މިސަރުކާރުން ވެރިކަމަށް އައުމަށް ވެފައިވާ ވައުދުތައް ނުފުއްދުނު ކަމަށާއި، އެންމެ ރަނގަޅު ގޮތަކީ ރައީސުލްޖުމްހޫރިއްޔާ މަޤާމުން އިސްތިއުފާ ދެއްވުންކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު އަހުމަދު ސަލީމް ވިދާޅުވެއްޖެއެވެ.
ރައީސުލްޖުމްހޫރިއްޔާ މިއަހަރަށް އިއްވި ރިޔަސީ ބަޔާނަށް ޖަވާބު ދެއްވަމުން ސަލީމް ވިދާޅުވީ، ރިޔާސީ ބަޔާނެއްގެ ބަދަލުގައި ސިޔާސީ ބަޔާނެއް ރައީސް އިބްރާހީމް މުޙައްމަދު ޞާލިޙު ދެއްވީ ސަރުކާރުން ވެފައިވާ ވަޢުދުތައް ނުފުއްދައި ހުރުމުގެ ސަބަބުންކަމަށެވެ. މިސަރުކާރުން ވަޢުދުވެ، ނުކުރެވިހުރި ހުރިހާ ކަންކަމެއްގެ ތަފުޞީލު ހާމަކުރުމަކީ އެއްދުވަހަކުން ކުރެވޭނެ ކަމެއް ނޫންކަމަށެވެ. ސަލީމް ވަނީ ސަރުކާރުން ނުފުއްދިހުރި ބައެއް ވައުދުތައް ހަދާން ކޮށްދެއްވާފައެވެ.
– ރާއްޖޭގެ ހުރިހާ މިސްކިތެއް ފުރަތަމަ 100 ދުވަހުގެ ތެރޭގައި އޭސީ ކުރުން، މިހާތަނަށް މި ވަޢުދުގެ ދަށުން އޭސީ ކުރެވުނީ އެންމެ ދެ މިސްކިތް.
– 2019 ވަނަ އަހަރު 20000 ފްލެޓް، 2020ވަނަ އަހަރު 4000 އަށްވުރެ ގިނަ ފްލެޓް، 2021 ވަނަ އަހަރު 5000 ފްލެޓް އަޅުއްވާނެކަމަށް ވިދާޅުވި. ނަމަވެސް މިހާތަނަށް އެންމެ ދިވެހި ރައްޔިތަކަށްވެސް މިސަރުކާރުން ބޯހިޔާވަހިކަމެއް ކަށަވަރުކޮށްދެވިފައެއް ނުވޭ.
– 2021 ވަނަ އަހަރުގެ ރިޔާސީ ބަޔާނުގައި ތިލަމާލެ ބްރިޖުގެ މަޝްރޫއު އެއަހަރުގެ ފުރަތަމަ ހަމަސް ދުވަހުގެ ތެރޭގައި ފަށައިގަންނާނެ ކަމަށް ވިދާޅުވި. ނަމަވެސް ބްރިޖްގެ މަސައްކަތް އެގޮތަކަށް ކުރެވެމުންނެއްނުދޭ. ބްރިޖުގެ މަސައްކަތް ލަސްވާ ސަބަބު ސަރުކާރުން ރައްޔިތުންނަށް ހާމަކޮށްދޭންޖެހޭ.
– އަހަރަކު 1.5 މިލިއަން ފަސިންޖަރުންނަށް ޚިދުމަތް ދެވޭގޮތަށް، އައްޑޫސިޓީ ގަން އިންޓަނޭޝަނަލް އެއާޕޯޓް ތަރައްޤީ ކުރާނެކަމަށް ރައީސް ވިދާޅުވިއިރު، އައްޑޫ ސިޓީގެ ރިޒޯޓްތައް އެވަނީ ބަންދުކޮށްފައި. އެތަންތަން ދަނީ ވީރާނާވަމުން. އެތަންތަން ހުޅުވޭނެ ދުވަހެއް ސަރުކާރަކަށް ބުނެ ނުދެވޭ.
