސަބަބުން ކަމަށް ބައެއް ޚަބަރުތައް ބުނެއެވެ.
ނަމަވެސް މި ފިލްމަށް ކޮޕީރައިޓްގެ މައްސަލަތަކެއް ދިމާވެފައިވާ ކަމަށް ވެސް ރިޕޯޓްތައް ބުނެއެވެ. ކޮޕީއެއްކަމުގެ ތުހުމަތުކުރީ ލިޔުންތެރިއެއް ކަމަށްވާ ރަޖްނީޝް ޖައިޝްވާލެވެ.
އަދި ބޮމްބޭ ހައި ކޯޓަށް އެ މައްސަލަ މިހާރު ވަނީ ހުށައަޅާފައެވެ. ދެން މި ފިލްމާ މެދު ގޮތެއް ނިންމާނީ ކޯޓުންކަމަށް ވެސް ޚަބަރުތަށް ބުނެއެވެ.
ފިލްމުގެ ޕްރޮޑަކްޝަން ޓީމުން ބުނެފައިވަނީ މިއީ ވަރަށް ބުރަ މަސައްކަތުން އުފައްދާފައިވާ ފިލްމެއްގެ އިތުރުން ޓީމުގެ ބުރަ މަސައްކަތާއި، ކަރުނައާއި ލެޔާއި އަދި އެތައް ދަލެއް މިފިލްމަށް ވަނީ ގުރުބާން ކޮށްފައެވެ.
