މިއަދަކީ ބޮލީވުޑްގެ ޒުވާން އެކްޓަރ އާލިއާ ބަޓަށް 29 އަހަރު ފުރުނު ދުވަހެވެ. އާލިއާގެ އުފަންދުވަހާއި ދިމާކޮށް އޭނާގެ ކުރިއަށް އޮތް ފިލްމު "ބްރަމަސްތުރަ" ރިލީޒްކުރާނެ ތާރީހާއެކު ފިލްމުގެ ފަސްޓްލުކް ވަނީ އާންމުކޮށްފައެވެ.
މިއަދު ސޯޝަލް މީޑިއާއަށް ދޫކޮށްލި މި ފިލްމުގެ ފުރަތަމަ މޯޝަން ޕޯސްޓަރާއެކު ފިލްމު ބެލުންތެރިންނާ ހަމައަށް އަންނާނެ ތާރީހު މިވަނީ ޕްރޮޑަކްޝަން ޓީމުގެ ފަރާތުން ރަސްމީކޮށް ހާމަކޮށްފައެވެ. އެގޮތުން ފިލްމު އަޅުވަން ނިންމާފައި ވަނީ މިއަހަރުގެ ސެޕްޓެމްބަރު މަހުގެ 9 ވަނަ ދުވަހުއެވެ.
ފިލްމުގެ ލީޑުތަރިންގެތެރެއިން ރަންބީރް ކަޕޫރާއި އާލިއާގެ އަޑުން ނެރޭޓްކޮށްފައިވާ މޯޝަން ޕޯސްޓަރުގައި ފިލްމުގެ ތަރިންގެ ތެރެއިން ހަމައެކަނި ފެނިގެން ދަނީ ރަންބީރެވެ.
View this post on Instagram
މި ފިލްމު އުފެއްދުމުގެ މަސައްކަތް ޑައިރެކްޓަރު އަޔާން މުކަރުޖީ ކުރަމުން އަންނަތާ 4 އަހަރު މިވަނީ ވެފައެވެ. ފިލްމުގެ މަސައްކަތް ލަސްވަމުން ގޮސްފައި ވަނީ ކޯވިޑް 19ގެ ސަބަބުންނާއި އެނޫންވެސް އިތުރު ސަބަބުތަކާހުރެއެވެ. 2018 ވަނަ އަހަރު ފެށި މި ފިލްމްގެ ޝޫޓިން ނުނިމި ލަސްވެފައި ވުމުގެ ސަބަބުން ފިލްމްގެ މުހިންމު ރޯލުތައް ކުޅޭ ތަރިންނަށްވެސް ވަނީ ގިނަ އުނދަގޫތަކާ ކުރިމަތިވެފައެވެ.
މި ފިލްމަކީ ދެ ލޯބިވެރިން ކަމުގައިވާ އާލިއާ ބަޓާއި ރަންބީރު ކަޕޫރުގެ އަލަތު ފިލްމެއެވެ. ބޮޑު ކާސްޓެއް ހިމެނޭ މި ފިލްމުގެ މުހިންމު ރޯލުތަކުން އަމީތާބް ބައްޗަން، މޯނީ ރޯއީ، ޑިމްޕަލް ކަޕާޑިއާގެ އިތުރުން ސައުުތުގެ ސުޕަސްޓަރ ނާގައަރުޖުނާ ވެސް ފެނިގެންދާނެއެވެ.
View this post on Instagram
އާންމުކޮށް ބޮލީވުޑް ފިލްމްއެއް ޝޫޓުކުރުމަށް ނަގާ މުއްދަތަަށް ވުރެ ދެގުނަ އިތުރަށް ވަގުތު ނެގި މި ފިލްމުގެ އިންތިޒާރުގައި ރަންބީރާއި އާލިއާގެ ފޭނުން ތިބި އިރު މިއީ މިހާރު ބޮލީވުޑްގެ އެންމެ ލޯބި ކަޕުލްގެ ގޮތުގައި މަޝްހޫރު ވެފައިވާ ޖޯޑެކެވެ. މިދެ މީހުންގެ ލޯބީގެ ގުޅުމުގެ ފެށުން ކަމުގައިވެސްވީ މި ފިލްމެއެވެ.
