ބަރަކާތްތެރި ރަމަޟާން މަސް ފެށިގެންދާއިރު ދިވެހި ޤައުމު އޮތީ ވަރަށް ބޮޑު ނުރައްކަލެއްގެ ތެރޭގައިކަމަށް ޕީޕީއެމްގެ ރައީސް ޔާމީން ވިދާޅުވެއްޖެއެވެ.

މިފެށޭ 1443 ވަނަ އަހަރުގެ ބަރަކާތްތެރި ރަމަޟާން މަހުގެ ހެޔޮ އެދުމާއި ތަޙުނިޔާ ފޮނުވައްވައި ރައީސް ޔާމީން ނެރުއްވި ބަޔާނެއްގައި ވަނީ ދިވެހި އެންމެހާ ރައްޔިތުންނަށާއި އިސްލާމީ ޤައުމުތަކުގެ ލީޑަރުންނަށާއި އިސްލާމީ އުންމަތަށް ރޯދަމަހުގެ ތަހުނިޔާ ފޮނުވާފައެވެ. އަދި މި މަތިވެރި މައްސަރުގެ ބޭނުން ހެޔޮ ގޮތުގައި ހިތްޕެވުމަށާއި، ހެޔޮ ދަރުމައާއި ޘަވާބަށް އެދިގެން އެންމެހާ ރައްޔިތުންގެ ޢަމަލުތައް ސީދާ ކުރައްވާ މިމައްސަރުގެ ހެޔޮ ރަޙުމަތް ހޯދުމަށް ގަދައަޅާ މަސައްކަތް ކުރާ ބަޔަކަށް ވުމަށް އެންމެހާ ރައްޔިތުންނަށް އެމަނިކުފާނު ވަނީ ނަސޭހަތްތެރިވެ ވަޑައިގެންފައެވެ.

ރައީސް ޔަމީން ވިދާޅުވީ ރަމަޟާން މަހާއި ދިވެހި ކުރިމަތިލީއިރު، ރާއްޖެ ވަނީ ވަރަށް ބޮޑު ނުރައްކަލެއްގެ ތެރޭގައި ކަމަށެވެ. މިނިވަންކަމާއި ސިޔާދަތާއި އިސްތިޤުލާލަށް ބުރޫއަރާ އެތައް ކަމެއް އޮތްއިރު، ޤައުމުގެ އިޤްިޞާދުވެސް ވަނީ މީގެ ކުރިން ދުވަހަކުވެސް ނުދާ ވަރަށް ދަށަށް ގޮސްފައިކަމަށެވެ.

މިފެށޭ ރަމަޟާން މަސް އަޅުގަންޑުމެންނާއި ބައްދަލުވާއިރު، ޤައުމު އޮތް ޙަލަތަށް ބަލާއިރު، ޤައުމު އޮތީ ވަރަށް ބޮޑު ނުރައްކަލެއްގެ ތެރޭގަ. އެގޮތުން ބަލާއިރު ޤައުމުގެ މިނިވަންކަމާއި އިސްތިޤުލާލަށް ގެއްލުންވާ ހިސާބަށް ކަންކަން ގޮސްފައިވުމުގެ އިތުރުން އިޤްތިޞާދީ ޙާލަތުވެސް މިވަނީ އެތައް އަހަރެއް ފަހަތަށް ސޮއްސާލާފަ. އަދި ދީނީ ކަންކަމުގައި ޝާމިލުވެ އުޅުމުގައިވެސް އެތައް ގޮންޖެހުމަކާއި ކުރިމަތިލާންވެސް ވަނީ ޖެހިފަ.

– ރައީސް ޔާމީންގެ ބަޔާނުގައި ވެއެވެ.

އެހެންކަމުން މި ހުރިހާ ކަމަކުން ޤައުމު ސަލާމްތްކޮށްދެއްވައި، ޤައުމު އަލުން އަނބުރާ ހޯދުމަށް ދިވެހީން ކުރާ މަސައްކަތުގައި ބަރަކާތް ލައްވާ، ކާމިޔާބީ މިންވަރު ކުރެއްވުން އެދި ވަނީ ދުޢާކުރައްވާފައެވެ. އަދ މި މައްސަރަކީ ހުރިހާ ގޮތަކުންވެސް މިޤައުމާއި ދިވެހި ރައްޔިތުންނަށް ލުއި ފަސޭހަ އަދި އަޅުކަމުގައި ޝާމިލުވެ އުޅުމުގެ ހެޔޮ ތައުފީޤު މިންވަރު ކުރައްވާފައިވާ މައްސަރެއްކަމުގައި ލައްވާ މިމައްސަރުގެ ހެޔޮ ދަރުމައާއި ޘަވާބު އެންމެހާ ދިވެހި ރައްޔިތުންނަށް މިންވަރު ކުރެއްވުން އެދި ވަނި ދުޢާ ކުރައްވާފައެވެ.