– ހދ. މަކުނުދޫ، ށ. ބިލެއްފަހި އަދި ބ.ތުޅާދޫގެ އިތުރުން ތ. ވިލުފުށީ، އަދި ރ.އަތޮޅުގައި އަޅުއްވަން ވިދާޅުވި އެއަރޕޯޓްގެ މަސައްކަތް ކުރިއަކަށް ނުދޭ. ހއ. ދިއްދު އާއި ރ. މީދޫއާއި ބ. އޭދަފުށީ އަދި ދ. ކުޑަހުވަދޫގައި އަޅަން ސަރުކާރުން ވަޢުދުވި ހޮސްޕިޓަލުގެ އެއްވެސް މަސައްކަތެއް ނުކުރެވޭ.
މިސަރުކާރާމެދު ރައްޔިތުންގެ އިތުބާރު މިވަނީ ގެއްލިފައި، ރައްޔިތުންމިވަނީ މާޔޫސްވެފައި. ކޮރަޕްޝަނަށް ޒީރޯ ޓޮލަރެންސްކަމަށް ވިދާޅުވެ މުޅި ދައުލަތް ކޮރަޕްޝަންގެ ބޮޑު ހާއްޔަކަށްވަނީ ވެފައި. ރައްޔިތުންގެ ދިރިއުޅުމުގެ ހާލަތު އެއްދުވަހުން އަނެއް ދުވަހަށް ދަނީ ދަށަށް. ވަޢުދުވި ތަނަވަސްކަމެއް ރައްޔިތުންގެ ޖީބަށް ނުވަދެ އިތުރަށް ކުރިމަތިވާނީ ނިކަމެތިކަމާއި ހާސްކަން. ވުމާއެކު، މާތްވެގެންވާ އިސްލާމް ދީނާއި ރާއްޖޭގެ މިނިވަންކަމާއި ސިޔާދަތު ރައްކާތެރިކޮށްދެވޭފަދަ އަދި ރާއްޖޭގެ ހުރިހާ ރައްޔިތުން އެދޭފަދަ އައު ސަރުކާރެއް އެކުލަވައިލުމަށްޓަކައި އިބްރާހީމް މުޙައްމަދު ޞާލިޙު ރައީސުލްޖުމްހޫރިއްޔާގެ މަޤާމުން އިސްތިޢުފާ ދެއްވުމަށް ގޮވާލަން!
– ސަލީމް ވިދާޅުވިއެވެ.
ސަލީމް ވިދާޅުވީ ގިރާވަރުފަޅު ހިއްކާ، އެތަން ތިލަމާލެ ބްރިޖުން ގުޅާލުމަކީ އަދި މިހާތަނަށް ޕްލޭން ކުރެވިފައިވާ ކަމެއްނޫން ކަމަށެވެ. އަދި ރައްޔިތުންގެ މަޖިލީހުން ފާސްކޮށްފައިވާ ބަޖެޓްގައިވެސް ހިމެނިފައި ނުވާ އަދި އެހެން ގޮތަކުންވެސް ފައިސާ ހަމަޖެހިފައިވާކަން އެއްވެސް އިދާރާއަކުން ހާމަކޮށްފައިވާ ކަމެއްވެސް ނޫންކަމަށެވެ. ވަޢުދުވާއިރު އެ ވަޢުދުތަކަކީ ފުއްދޭވަރުގެ ވަޢުދުތައް ކަމުގައި ވާންޖެހޭ ކަމަށާއި، ރައްޔިތުންނަށް ސަރުކާރުން ދައްކަމުންދަނީ ހުވަފެންތަކެއް، ރައްޔިތުންނަށް ދޮގުހެދުން ހުއްޓާލުމަށް ސަރުކާރަށް ސަލީމް ވަނީ ގޮވާލާފައެވެ.
