ބޮލީވުޑްގެ އެންމެ ލޯބި ޖޯޑުގެ ގޮތުގައި މިހާރު ބުނަމުން އަންނަ އާލިއާ ބަޓާއި ރަންބީރު ކަޕޫރު އެކުގައި ފެނިގެންދާ ފުރަތަމަ ފިލްމު "ބްރަމަސްތުރަ"ގެ ޝޫޓިންގ ފެށިތާ 5 އަހަރަށް ފަހު ފިލްމުގެ ޝޫޓިންގ ނިމުނުކަން އިއުލާން ކޮށްފިއެވެ.
މި ފިލްމަކީ އާލިއާ އާއި ރަންބީރުގެ ލޯބިގެ ފެށުމެވެ. މިހާރު އެމީހުންގެ ލޯބި ކައިވެންޏާއި ގާތުގައި ވާކަމަށް ޚަބަރުތައް ބުނެއެވެ. އަދި ދެމީހުން އެކުގައި އުޅުމަށް އެޕާޓްމެންޓެއް ޒީނަތްތެރި ކުރަން ފަށާފައި ވާކަމަށް ވެސް ޚަބަރުތައް ބުނެއެވެ.
"ބްރަމަސްތުރަ" އަކީ މީގެ 5 އަހަރު ކުރިން ރަންބީރުގެ ގާތް އެކުވެރިޔާ ޑައިރެކްޓާ އަޔާން މުކަރުޖީ ހަދަން ފެށި ފިލްމެކެވެ. އެކިއެކި ސަބަބު ތަކާއި ހެދި ފިލްމު ދިގު ދެމިގެން ގޮސް 5 އަހަރު ފަހުން އަންގާރަ ދުވަހު ފިލްމުގެ ޝޫޓިންގ ނިމުނުކަން އަޔާން ވަނީ ސޯޝަލް މީޑިއާގައި އިއުލާން ކޮށްފައެވެ.
މި ފިލްމް ގެ ޝޫޓިންގ ނިންމުން ވަނީ ކުލަ ގަދަކޮށް ފާހަގަ ކޮށްފައެވެ. އެގޮތުން އާލިއާ އާއި ރަންބީރު އަދި އަޔާން ވަނީ ފިލްމުގެ މަސައްކަތް ނިމުން ފާހަގަކުރުމަށް އަޅުކަމެއްގައިވެސް ބައިވެރިވެފައެވެ.
View this post on Instagram
މިހާރު ފިލްމުގެ މޯޝަން ޕޯސްޓަރެއްވެސް ދައްކާލާފައި ވާއިރު މި ފިލްމަކީ ބޮޑު ކާސްޓެއް ހިނެމޭ ފިލްމެކެވެ.
ސުޕަހިރޯއެއް ފެނިގެންދާ މި ފިލްމުގައި އާލިއާ އާއި ރަންބީރުގެ އިތުރުން، މޯނީ ރޯއީ، އަމީތާބް ބައްޗަން، ނާގައަރުޖުނާ އަކިނެއިނީ، ޑިމްޕަލް ކަޕާޑިއާ ފެނިގެންދާނެއެވެ، މީގެ އިތުރުން ސުޕަރސްޓާ ޝާހްރުކް ޚާންވެސް ހާއްސަ ފެނިލުމަކުން ފެނިގެން ދާނެއެވެ.
އަޔާން ލިޔެ ޑައިރެކްޓް ކުރާ މި ފިލްްމު ރިލީޒް ކުރުމަށް ތާވަލު ކޮށްފައިވަނީ މި އަހަރުގެ ސެޕްޓެމްބަރު މަހުގެ 9 ވަނަ ދުވަހަށެވެ.
