އަނެއްކާވެސް ރޯދަމަސް މިއޮތީ އައިސް ބައްދަލު ކޮށްފައެވެ. އެންމެހާ މުސްލިމުންގެ މައްޗަށް ފަރުޟު ކުރައްވާފައިވާ މި މާތް އަޅުކަމަށް ތައްޔާރު ވުމަކީ ޒަމާނުއްސުރެ ދިވެހިން ވާރުތަކޮށްފައިވާ ރިވެތި އާދަކާދައާއި، މާތް އަޚުލާގުގެ ތެރޭގައި ހިމެނޭ ކަންކަމެވެ. ރޯދައަށް ގޮވައްޗާއި ގޭތެރެ ސާފު ތާހިރުކޮށް، އަދި ދިރިއުޅުމުގެ ހުރިހާ ވައްޓަފާޅިއަކަށްވެސް އަންނަ ބަދަލުތައް މީގެ ތެރޭގައި ހިނެއެވެ.

ހަމަ އެފަދައިން، ރޯދަމަސް ހިމެނިގެންދަނީ، އަބަދުވެސް އާންމު ކާބޯ ތަކެއްޗަށް ކުރަންޖެހޭ ހޭދަތައްވެސް އެހެނިހެން މަސްތަކާއި ޚިލާފަށް އިތުރުވެގެންދާ މޫސުމަކަށްވެސް މެއެވެ. އޭގެ އެންމެ ބޮޑު އެއް ސަބަބަކަށް ވެގެންދަނީ، ގިނަ ބަޔަކު ކެއިން ބުއިމުގެ އެންމެހާ ކަމެއް ރޯދަމަހުގައި ގޭތެރެއިން ހަމަޖައްސަމުން ދިއުމާއެކު ގެވެހި ދިރިއުޅުމަށް އަންނަ ބޮޑެތި ބަދަލުތަކެވެ.

އޭގެ ނަތީޖާއެއްގެ ގޮތުން ހުރިހާ ރޯދަ މަހެއްގައިވެސް، އާންމު ކާބޯ ތަކެއްޗާއި ގުޅުންހުރި ބާވްތަތަކުގެ ޑިމާންޑު ބޮޑުވެ، އަގުތައް ނިސްބަތުން އުފުލިގެން ދެއެވެ. އަދި އަގުތައް ބޮޑުވިޔަ ނުދީ، އެއް މިންގަޑެއްގައި ހިފެހެއްޓުމަށް ދައުލަތުގެ ބައެއް ކުންފުނިތަކުން ކުރާ މަސައްކަތްތަކާއެކުވެސް، އަގުތައް އޮންނަނީ އަތް ފޯރާ ފަށަށްވުރެ މަތިވެގެން ގޮސްފައިކަންވެސް މިފުރުސަތުގައި ފާހަގަ ކޮށްލާން ޖެހެއެވެ.

އަދި މީގެ އިތުރަށް، "ޑިމާންޑް އެންޑް ސަޕްލައި"އަށް އަންނަ ބަދަލުތަކާއެކު އޭގެ ޒާތުގައި ވިޔަފާރީގެ އުސޫލުން އަންނަ ބަދަލުތަކުގެ އިތުރުން، ޚާއްސަކޮށް ރޯދަމަހާއި ދިމާކޮށް މުދަލުގެ އަގު އުފުލައިގެން ވިޔަފާރީގެ ނާޖާއިޒު ނަފާ ހޯދުމަކީވެސް ރާއްޖޭގައި ބައެއް ވިޔަފާރި ވެރިންގެ ވަރަށް ބޮޑު އާދައެކެވެ. އަދި އާންމު ގިނަ ރައްޔިތުންގެ ވަރަށް ބޮޑު ޝަކުވާއެއްވެސް މެއެވެ.

