ޔުއެފާ ޗެމްޕިއަންސް ލީގުގެ ކުއާޓާ ފައިނަލު ފުރަަތަމަ ލެގުގައި މެނެޗެސްޓަރ ސިޓީން، އެތުލެޓިކޯ މެޑްރިޑް ބަލިކޮށްފިއެވެ.
މެންޗެސްޓާ ސިޓީން މިމެޗު ކާމިޔާބު ކުރީ އަމިއްލަ ދަނޑުގައި 1-0 އިންނެވެ. ފުރަތަމަ ހާފުގައި އެތުލެޓިކޯ އަށް ހަމަލާއެއް ފޮނުވައި ނުލެނުވެވެ. ސިޓީން ގިނަ ހަމަލާތަކެއް ފޮނުވާލި ނަމަވެސް ލަނޑެއް ނުޖެހުނެވެ. އެކަމަކު މެޗުގެ އޮއިވަރު ބަދަލުވީ 68 ވަނަ މިނިޓުގައި ސިޓީގެ ކޯޗު ޕެޕް ގާޑިއޯލާ އެއްފަހަރާ ގެނައި ތިން ބަދަލާ އެކުއެވެ.
އިލްކޭ ގުންޑޮގާން އާއި ރިޔާދް މަހްރޭޒް އަދި ރަހީމް ސްޓާލިންގެ ބަދަލުގައި، ޖެކް ގްރީލިޝް އާއި ފިލް ފޮޑެން އަދި ގެބްރިއެލް ޖީސަސް ކުޅެން ނުކުތުމާ އެކު ދެ މިނިޓު ތެރޭ ސިޓީއަށް ލަނޑު ޖަހައިދިނީ ކެވިން ޑިބްރޭނާއެވެ. މެޗުގެ 70 ވަނަ މިނިޓްގައި ޑިބްރޭނާ މި ގޯލު ޖެހީ އޭރިއާތެރެއިން ފިލް ފޯޑެން ހުސްކޮށްލާފައި ދިން ބޯޅައެއް ގޯލުގެ ދުުރު ކަނަށް ފޮނުވާލައިގެންނެވެ. އެތުލެޓިކޯގެ ގިނަ ފައުލުތަކެއް ފެނިގެންދިޔަ މި މެޗުގައި ސިޓީ އަށް ގޯލު ޖަހަން ހުސް ފުރުސަތުތައް ތަނަވަސްކުރުން ވީ ވަރަށް އުނދަގޫ ކަމަކަށެވެ.
މިއީ ޑިބްރޭނާ އެންމެ ފަހުން ކުޅުނު ފަސް މެޗުގައި ޖެހި ފަސްވަނަ ލަނޑެވެ. އަދި މިއީ މިދިޔަ ސީޒަނުގެ ސެމީ ފައިނަލް ފުރަތަމަ ލެގުގައި ޕީއެސްޖީ ކޮޅަށް ޖެހި ލަނޑަށް ފަހު ޑިބްރޭނާ ޗެމްޕިއަންސް ލީގުގައި ޖެހި ފުރަތަމަ ލަނޑެވެ. މީގެ އިތުރުން މިދިޔަ ސީޒަނުގެ ކުއާޓާ ފައިނަލާއި ގަދަ 16 ޓީމު ވާދަކުރި ބުރުގައި ވެސް ޑިބްރޭނާ ވަނީ ލަނޑު ޖަހައިފައެވެ.
އަންނަ ހަފްތާގައި އެތުލެޓިކޯގެ ވަންޑާ މެޓްރޮޕޮލިޓާނޯ ސްޓޭޑިއަމްގައި ކުޅޭ ދެ ވަނަ ލެގުން ސިޓީ އަތުން ދެ ގޯލުގެ ތަފާތުން އެތުލެޓިކޯ މޮޅުވާން ޖެހޭނެއެވެ. އެހެން ނޫނީ އެ ޓީމު މުބާރާތުން ކަޓާނެއެވެ.
