އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ އިމްތިޔާޒު ފަހުމީގެ ޓީމުގައި، މިމަޤާމަށް ވާދަކުރާ ފައްޔާޟުގެ ޓީމަށް ތުހުމަތުގެ އިނގިލި ދިއްކުރެވޭ ވަރުގެ ހަމަ އެކަކުވެސް އިންތިގެ ޓީމުގައި ނުހުންނާނެކަމަށް އާރުޑީސީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) ފާޑުވިދާޅުވެއްޖެއެވެ.
އެމްޑީޕީގެ ޗެއާޕާސަންގެ އިންތިޚާބުގެ ކެމްޕެއިންގެ ވާދަވެރިކަން ބޮޑުވެ ދެޓީމުން ދަނީ ބަހުގެ ހޫނު ހަމަލާތައް ބަދަލު ކުރަމުންނެވެ. އިންތިގެ ޓީމުން ދަނީ މިނިސްޓަރ ފައްޔާޟަށް ބޮޑެތި ތުހުމަތުތަކެއް ކުރަމުންނެވެ. އެގޮތުން ވައްކަމާއި، ނުފޫޒާއި، ބާރުގެ ބޭނުން އިންތިހާއަށް ކުރަމުންދާކަމުގެ ތުހުމަތު ދަނީ ކުރަމުންނެވެ.
އިންތިގެ ޓީމުން ކުރަމުންދާ ތުހުމަތުތަކަށް ރައްދު ދެއްވަމުން މޫކޭ ވިދާޅުވީ، ވާދަވެރި ކެމްޕެއިނެއްގައި ވާދަކުރުމަކީ މީހެ އަބުރު ކަތިލައި، ޒާތަށް އަރައިގަންނަންޖެހޭ ކަމެއް ނޫންކަމަށެވެ. ސިޔާސީ ގޮތުން ކާމިޔާބު ހޯދުމަށް ކުރެވޭ މަސައްކަތުގައި ދެވޭ ރައްދުތައް ހަޖަމް ކުރުމުގެ ގާބިލްކަން ނެތުމަކީ ހިތްވަރު ނެތުންކަމަށް އޭނާ ވިދާޅުވިއެވެ. އަދި އިންތިގެ ޓީމުން ކުރަމުންދާ ތުހުތުތަކީ އެއްވެސް ތާކުން ތާކުނުޖެހޭ ތުހުމަތުތަކެއްކަމަށް މޫކޭ ވިދާޅުވިއެވެ.
ވާދަވެރި ކެނޑިޑޭޓާއި، ކެމްޕެއިން ޓީމުން ފެށުނީއްސުރެއް ބޮޑެތި ދޮގު ތުހުމަތުތައް އަޅުވަމުންދާއިރު، އެއަށް ރައްދު ދިނުން ހަޖަމް ކުރުމުގެ ހިތްވަރު ނެތުމަކީ ލަދުވެތި ކަމެއް. އަޅުގަނޑުމެންނަށް އިގިލި ދިއްކުރެވޭ ވަރުގެ ތާހިރު ހަމަ އެކަކުވެސް ތިޔަ ސަފަކު ނުހުންނާނެ.
– މޫކޭ ވިދާޅުވިއެވެ.
ވާދަވެރިކަން ބޮޑުވެ ފައްޔާޟަށް ކިޔަމުްދާ ފާޑުކިޔުންތަކަށް އެންމެ ފަހުން ބޭއްވި އެމްޑީޕީގެ ޤައުމީ މަޖިލީހުގައިވެސް ފައްޔާޟު ވަނީ ރައްދު ދެއްވާފައެވެ. ފައްޔާޟު ވިދާޅުވީ މިއިންތިޚާބުގައި އޭނާ ވާދަކުރަނީ ވަރަށް ގިނަ ކަންތައްތަކެއް އެމްޑީޕީ ތެރެއިން އިސްލާހު ކުރުމަށް ކަމަށެވެ. އެމްޑީޕީއަކީ ހަމައެކަނި ވަކި ބަޔަކު ކުރި ކަމެއްކަމަށްބުނެ ވާހަކަ ދެއްކުމުގެ ހައްގެއް އެއްވެސް ބަޔަކަށް ނޯންނާނެކަމަށް ފައްޔާޟު ވިދާޅުވިއެވެ.
ފައްޔާޒު ވިދާޅުވީ އޭނާއާ ޓީމު އޮތީ ސަރުކާރާއެކު ގަދަކޮށް ކަމަށެވެ. އަދި އޭނާއަށް ނިސްބަތްކޮށް ނުފޫޒު ފޯރުވަނީ ކަމަށާ އެއީ "ބްރޯ" ކަމަށް ލޭބަލް ކުރެވިދާނެ ކަމަށެވެ. ނަމަވެސް "އަސްލު ބްރޯ" އަކީ ކާކުކަން ރައްޔިތުންނަށް މިއަދު އެނގޭ ކަމަށް ވިދާޅުވިއެވެ.