އެހެންކަމުން ބާރުބޮޑުވެ، ޑިމާންޑަށް ބޮޑު ބަދަލެއް އަންނަ ރޯދަމަހާއި ދިމާކޮށް، އަގުތަކަށް އަންނާނޭކަމަށް ލަފާކުރޭ ބޮޑެތި ބަދަލުތައް އެއް މިންގަޑެއްގައި ހިފެއްޓުމަށް އަބަދުވެސް ސަރުކާރުންވެސް ދުރާލާ ފިޔަވަޅު އަޅުއްވަމުން ގެންދެވިނަމަވެސް، މިއީ ހަމަ ކޮންމެ ރޯދަމަހަކާއި ކުރިމަތިލާއިރުވެސް، އާންމު ރައްޔިތުން އުފުލަން ޖެހިފައި އޮންނަ ވަރަށް ބޮޑު ބުރަޔަކަށް ވާއިރު، ތަކެތީގެ އަގު އުފުލިގެން ދިއުމުގެ މައްސަލަ މިއަހަރު ވަކީން ބޮޑަށް ގޯސްވެގެން ހިގައިދާނޭކަމުގެ ބިރު މިހާރުވެސް އާންމު ރައްޔިތުންގެ މެދުގައި އޮތް ކަމުގައި ދަންނަވާން ޖެހެއެވެ.

މި ފަހަރުގެ ރޯދަމަސް ތަފާތު ވެދާނެ!

މިއަހަރުގެ ރޯދަމަހާއި ރައްޔިތުން ބައްދަލު ކުރާއިރު، އެތައްގޮތަކުން ހާލަތު މިއޮތީ ބަދަލުވެފައެވެ. 2 އަހަރެއްހާ ދުވަސް ވަންދެން މުޅި ދުނިޔެ ކޯވިޑްގެ އާލަމީ ވަބާއާއި ހަގުރާމަ ކޮށްކޮށް، ވަރުބަލިވެ، އިގްތިސާދުތައް އިދަޖެހިގެންދިޔަ ދިއުމުން ގިނަ ގައުމުތަކަށް އަދިވެސް އަރައިގަނެވިފައެއް ނުވެއެވެ.

ކޯވިޑުން ސަލާމަތްވުމަށް ދުނިޔޭގެ ގައުމުތަކުގެ ބޯޑަރުތައް ބަންދު ކުރުމަށްފަހު، މިހާރު އަލުން ގިނަ ގައުމުތަކުން ބޯޑަރުތައް ހުޅުވާލާފައިވި ނަމަވެސް، ދަތުރުފަތުރުގެ މުޅި އިންޑަސްޓްރީ އަދިވެސް އޭގެ އަސްލަށް ރުޖޫޢަވެފައެއް ނުވެއެވެ. ކޮންޓެއިނަރުތަކުގައި އެއްގައުމުން އަނެއް ގައުމަށް މުދާ އުފުމުގެ އަގުތަކައް އައި ބޮޑު ބަދަލަށް އަދިވެސް އެކަށީގެންވާ ހައްލެއް އައިސްފައެއް ނުވެއެވެ. މީގެ އެންމެ ބޮޑު އެއް ސަބަބަކަށް ވެގެން ގޮސްފައިވަނީ، ކޮންޓެއިނަރުތައް ލިބުމުގައި ހުރި ދަތިތަކެވެ.

ޗައިނާ ފަދަ ބޮޑެތި ގައުމުތަކުގެ ބޮޑެތި ކުންފުނިތަކުން، މިވިޔަފާރީގެ ޑިމާންޑަށް އަންނަމުންދާ ބަދަލުތަކަށް ބަލާ، އޭގެ ފައިދާ ނެގުމަށްޓަކާ، އޭޝިޔާ ސަރަހައްދުގެ ގައުމުތަކަށާއި އަދި ދުނިޔޭގެ އެހެން ގައުމުތަކަށްވެސް އަގުބޮޑުކޮށް ކޮންޓެއިނަރުތައް ވިއްކުމުގެ ބޭނުމުގައި، މުދާ އުފުލުމަށް ބޭނުންކުރާ ކޮންޓެއިނަރުތައް ދިގު މުއްދަތަކަށް ގަނެ، އަގުބޮޑުކޮށް ކޮންޓެއިނަރތައް ވިއްކަމުން ދިއުމުގެ ނަތީޖާއެއްގެ ގޮތުން މުޅި ދުނިޔޭގެ ޝިޕިންގެ އަގުތަށް އުފުލިގެން ދިޔައީއެވެ.

