އަދާލަތު ޕާޓީގެ ސްލޮޓްގައި ރައީސް އޮފީހުގެ ޗީފް އޮފް ސްޓާފްގެ މަޤާމު އަދާކުރައްވަމުންދާ އަލީ ޒާހިރުގެ މާލީ ބަޔާން އާންމުކޮށްފިއެވެ.

އަލީ ޒާހިރުގެ މާލީ ބަޔާނުން ފެންނަން ހުރި އެހެން މައުލޫމާތައް ބަލާއިރު ސައިކަލެއް ފިޔަވައި އޭނާގެ މިލްކިއްޔާތުގައި އެއްވެސް މުދަލެއް ނެތެވެ.

އަލީ ޒާހިރުގެ މާލީ ބަޔާނުގައި އޭނާގެ ނަމުގައި ހުޅުވާފައިވާ އެކައުންޓުތަކުގެ ތަފްސީލްވެސް ވަނީ ހާމަކޮށްފައެވެ. އެގޮތުން އިސްލާމިކް ބޭންކަމާއި، ބީއެމްއެލްގައި ހުޅުވާފައިވަ ތިން އެކައުންޓުގެ ތަފްސީލް ވަނީ ހާމަކޮށްފައެވެ. ބީއެމްއެލް އެކައުންޓުގައި 3،500 ރުފިޔާ އަދި އިސްލާމިކް ބޭންކްގައި 97،000 ރުފިޔާ ހުރިއިރު ބީއެމްއެލް ޑޮލަރު އެކައުންޓެއްގައި 1،400 ޑޮލަރު އެބަހުއްޓެވެ.

މާލީ ބަޔާނުގައިވާ ގޮތުން އަލީ ޒާހިރަށް މުސާރައިގެ ގޮތުގައި ފާއިތުވި ހަމަސް ދުވަހުގެ ތެރޭގައި ލިބިފައި ވަނީ 431،669.93 ރުފިޔާއެވެ. އޭގެ ބޭރުން އެއްވެސް އާމްދަނީއެއް ލިބިފައެއް ނުވެއެވެ.

މާލީ ބަޔާން ހުށައަޅަންޖެހޭ ފަރާތްތަކުން އެ ބަޔާނުގައި ދޮގު މައުލޫމާތެއް ހިމަނައިފިނަމަ އެމީހަކު ޖޫރިމަނާކޮށް 2 އަހަރުގެ ޖަލު ހުކުމެއް އަންނަ ގޮތަށް ގާނޫނެއް އެކުލަވާލުމަށް ރައްޔިތުންގެ މަޖިލީހަށްވެސް ވަނީ ހުށަހަޅާފައެވެ. މި ބިލުގައި ބިލް ހުށައަޅާ ސަބަބެއްކަމަށް ބުނެފައިވަނީ ޤާނޫނު އަސާސީއާއި ޤާނޫނުތަކުގެ ދަށުން މާލީ ބަޔާން ހުށައަޅަންޖެހޭ މީހުންނާއި، ދައުލަތުގެ މަޤާމުތައް އަދާކުރާ ފަރާތްތަކުގެ މާލީ އަދި އެހެނިހެން މަޞްލަޙަތުތައް ހާމަކުރުމުގެ ނިޒާމް އިތުރަށް ހަރުދަނާކޮށް، އެއް ހަމަކޮށް، ދެ ފުށް ފެންނަ ގޮތަކަށް މާލީ ހުށައެޅުމުގައި އަމަލުކުރަންޖެހޭ އުސޫލްތަކާއި މިންގަނޑުތައް ކަނޑައެޅުމަށް ބޭނުންވާ ޤާނޫނީ އޮނިގަނޑު ގާއިމުކުރުންކަމަށެވެ.

މަލީ ބަޔާން ހުށައަޅަންޖެހޭ ފަރާތަކުން ބަޔާނުގައި ތެދު ނޫން މައުލޫމާތު ހިމަނައިފިނަމަ، ނުވަތަ މައުލޫމާތު ފުރިހަމައަށް ހިމަނާފައި ނުވާނަމަ އެކަމުގެ ކުޑަ ބޮޑު މިނަށް ބަލާ ގިނަ ވެގެން 500،000ރ ( ފަސްލައްކަ ) ރުފިޔާއިން ޖޫރިމަނާކުރުމަށް ބިލުގައިވަނީ ހިމަނާފައެވެ. އަދި މާލީ ބަޔާނަށް ދޮގު މައުލޫމާތުދީ ބަޔާން ފުރިހަމަ ނުކޮށްވާނަމަ އެމީހަކު ހުރި މަޤާމަކުން ވަކިކޮށް ގިނަވަގެން 2 އަހަރަށް ޖަލަށްލުމަށްވެސް ބިލުގައިވަނީ ހިމަނާފައެވެ.

ދޮގު މައުލޫމާތެއް މާލީ ބަޔާނުގައި ހިމަނާފައިވާ ފަރާތެއްގެ މައްސަލަ ތަހުޤީގުކުރުމަށް ކަމާއި ބެހޭ މުއައްސަސާއަކަށް ފޮނުވާ އެ މައްސަލަ 1 މަސްދުވަހުގެ ތެރޭގައި ނިންމާ ޝަރީއަތަށް ހުށައަޅަންޖެހޭނެކަމަށްވެސް އިވާ ހުށައެޅުއްވި ބިލުގައިވަނީ ހިމަނާފައެވެ. އަދި ކޯޓްތަކުން އެ މައްސަލަ 2 މަސްދުވަހުގެ ތެރޭގައި ނިންމާ ހުކުމެއް ކުރަންޖެހޭނެކަމަށްވެސް ބިލުގައިވެއެވެ.