ތިމާ އެކުގައިވާންޖެހޭނީ ތިމާއަށް އެންމެ ހެޔޮއެދޭ، ތިމާއަށް ރައްކާތެރިކަންދޭ ފަރާތާއެކުގައިކަމަށް ހޯމް މިނިސްޓަރ އިމްރާން ވިދާޅުވެއްޖެއެވެ.
ޝައިޚް ޢިމްރާން މިހެން ވިދާޅުވީ ރޭ އިސްލާމީ މަރުކަޒު ހޯލުގައި އޮތް އިޙްޔާ ފޯރަމްގައި ތަޤްރީރުކުރައްވަމުންނެވެ. ރޭގެ މައުޟޫއަށް ވާހަކަފުޅު ކުރިއަށް ގެންދަވަމުން، މާތް ރަސްކަލާންގެ ވޮޑިގެންވަނީ އަޅުގަނޑުމެންނާއި އެކުގައިކަމަށާއި އަޅުގަނޑުމެން ވަނީ އެކަލާނގެއާއިއެކުގައިތޯ ސުވާލުކުރެއްވިއެވެ.
އެގޮތުން އިންސާނުންނަށް ބަލާއިރު ބައެއް ހާލަތްތަކުގައި، ގާތުގައި ފެންނަ ހިސާބުގައި ވިޔަސް އެއީ އެކުގައިވާ ފަރާތްތަކަށް ނުވާ ފަހަރު އަންނަކަމަށާއި ދުރުގައި، ނުފެންނަ ހިސާބެއްގައި ވިޔަސް އެކުގައިވާ ފަރާތްތައް ވާކަމަށް ވިދާޅުވިއެވެ. އެހެންކަމުން ކޮންމެ އިންސާނެއްވެސް ބޭނުންވާނީ އެމީހަކާއި އެންމެ ގާތުގައި ނުވިޔަސް، އެކުގައިވާ ފަރާތެއްކަމަށާއި އެފަރާތަކީ ތިމާއަށް މަތިވެރި އިއްޒަތްދޭނެ، ކޮންމެ ވަގުތެއްގައި ތިމާ ރައްކާތެރިކޮށްދޭނެ، އަދި ހެޔޮ އެދޭނެ ފަރާތަކަށް ވުމަށްކަމަށް ވިދާޅުވިއެވެ.
ޝައިޚް ވަނީ މާތް ރަސްކަލާންގެ އާއިއެކުގައިވާން ބޭނުންވާ މީހާގެ ޢަމަލުތައް ބަހައްޓަން ޖެހޭގޮތުގެ މައްޗަށާއި މާތް ރަސްކަލާންގެ އާއެކުވާން ބޭނުންވާ މީހެއްގެ ކިބައިގައި ހުންނަންޖެހޭ ސިފަތަކަށް ވަރަށް ތަފްސީލުކޮށް ބައްލަވާލައްވާފައެވެ.
އިޙްޔާ ފޯރަމްތައް ކޮންމެ އާދިއްތަ ބުރާސްފަތި އަދި ހުކުރު ދުވަހަކު ބާއްވަމުން އަންނައިރު ދެން އެންމެ އަވަހަށް މިފަދަ ފޯރަމެއް އޮންނާނީ އަންނަ ބުރާސްފަތި ދުވަހުއެވެ.
