ޢީދަކީ ބޮލީވުޑްގެ ސުޕަރސްޓާ ސަލްމާން ޚާންގެ ސަޕޯޓަރުންނަށް އަބަދުވެސް ދެގުނަ އުފާ ލިބޭ ކަމެކެވެ. ސަޕޯޓަރުން ގަބޫލު ކުރާގޮތުގައި އެދުވަހަކީ އެމީހުންނަށް ދެ ޢީދު އަންނަ ދުވަހެކެވެ.
ކޮންމެ އަހަރެއްގެވެސް ޢީދު ހާއްސަ ވަނީ ސަލްމާނުގެ ފިލްމެއް ސިނަމާގައި އަޅުވާ ދުވަހުގެ ގޮތުގައެވެ.
ނަމަވެސް އެހެން އަހަރުތަކާއި ހިލާފަށް މި އަހަރު ސަލްމާނުގެ ފިލްމެއް ޢީދުގައި ނާޅުވާނެ ކަން އޭނާ ވަނީ ކަށަވަރު ކޮށްދީފައެވެ.
"މި އަހަރުގެ ޢީދުގައި އަހަރެން ނަގާނީ ކުޑަ ބްރޭކެއް. މި އަހަރު ސަލްމާންގެ ފިލްމްއެއް އީދުގައި ނުފެނާނެ" މީޑިއާ އާއި ވާހަކަދައްކަމުން ސަލްމާން ބުނެފައިއެވެ.
ސަލްމާން މި އަހަރު ގެ އައިފާ އެވޯޑްގެ ހޯސްޓްގެ ގޮތުގައި ފެނިގެން ދާނެކަމަށާއި ޝޯ އޮންނަނީ އަބޫދާބީގައި ކަމަށްވެސް މީޑިއާގައި ވާހަކަ ދައްކަމުން އޭނާ ވަނީ ބުނެފައެވެ. ހަމަ އެއާއެކު އޭނާ ވެސް އޮންލައިން ސްޓްރީމިންގ، ނުވަތަ އޯޓީޓީ ޕްލެޓްފޯމަށް ވަންނަން އުޅޭކަމަށްވެސް ވަނީ ބުނެފައެވެ.
" ގިނަ ސެލްބްރިޓީން، ތަރިން އަންނަނީ އޯޓީޓީ ޕްލެޓް ފޯމްގައި އެމީހުންގެ ހުނަރު ދައްކަމުން. އަހަރެންވެސް އޯޓިޓީ މީޑިއަމަށް ވަންނާނަން، އެކަމަކު ޕްރޮޑިއުސަރެއްގެ ގޮތުގައި. މިހާރު ބައެއް ޕްރޮޖެކްޓް ތަކާއި ބެހޭގޮތުން ދަނީ ވާހަކަ ދެކެވެމުން." ސަލްމާން ބުނެފައި ވެއެވެ.
ޢީދުގައި ސަލްމާންގެ ފިލްމެއް ނުފެނުނު ކަމުގައިވިޔަސް ބޮޑު ފިލްމެއް އަންނަނީ ޢީދުގައި ރިލީޒް ކުރުމަށް ތައްޔާރު ވަމުންނެވެ. އެއީ އަޖޭ ދޭވްގަން ޑައިރެކްޓް ކޮށް ލީޑު ރޯލުން ފެނިގެންދާ "ރަންވޭ 34″ އެވެ.
ގިނަ ބަޔަކު އިންތިޒާރު ކުރަމުންދާ މި ފިލްމްގައި އަޖޭގެ އިތުރުން މުހިންމު ރޯލަކުން އަމިތާބް ބައްޗަން އާއި ރަކުލް ޕްރީތު ސިންގް ވެސް ފެނިގެން ދާނެއެވެ.