ހަމަ އެއާއެކު، ކޯވިޑްގެ އާލަމީ ވަބާއިން އަރައިގެނެވޭކަމުގެ އުފާވެރި އިހުސާސްތައް ކުރެވެން ފެށިތަނާ ކަހަލަގޮތަކަށް ދުނިޔެ މިއޮތީ އެހާމެ ބިރުވެރި ހާލަތަކާއި ކުރިމަތި ލާފައެވެ. އެއީ މިހާރު ހިގަމުންދާ ރަޝިއާ ޔޫކުރެއިން ހަގުރާމައެވެ. މި ހަގުރާމަ ހުއްޓުމެއްނެތި ހިގަމުންދާތާ އެއް މަސްދުވަސް ފާއިތުވެގެން ގޮސްފައިވާއިރު، މުޅި ޔޫރަޕް ބައްރަށް ހަގުރާމަ ފުޅާވެގެން ހިގައިދާނެކަމުގެ ބިރު މިހާރުވެސް ވަނީ ހީވެގެން ގޮސްފައެވެ.

އަދި އޭގެ ނަތީޖާއެއްގެ ގޮތުން ދުނިޔޭގެ ސްޓޮކް މާރކެޓަށް އަންނަމުންދާ ނުރަގަޅު ބަދަލުތަކުގެ އިތުރުން، މި ހަނގުރާމައިގެ އަސަރުވަނީ ވަރަށްވެސް ބޮޑަށް ދުނިޔޭގެ ތެލުގެ ބާޒާރަށްވެސް ކޮށްފައެވެ.

މިއަހަރު ފެށިގެން އައިއިރު، ދުނިޔޭގެ ބާޒާރުގައި ތެޔޮ ފިފާއެއްގެ އަގު ހުރެފައިވަނީ 75 އެމެރިކާ ޑޮލަރުގައެވެ. އަދި މިއަހަރު ތެރޭގައި ތެލުގެ އަގު މަތިވެގެންވެސް އެވުރެޖު ގޮތެއްގައި ހުންނާނީ 80 ވަރަކަށް އެމެރިކާ ޑޮލަރުގައި ކަމަށް އިގްތިސާދީ ތަޖުރިބާކާރުން ލަފާ ކޮށްފައިވި ނަމަވެސް، ރަޝިއާ ޔޫކުރެއިން ހަގުރާމައިގެ ވިލާގަޑު ބޯމަތިވެ، ދުނިޔޭގެ ތެލުގެ ބާޒާރަށް ނޭދެވޭ އަސަރުކޮށް، މި ހަގުރާމެ ފެށުނު ދުވަހާއި ހަމައަށް ތެޔޮ ފިފާއެއްގެ އަގުވަނީ 92 ޑޮލަރަށް އަރާފައެވެ.

