ރަޝިއާއިން ޔޫކުރެއިންގެ ކްރައިމިއާ ސަރަހައްދު އެގައުމުގެ ބާރުގެދަށަށް އައިތާ 8 އަހަރުފުރުން ފާހަގަ ކުރުމުގެ ގޮތުން، އެތައްހާސް ބަޔަކު މޮސްކޯގެ ލުނިކީ ސްޓޭޑިއަމަށް އެއްވެ، ޕުޓިން ޔޫކުރެއިންގައި މިހާރު ކުރަމުންދާ ހަގުރާމައަށް އޮތް ތާޢީދު ދައްކާލައިފިއެވެ.
ރަޝިއާއިން އެގައުމުގެ ބާރުގެދަށަށް ޔޫކުރެއިންގެ ކްރައިމިއާ ސަރަހައްދު ގެނެސްފައިވަނީ 2014ވަނަ އަހަރުއެވެ. އަދި މުނާސަބާ ފާހަގަ ކުރުމުގެ ގޮތުން، މޮސްކޯގެ ލުނިކީ ސްޓޭޑިއަމަށް އެއްވެ ތިބި އެތައް ހާސްބަޔަކު ރަޝިއާގެ ދިދަތައް ހޫރުވަމުން ދިޔައިރު، ޕުޓިންވަނީ މި ފަރާތްތަކާއި މުޚާތަބްކޮށް ވާޖަކަ ދައްކަވާފައެވެ.
ރަޝިއާއިން ކްރައިމިއާ ހިފި ހިފުމަކީ، އެގައުމުގެ ސްކޫލްތަކުގައި، ޙާއްސަ ފިލާވަޅެއްގެ ގޮތުގައި މިހާރު ކިޔަވާދެމުންދާ ކަމެކެވެ.
މޮސްކޯގެ ލުނިކީ ސްޓޭޑިއަމަށް އެއްވި އެތައްހާސް މީހުންގެ ތެރޭގައި، ރަޝިއާގެ މުވައްސަސާތަކުގައި މަސައްކަތް ކުރަމުންދާ މުވައްޒިފުންވެސް ހިމެނެއެވެ. ގިނަ މީޑިއާތަކުން ރިޕޯޓު ކޮށްފައިވާ ގޮތުގައި މި އެއްވުމަށް ހާޒިރުވުމަށް ހުރިހާ މުވައްސަސާތަކުގެ މުވައްޒަފުންނަށް ވަނީ އަންގާފައެވެ. އަދި "ކްރައިމިއާ ސްޕްރިންގ"ގެ ނަމުގައި ޓީޗަރުންވަނީ ޚާއްސަ ފިލާވަޅުތަކެއް ސްކޫލްތަކުގައި ނަގާދީފައެވެ.
ރަޝިއާއިން މިހާރު ޔޫކުރެއިންގައި ކުރަމުންދާ ހަނގުރާމާގައި އެގައުމުގެ ދެކުނުގެ އައްސޭރީގެ ޓައުންތަކާއި ސިޓީތައް ހިފުމަށް ބޭނުން ކޮށްފައިވަނީ ކްރައިމިއާގައި ގާއިމްކޮށްގައިވާ ރަޝިއާގެ ބޭސްތަކެވެ.
ކްރައިމިއާ އެގައުމުގެ ބާރުގެ ދަށަށް ގެނައުމުގެ މުނާސަބާއަކީ، ރައްޔިތުންގެ ހިތްތަކުގައި ގައުމަށް އޮތް ލޯބި ދައްކުވައިދިނުމަށް ކޮންމެ އަހަަރަކުވެސް ޕުޓިން ފާހަގަކުރަމުންދާ މުނާސަބާއެކެވެ.
ރަޝިއާގެ އޮފިޝަލުން ހާމަ ކޮށްފައިވާ ގޮތުގައި، މޮސްކޯގެ ލުނިކީ ސްޓޭޑިއަމްގައި ބޭއްވުނު މިއިވެންޓަށް 200،000 މީހުން ޖަމާވެފައި ވެއެވެ. މިއަދަދުގެ ސައްޙަކަން ކަށަވަރު ކުރެވިފައި ނުވާއިރު، މި ސްޓޭޑިއަމްގެ ކެޕޭސިޓިއަކީ 81،000 މީހުންނެވެ. އެހެންނަމަވެސް މި އިވެންޓުގައި ބައިވެރިވުމަށް ސްޓޭޑިއަމްގެ ބޭރުގައިވެސް އެތައް ބަޔަލު ތިބިމަކަށް މީޑިއާތަކުންވަނީ ރިޕޯޓު ކޮށްފައެވެ.
މި އެއްވުމުގައި ވާހަކަދައްކަވަމުން ޕުޓިން ވަނީ އެގައުމުގެ އަސްކަރިއްޔާއަށް ތައުރީފްކޮށް ވާހަކަ ދައްކަވާފައެވެ. "ގައުމަށް ބޭނުންވާ ވަގުތުތަކުގެ އެމީހުން އެދަނީ، ވަޒަންތަކާއި ހަމަލާތަކުން އެކަކު އަނެކަކަށް ރައްކާތެރިކަން ފޯރުކޮށްދީ، އެއްބަޑު އެއްބަފާކަމުގެ ގުޅުން ދައްކުވައިދެމުން،" މި އެއްވުމުގައި ވާހަކަ ދައްކަވަމުން ޕުޓިން ވިދާޅުވެފައި ވެއެވެ.
އަދި މި އެއްވުމުގައި ވާހަކަ ދައްކަވަމުން، ރަޝިއާ ސިފައިންގެ މަގުސަދަކީ، ޔޫކުރެއިންގެ އިރުމަތީ ސަރަހައްދުގައި ދިރިއުޅެމުންދާ ރައްޔިތުންނާ ދެކޮޅަށް ހިންގަމުންދާ ގަތުލުއާންމު ތަކުން އެ ރައްޔިތުން ސަލާމަތްކުރުމަށް ކަމަށް އޭނާ ވިދާޅުވާ ވިދާޅުވުން ޕުޓިންވަނީ ތަކުރާރު ކުރައްވާފައެވެ. މި އިވެންޓުގައި ރަޝިއާގެ ހުރިހާ ޓީވީއަކުން ޕުޓިން ވާހަކަ ލައިވްކޮށް ދައްކަމުން ދަނިކޮށް ކުއްލިއަކަށް ވަނީ، ލަވަކިޔުންތެރިއާ އޮލެގް ގަަޒްމަނޯވްގެ ލައަކަށް މަންޒަރުތައް ބަދަލު ކޮށްފައެވެ. ފަހުން ކްރެމްލިންއިން ބުނެފައިވަނީ މިއީ ޓެކްނިކަލް މައްސަލައަކުން ސަބަބު ކުރިމަތިވި ކަމެއް ކަމުގައެވެ.
މި އިވެންޓަށް، ރަޝިއާގެ ކުންފުނިތަކާއި އަދި މުވައްސަސާތަކުގެ މުވައްޒަފުން ހާޒިރުވުމަށް މަޖުބޫރު ކޮށްފައި ވާކަމަށް މީޑިއާތަކުން ވަނީ ރިޕޯޓު ކޮށްފައެވެ.
