ރައީސުލްޖުމްހޫރިއްޔާ އޮފީހުގެ މިނިސްޓަރ މުހައްމަދު ޝިފާޒު ރައީސުލްޖުމްހޫރިއްޔާ އައްޔަން ކުރެއްވި ވަޒީފާއެއްގައި ހުންނަވައި ސަރުކާރުގެ އަގުވައްޓާލުމަށް މަސައްކަތް ކުރަމުންދާތީ އެކަމުގެ ކަންބޮޑުވުން ފޭދޫ ދާއިރާގެ މެމްބަރު މުހައްމަދު ނިހާދު ފާޅު ކުރައްވައިފިއެވެ.
ނިހާދު މިހެން ވިދާޅުވީ އެމްޑީޕީގެ ޗެއާޕާސަން އިންތިޚާބުގައި، ވާދަކުރައްވާ އިންތިގެ ކެމްޕެއިންފައި ރަށްރަށަށް ވަޑައިގެން ސިއްޕެ ދައްކަވަމުންދާ ވާހަތަކާއި ގުޅިގެންނެވެ. މިއިންތިޚާބުގައި އެމްޑީޕީގެ ނައިބް ރައީސްގެ މަޤާމުގައި ހުންނަވައި ސިއްޕެ ދަނީ ފުރަތަމަ ދުވަހުން ފެށިގެންވެސް އިންތިގެ ކެމްޕެއިންގައި އަމަލީ ގޮތުން ބައިވެރިވެ ކެމްޕެއިން ކުރައްވަމުންނެވެ.
މިކެމްޕެއިންގައި ސިއްޕެ ދައްކަވާ ވާހަތަކަށް އިޝާރާތް ކުރައްވައި، ނިހާދު ވިދާޅުވީ ޤާނޫނު އަސާސީން ރައީސުލްޖުމްހޫރިއްޔާއަށް ލިބިދޭ ބާރުގެ ތެރެއިން އައްޔަން ކުރާ މަޤާމެއްގައި ހުންނަވާ ބޭފުޅަކު ސަރުކާރުގެ އަގުވެއްޓޭ ގޮތަށް ވާހަކަ ދައްކަވައި، ރައްޔިތުންގެ ހިތްތަކުގައި ސަރުކާރާއިމެދު ނަފްރަތު އުފެއްދުމަކީ ނުހަނު ކަންބޮޑުވުނާ ކަމެއްކަމަށެވެ.
ޤާނޫނު އަސާސީގެ ދަށުން ރައީސުލްޖުމްހޫރިއްޔާ އެޕޮއިންޓް ކުރާ މީހުންގެ ޒިންމާއަކީ ސަރުކާރުން ކުރާ ހުރިހައި ކަމެއްގެ މައުލޫމާތު ގޯސްކޮށް ފެތުރުމާއި، ސަރުކާރާއި މެދު ރައްޔިތުންގެ ހިތުގައި ނުތަނަވަސްކަން އުފެއްދުންތޯ؟ ސާފުކޮށްލަން އެހީ.
– ނިހާދު ވިދާޅުވިއެވެ.
ވާދަވެރިކަން ބޮޑުވެފައިވަ މިއިންތިޚާބުގައި އެމްޑީޕީގެ ރައީސް މުހައްމަދު ނަޝީދުގެ ތާއީދުވެސް އޮތީ އިންތިއަށްކަން އެމަނިކުފާނުގެ ވާހަތަކުން އެގެއެވެ. އަދި ރައީސް ނަޝީދުވެސް ދަނީ މަޖިލިސް ތެރޭގައި ކުރެވޭ ބަހުސްތަކުގައިވެސް އިންތިއަށް ތާއީދު ލިބޭ ގޮތަށް ވާހަކަ ދައްކަވަމުންނެވެ.
އަންނަ މަހުގެ 14 ވަނަ ދުވަހު އިންތިޚާބު ބާއްވާއިރު، މިއިންތިޚާބުގައި އިންތިއަށް ތާއީދު ކުރައްވާ ބޭފުޅުން އެންމެ ބޮޑަށް ތުހުމަތު ކުރައްވަނީ މިނިސްޓަރ ފައްޔާޟަކީ ނުފޫޒާއި ބާރުން ކަންކުރައްވާ ބޭފުޅެއްކަމަށެވެ. އަދި ސަރުކާރުގެ ތެރެގައި ހިންގާ ކޮރަޕްޝަންގެ ކަންކަމުގައިވެސް އެންމެ އިސްކޮށް ހުންނެވީ މިނިސްޓަރ ފައްޔާޟުކަމަށް އެބޭފުޅުން ތުހުމަތު ކުރެއެވެ. ނަމަވެސް މިހާތަނަށް މީގެއިން އެއްވެސް ވާހަކައެއްގެ ހަގީގަތެއް ހާމަކުރެވިފައި ނުވެއެވެ.