އަދި، ގެއްލުން ބޮޑު މި ހަގުރާމައަށް މިއަދަށް 1 މަސް ފާއިތުވެގެން ގޮސްފައިވާއިރު، ދުނިޔޭގެ ބާޒާރުގައި ތެޔޮ ފީފާއެއްގެ އަގު މިވަނީ މިހާރު 116 އެމެރިކާ ޑޮލަރަށް އަރާފައެވެ. އެހެންކަމުން، ދުނިޔޭގެ ތެލުގެ ބާޒާރަށް މިއަންނަ ނުރަގަޅު ބަދަލުގެ އަސަަރު، ކަނޑުމަގުންނާއި ވައިގެ މަގުން ކުރާ ދަތުރުތަކަށް ކޮށް، އޭގެ ނަތީޖާއެއްގެ ގޮތުން ތަކެތީގެ އަގު އެހެން ރޯދަމަސްތަކާއި ޚިލާފަށް އުފުލިގެން ދިއުމަކީ ވަރަށްވެސް ގާތުގައި އޮތް ކަމެކެވެ. އަދި ފާއިތުވެދިޔަ ދޮޅު މަހެއްހާ ދުވަހުގެ ތެރޭގައި، އެސްޓީއޯއިން ވިއްކަމުންދާ ތެލުގެ އަގު 3 ފަހަރަށް ބޮޑުކުރަން ޖެހުނު ޖެހުމަކީ މީގެ އަލިގަދަ ހެއްކެއް ކަމުގައި ފުދެއެވެ. އަދި ވަކީން ޚާއްސަކޮށް ޔޫރަޕުން އެތެރެކުރާ މުދަލުގެ އަގު މިހާރުވެސް އުފުލިގެން ގޮސްފައިވާކަން މުފުރުސަތުގައި ފާހަގަ ކޮށްލާން ޖެހެއެވެ.

ޚަރަދު ކޮޑަށް، ރޯދަމަހަށް ތައްޔާރުވުން ވަރަށް މުހިންމު!

ކޮންމެ ރޯދަ މަހަކާ ދިމާކޮށްވެސް، އާންމުކޮށް ބޭނުންކުރާ ތަކެތީގެ އަގު އުފުލުމަކީ އާންމު ކަމެކެވެ. މީގެ ތެރޭގައި ޚާއްސަކޮށް ރޯދަމަހަށް ބޭނުންވާ، ކަރާ، ކުރުނބާ އަދި މިރުސް ފަދަ ތަކެތި މާލެ ގެންނަނީ ރާއްޖޭގެ ރަށްތަކުން ކަމުގައި ވި ނަމަވެސް، ރޯދަ މަހު ބޭނުންވާ ވަރަށް އެތަކެތި ސަޕްލައި ނުކުރެވުމަކީވެސް ތަކެތީގެ އަގު އުފުލިގެން ދިއުމަށް މެދުވެރިވާ ސަބަބުތަކުގެ ތެރޭގައި ހިމެނޭ ކަންކަމެވެ.

ހަމައެއާއެކު، ރޯދަމަހަށް ޚާއްސަކޮށް، އާންމު ފިހާރަތަކާއި މާލޭގެ މާރުކޭޓުގައި ތަކެތީގެ އަގު އުފުލިގެން ދިޔަނުދިނުމަށް ސަރުކާރުންވެސް ދުރާލާ ފިޔަވަޅުތައް އަޅުއްވައެވެ. އެސްޓީއޯ މެދުވެރިކޮށް، ފިޔާ، ބިސްފަދަ އާންމުކޮށް ބޭނުންވާ ތަކެތި އެތެރެކުރުން އިތުރުކުރެއެވެ. ހަމަ އެބީދައިން އާންމު ބައެއް ވިޔަފާރިވެރިންވެސް މިއުސޫލުން ސަޕްލައި އިތުރު ކުރުމަށް މަސައްކަތް ކުރެއެވެ.

އެހެންނަމަވެސް ބައެއް ހާލަތްތަކުގައި، މުދާ މާލެ ގެނެވޭއިރު، މިފަދަ ބައެއް ތަކެތި ހަލާކުވެ، އުކާލަން ޖެހުމާއި، އަދި ވިޔަފާރި ބަނދަރުގައި މުދާ ތާށިވުން ފަދަ ކަންކަމަކީވެސް މުދަލުގެ އަގަށް ނޭދެވޭ އަސަރު ކުރުވާ ކަންކަމެވެ.