ވެރިކަން ކުރާ މައި ޕާޓީ އެމްޑީޕީގެ ރައީސް މުހައްމަދު ނަޝީދު އެޕާޓީން ބާކީކޮށް، ބޭރުކޮށްލަން ޖާގަ ނުދޭނެކަމަށް އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ އިމްތިޔާޒު ފަހުމީ ވިދާޅުވެއްޖެއެވެ.

ހުވަދު އަތޮޅުގެ ރަށްތަކުގައި އިންތިގެ ޓީމުން ކުރަމުންދާ ކެމްޕެއިންފައި މިއަދު ހަވީރު ގއ.ދެއްވަދޫއަށް ވަޑައިގެން ދެއްވަދޫ އެމްޑީޕީ މެމްބަރުންނާއި ބައްދަލުކުރައްވައި ވާހަކަ ދައްކަވަމުން އިންތި ވިދާޅުވީ އެމްޑީޕީ ދެފަޅިކޮށްލަން ނުވަތަ ކަފިކަފި ކޮށްލަން ބަޔަކު މަސައްކަތް ކުރާތަން ފެންނަ ކަމުގައެވެ. މިފުރުސަތު ދީފިކަމަށް ވަނީނަމަ، އެމްޑީޕީއަށް ޤުރުބާން ވީ ބޭފުޅުންގެ މަސައްކަތް އަނެއްކާ އެދިޔައީ ފަހަތަށް ކަމުގައި އިންތި ވިދާޅުވިއެވެ.

އިންތި ވިދާޅުވީ މިހާރު ކުރެވޭ މަސައްކަތަކީ ވަރަށް ރޭވިގެން އެމްޑީޕީން ރައީސް ނަޝީދު އެއްފަރާތްކޮށް، ބޭރުކޮށްލުމަށް ކުރެވޭ މަސައްކަތެއް ކަމަށެވެ. ނަމަވެސް އެކަމަށް ޖާގަ ނުދޭނެކަމަށް އިންތި ވިދާޅުވިއެވެ.

މިޕާޓީގެ ރައީސް، ރައީސް މުހައްމަދު ނަޝީދު ބޭރުކޮށްލަން ނުވަތަ ބާކީކޮށްލަން އަަޅުގަނޑުމެން ޖާގައެއް ނުދޭނަން. މީވަރަށް މުހިންމު ވަރަށް ނާޒުކު ވަގުތު ކޮޅެއް، ހުރިހާ ބޭފުޅުން މިކެމްޕެއިންގެ ބައިވެރިވެވަޑައިގެން މަސައްކަތް ކޮށްދެއްވުމަކީ، ވަރަށް ބޮޑަށް މިޕާޓީ އައިގެން ކުރިޔަށް ދިއުމަށް ބޭނުން ވާކަމެއް.

– އިންތި ވިދާޅުވިއެވެ.

އިންތި ވިދާޅުވީ މިއަދު އިންތިހާބު ބޭވިޔަސް، މާދަމާ ބޭއްވިޔަސް ނުވަތަ އަނެއް ދުވަހު ބޭއްވިޔަސް މިއިންތިޚާބު ކާމިޔާބު ކުރާނެކަމަށެވެ. އެމްޑީޕީގެ އުސޫލުތަކާއި އަސާސް ތަކަކީ ވަރަށް އަގުހުރި އެއްޗެއް ކަމަށާއި، މި އަސާސުތަކުން ދުރަށް ދިޔައީމާ ވާގޮތް މިހާރު ފެންނަމުންދާކަމަށް އިންތި ވިދާޅުވިއެވެ. އިންތި ވިދާޅުވީ އެނާ އެންމެ އިސްކަމަކަށް ދޭނީ އެމްޑީޕީ އެއްގަލަކަށް އަރުވާ، އެކަތިގަނޑަކަށް ހަދާ، އުސޫލުތަކާއި އަސާސްތަކާއި ފަލްސަފުހާތަކަށް ދިރުން ގެނައިސް ދިނުމަށް ކަމުގައެވެ.

ޗެއާޕާސަން އިންތިޚާބުގައި މިނިސްޓަރ ފައްޔާޟާއި، އިންތި ވާދަކުރި ނަމަވެސް މިއީ ރައީސް ނަޝީދާއި، ރައީސް ޞާލިހުގެ މެދުގައި ކުރިއަށްދާ އިންތިޚާބެއްގެ ގޮތުގައި ގިނަ ބަޔަކު ދެކެއެވެ. އަދި މިއީ އެމްޑީޕީން އަންނަ އަހަރު ނެރޭނެ ރިޔާސީ ކެނޑިޑޭޓަކު ކަނޑައެޅުމުގައިވެސް ވަރަށް މުހިންމު އިންތިޚާބަކަށް ވެގެންދާނެކަމަށް ގިނަ ބަޔަކު ދެކެއެވެ.