ރަމަޟާންމަހުގެ ރޭތައް އިޙްޔާ ކުރުމަށް މިރޭ ބާއްވާ ފޯރަމް ހޯމް މިނިސްތަރ ޢިމްރާން ޢަބްދުﷲ ތަގްރީރްކުރައްވާނެކަމަށް އިސްލާމިކް މިނިސްޓްރީން ބުނެފިއެވެ.
ރަމަޟާންމަހުގެ ރޭތައް އިޙްޔާ ކުރުމަށް ބާއްވާ4 ވަނަ ފޯރަމް މިރޭ އޮންނާނެއެވެ. ”ތިބާ ﷲ އާއެކު ވާށެވެ!” މި މަޢުޟޫއަށް މިރޭ ތަޤްރީރު ކުރައްވާނީ މިނިސްޓަރ އޮފް ހޯމް އެފެއާޒް، އައްޝައިޚް ޢިމްރާން ޢަބްދުﷲ އާއި އައްޝައިޚް ޢަބްދުﷲ ރަޝީދެވެ.
އިސްލާމީ މަރުކަޒުގެ ހޯލުގައި މިރޭ ދަރުސް ބާއްވާއިރު އެހެން ރޭތަކެކޭ އެއްގޮތަށް މިރޭވެސް އިޙްޔާ ފޯރަމް ލައިވްކުރާނެކަމަށް އެ މިނިސްޓްރީން ބުންޏެވެ.
ރަމަޟާންމަހުގެ ރޭތައް އިޙްޔާ ކުރުމަށް ކުރިއަށް ގެންދާ އިޙްޔާ ފޯރަމްތައް މާލޭގެ އިތުރުން ރާއްޖޭގެ އެކި ކަންކޮޅުތަކުގައި ދަނީ ކުރިއަށް ގެންދަމުންނެވެ. އެގޮތުން މިހާތަނަށް ކުޅުދުއްފުށީ ސިޓީގައި ބާއްވާފައިވާއިރު އަންނަ ހުކުރު ދުވަހު އިޙްޔާ ފޯރަމް އޮންނާނީ އައްޑޫ ސިޓީގައެވެ. މިމަހުގެ 22 ގައި ފުވައްމުލައް ސިޓީގައި ފޯރަމް ބޭއްވުމަށް ހަމަޖެހިފައިވާއިރު ރ. އުނގޫފާރުގައި މި ފޯރަމް އޮންނާނީ މިމަހުގެ 29 ވަނަ ދުވަހުއެވެ.
ހޯމް މިނިސްޓަރ އިޙްޔާ ފޯރަމްގައި ތަގްރީރްކުރައްވާއިރު، އަދާލަތު ޕާޓީގެ ލޯގޯ ޖަހައިގެން މިސްކިތެއްގައި ދަރުހެއް ބޭއްވި މައްސަލައެއްގައި ސިޔާސީ ބައެއް ފަރާތްތަކުން ވަނީ ފާޑުކިޔާފައެވެ.
