ރައްޔިތުންގެ މަޖިލީހުގެ ކޮމިޓީތަކުގައި ހުރި މަސައްކަތްތައް ލަސްވާތީ މަޖިލީހުގެ ރައީސް މުޙައްމަދު ނަޝީދު ކަންބޮޑުވުން ފާޅުކޮށްފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ނަޝީދު ވިދާޅުވީ، މިއަދުގެ ޖަލްސާގައި ބަހުސްކުރެވެމުންދާ ކުންފުނިތަކުގެ ބިލާ ގުޅޭ ގޮތުން މަޖިލީހުގެ ހަދައިފައިވާ ދިރާސާއެއް މެންބަރުންނާ ހިއްސާކޮށްފައިވާކަމަށެވެ. އެއީ މެންބަރުންނަށް ބިލްތަކާ ގުޅޭ ގޮތުން އެހީތެރިވެދިނުމަށް ޓަކައި ހިއްސާކޮށްފައިވާ ކަރުދާހެއްކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ ކޮމިޓީތަކުގައި މިވަގުތު 25 ބިލެއް އެބައޮތްކަމަށާއި، އެ ބިލުތަކުގެ މަސައްކަތް ހަލުވިކުރުމަށް ހުރިހާ މެންބަރުންވެސް މަސައްކަތްކުރަން ޖެހޭކަމަށެވެ. މި ބިލުތައް ނުނިމި ކޮމިޓީތަކުގައި ވުމުގެ ބަދަލުގައި އަވަހަށް ބިލްތައް ނިންމާލެވޭނޭ ގޮތެއް، އެފަދަ ވިސްނުމެއް މެންބަރުން ގެންގުޅުއްވުމަކީ ބޭނުންތެރި ކަމެއްކަމަށް ނަޝީދު ވިދާޅުވިއެވެ.
މަޖިލީހުގެ މިއަހަރުގެ ފުރަތަމަ ދައުރުގައި ސަރުކާރުގެ ފަރާތުން 36 ބިލެއް ވަނީ މަޖިލީހަށް ހުށައަޅަން ނިންމާފައެވެ. މިގޮތުން އަލަށް 14 ބިލަކާއި،ހެދުމަށާއި މިހާރު އަމަލުކުރަމުންދާ ގާނޫނުތަކުގެ ތެރެއިން 22 ގާނޫނަކަށް އިސްލާހު ގެނައުމަށްވެސް ނިންމާފައިވެއެވެ.
