ޔޫއޭފާ ޗެންޕިއަންސް ލީގުގެ ކުއާޓާފައިނަލުގައި މުބާރާތުގެ އެންމެ ކާމިޔާބު ޓީމުކަމަށްވާ ރެއާލް މެޑުރިޑާއި މުބާރާތް އެންމެފަހުން ކާމިޔާބުކުރި ޗެލްސީ ކުޅެން ޖެހިއްޖެއެވެ.
މިދިޔަ ސީސަނުގައި ޗެންޕިއަންސް ލީގުގެ ސެމީފައިނުލުގައި ފުރަތަމަ ކުޅުނު މެޗު 1-1ން އެއްވަރުވި ނަމަވެސް ފަހު މެޗުގައި ޗެލްސީންވަނީ 2-0ން ރެއާލް ބަލިކޮށްފައެވެ. އެ ފަހަރު ޗެލްސީ މުބާރާތް ކާމިޔާބުކުރީ 1-0ން މެންޗެސްޓަރ ސިޓީ ބަލިކުރުމަށްފަހުއެވެ.
ފުރަތަމަ ފަހަރަށް ޗެންޕިއަންސް ލީގު ކާމިޔާބުކުރުމަށް މަސައްކަތްކުރާ ސިޓީ ކުއާޓާފައިނަލުގައި ނުކުންނާނީ އެތުލެތިކޯ މެޑުރިޑާ ދެކޮޅަށެވެ. ކުއާޓާފައިނަލުން އެތުލެތިކޯ ޖާގަ ހޯދީ މެންޗެސްޓަރ ޔުނައިޓަޑު ކަޓުވާލުމަށްފަހުއެވެ. އެހެންކަމުން އަނެއްކާވެސް އެތުލެތިކޯއަށްވަނީ މެންޗެސްޓާގެ ޓީމަކާ ދެކޮޅަށް ކުޅެ އެފަދަ ނަތީޖާއެއް ނެރެން ޖެހިފައެވެ.
ޗެންޕިއަންސް ލީގުގެ ކުއާޓާފައިނަލުން ދެން ޖާގަ ހޯދާފައިވާ އިނގިރޭސިވިލާތުގެ ޓީމުކަމަށްވާ ލިވަޕޫލުން ނުކުންނާނީ ބެންފީކާއާ ދެކޮޅަށްށެވެ. އަދި ޖަރުމަންވިލާތުގެ އެންމެ ވަރުގަދަ ޓީމުކަމަށްވާ ބަޔާން މިޔުނިކަށް ލައްވާލާފައިވަނީ އެންމެފަހުގެ ޔޫރޮޕާ ލީގުގެ ޗެންޕިއަނުންކަމަށްވާ ވިލަރެޔާލެވެ.
ޗެންޕިއަންސް ލީގުގެ ސެމީފައިނަލުގައި ކުޅެން ހަމަޖެހިފައިވަނީ ރެއާލާއި ޗެލްސީގެ ތެރެއިން ކުރި ހޯދާ ޓީމާއި ސިޓީއާއި އެތުލެތިކޯގެ ތެރެއިން ކުރި ހޯދާ ޓީމެވެ. އަދި ސެމީފައިނަލުގެ އަނެއް މެޗުގައި ކުޅޭނީ ލިވަޕޫލާއި ބެންފީކާގެ ތެރެއިން ކުރި ހޯދާ ޓީމާއި ބަޔާނާއި ވިލަރެލުގެ ތެރެއިން ކުރި ހޯދާ ޓީމެވެ.
ޗެންޕިއަންސް ލީގުގެ ކުއާޓާފައިނަލުގެ މެޗުތައް ކުޅެން ފެށުމަށް ހަމަޖެހިފައިވަނީ އޭޕުރީލް މަހުގެ 5ވަނަ ދުވަހުއެވެ. އަދި ސެމީފައިނަލުގެ މެޗުތައް ފެށުމަށް ހަމަޖެހިފައިވަނީ އޭޕުރީލް މަހުގެ 26ވަނަ ދުވަހުއެވެ. މުބާރާތުގެ ފައިނަލް ކުޅުމަށް ހަމަޖެހިފައިވަނީ މޭއި މަހުގެ 28ވަނަ ދުވަހު ފަރަންސޭސިވިލާތުގެ ވެރިރަށް ޕެރިހުގައެވެ.
