ސްކީމު ތަކެއްގެ ގޮތުގައި އެކި ނަންނަމުގައި ފައިސާގެ މުއާމަލާތް ހިންގާ މީހުންގެ ސައްހަކަން ކަށަވަރުކުރުމަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން އިލްތިމާސްކޮށްފިއެވެ.
ސީއެމްޑީއޭއިން ބުނެފައިވަނީ މިހާރަކަށް އައިސް ސޯޝަލް މީޑިއާގެ އެކިއެކި ވަޞީލަތްތައް މެދުވެރިކޮށް އިންވެސްޓްކުރުމަށް ލިބޭ ހުށަހެޅުންތަކާއި ދައުވަތުތަކާމެދު ގޮތެއް ނިންމުމުގެ ކުރިން، އެ ހުށަހެޅުން ހުށަހަޅާފަރާތަކީ ރާއްޖޭގައި ފަންޑާއި ސްކީމްތައް ހިންގުމުގެ ހުއްދަލިބިފައިވާ ނުވަތަ އެފަދަ ފަންޑުތަކަކީ އެ އޮތޯރިޓީގައި ރަޖިސްޓްރީކޮށްފައިވާ ފަރާތެއްތޯ ބެލުމަށްފަހު ނޫނީ އެއްވެސް ފަރާތަކުން އިންވެސްޓުނުކުރުމަށް ނަސޭހަތްތެރިވާކަމަށެވެ.
ސެކިއުރިޓީޒް މުޢާމަލާތްތަކުގައި ޙަރަކާތްތެރިވުމަށް އޮތޯރިޓީން ލައިސަންސްދީފައިވާ ފަރާތްތަކާއި ފަންޑު ހިންގާ ބެލެހެއްޓުމަށްޓަކައި ރަޖިސްޓްރީކޮށްދީފައިވާ ފަންޑުތަކުގެ މަޢުލޫމާތު، އެ އޮތޯރިޓީގެ ވެބްސައިޓުގައިވާ މި ލިންކް އިން -https://cmda.gov.mv/en/public/licensed-or registered-entities/ ލިބެން ހުންނާނެކަމަށް ސީއެމްޑީއޭއިން ވަނީ ބުނެފައެވެ.
ސޯޝަލް މީޑިއާގެ އެކިއެކި ވަޞީލަތްތައް މެދުވެރިކޮށް ލިބޭ ހުށަހެޅުންތަކަކީ ހުއްދަލިބިފައިވާ ސްކީމެއްތޯ ބެއްލެއްވުމަށްފަހު ނޫނީ އެއްވެސް ފަންޑެއްގައި ނުވަތަ އެއްވެސް ސްކީމެއްގައި ބައިވެރިނުވުމަށް ވަނީ އިލްތިމާސްކޮށްފައެވެ.
