މި މަހުގެ 17 ގައި ކައިވެނި ކުރުމަށް ތައްޔާރު ވަމުން އަންނަ ބޮލީވުޑްގެ މަޝްހޫރު ބަތަލާ އާލިއާ ބަޓް ޕަޕަޒާނީންނަށް ފެނިދާނެތީ، ހުރީ އަމިއްލައަށް ގޭބަންދު ވެގެން ކަމަށް ރިޕޯޓްތައް ބުނެފިއެވެ.
މީގެ 5 ވަރަކަށް އަހަރު ކުރިން "ބްރަމަސްތުރާ"ގެ ސެޓުން ދިމާވެ އާލިއާ އާއި ރަންބީރު ކަޕޫރު ލޯބީގެ ގޮތުން ގުޅިގެން އުޅުމަށް ފަހު، މިހާރު އެމީހުންގެ ގުޅުން ވަނީ ކައިވެންޏާ ހަމައަށް ގޮސްފައެވެ. އެއީ އެ ދެ ތަރިން އެކުގައި ފެނިގެންދާ ފުރަތަމަ ފިލްމެވެ.
މި މަހުގެ 13-16 އަށް ކައިވެނީގެ ސެރެމޮނީތައް ކުރިއަށް ދާއިރު، ކައިވެނީގެ ހުރިހާ ކަމެއް މިހާރު ރާވާ ނިންމާފައިވާ ކަމަށްވެސް ޚަބަރުތައް ބުނެއެވެ.
މީގެ ކުރިން މިއަހަރުގެ ފަހު ކޮޅު ކައިވެނި ކުރަން އުޅުނު ނަމަވެސް، ކައިވެނި އަވަސް ކުރަން ނިންމީ އާލިއާގެ މަންމަ ފަރާތު ކާފަގެ އެދުމުގެ މަތިން ކަމަށް ޚަބަރުތައް ބުނެއެވެ.
View this post on Instagram
ކައިވެނި ހަފްލާ ބޭއްވުމަށް ހަމަޖެހިފައިވަނީ ވަރަށް ކުޑަކޮށް ހަމައެކަނި އާއިލާ އާއި ގާތް ރަހުމަތްތެރިންގެ ހާޒިރުގައެވެ. އެ ހަފްލާ ބޭއްވުމަށް ހަމަޖެހިފައިވަނީ މުމްބާއީގައި ހުންނަ ރިޝީ ކަޕޫރުގެ ގޭގައި ކަމަށްވެސް މުނިފޫހި ފިލުވުމުގެ ހަބަރު ގެނެސްދޭ ބައެއް ނޫސްތަކުން ވަނީ ބުނެފައެވެ. އެއީ ރަންބީރުގެ މައިންބަފައިން ވެސް ކައިވެނި ކުރި ތަނެވެ.
ކައިވެންޏަށް ފަހު ދެމީހުން ސުވިޒްލޭންޑަށް ފުރާނެ ކަމަށްވެސް ބައެއް ރިޕޯޓުތައް ބުނެއެވެ. ނަމަވެސް އާލިއާ އެ ގައުމަށް ދަނީ ފިލްމްއެއްގެ ޝޫޓިންގ އަށެވެ. އަދި މި ދަތުރުގައި ރަންބީރުވެސް ބައިވެރި ވާނެއެވެ.
