ރިޔާސީ ބަޔާނަކީ އަމާޒެއްނެތް ހުސްވާހަތަކެއް އެކުލެވޭ ސިޔާސީ ބަޔާނެއްކަމުގައި ރައްޔިތުންގެ މަޖިލީހުގެ މައިނޯރިޓީ ލީޑަރު އަހުމަދު ސަލީމް ވިދާޅުވެއްޖެއެވެ.
ޤާނޫނުއަސާސީގެ 84 ވަނަ މާއްދާގައި ބުނަނީ ޤައުމުގެ ޙާލަތު ބަޔާންކޮށްދީ، އަދި ޤައުމުގެ ޙާލަތު އިތުރަށް ރަނގަޅު ކުރުމަށްޓަކައި ކުރަންޖެހޭ ކަންކަމުގެ މައްޗަށް އެކުލެވޭ ރިޔާސީ ބަޔާނެއް ކޮންމެ އަހަރެއްގެ ރައްޔިތުންގެ މަޖިލީހުގެ ފުރަތަމަ ޖަލްސާގައި ރައީސުލްޖުމްހޫރިއްޔާ އިއްވަންޖެހޭކަމަށެވެ.
ރައްޔިތުންގެ މަޖިލީހުގެ ޤަވާއިދުގައި ބުނެފައިވާގޮތުން ކޮންމެ އަހަރަކު ރައީސުލްޖުމްހޫރިއްޔާ ރިޔާސީ ބަޔާން އިއްވެވުމުން މަޖިލީހުގައި ހިމެނޭ ޕާޓީތަކުގެ ތެރެއިން، ރައީސުލްޖުމްހޫރިއްޔާ ނިސްބަތްވާ ޕާޓީ ފިޔަވައި ދެން އެންމެ ގިނައިން މެންބަރުން ތިއްބެވި ޕާޓީތަކުގެ ފަރާތުން އެ ރިޔާސީ ބަޔާނަށް ޖަވާބު ތައްޔާރުކޮށް އެ ޖަވާބު މަޖިލީހުގެ ޖަލްސާއެއްގައި އިއްވަވަންވާނެކަމަށެވެ.
މިހާރު މަޖިލީހުގައި މެންބަރުން ތިއްބެވި ގޮތުން ރިޔާސީ ބަޔާނަށް ޖަވާބު ދެއްވާނީ ޕީޕީއެމްގެ ޕާލިމަންޓްރީ ގްރޫޕްގެ ލީޑަރު، އޭދަފުށި ދާއިރާގެ މެންބަރު އަޙްމަދު ސަލީމެވެ. ސަލީމް ވަނީ މިއަދު ރިޔާސީ ބަޔާނަށް ޖަވާބުދާރީވެފައެވެ. ސަލީމް ވިދާޅުވީ ރައީސްގެ ރިޔާސީ ބަޔާނަކީ ޤައުމުގެ ހާލަތަށް ރިޢާޔަތްކޮށްފައިނުވާ ޚިޔާލީ ވާހަކަތަކެއް އެކުލެވޭ ބަޔާނެއްކަމަށެވެ.
2022 ވަނަ އަހަރު ރައީސުލްޖުމްހޫރިއްޔާ އިބުރާހީމް މުޙައްމަދު ޞާލިޙު އިއްވެވި ބަޔާނުގައި ޤައުމުގެ ޙާލަތު އެކަށީގެންވާގޮތެއްގައި ބަޔާންކޮށް ނުދެއްވާކަން ފާހަގަ ކުރަން. ރިޔާސީ ބަޔާނުގެ ނަމުގައި 2022 ވަނަ އަހަރު ރައީސުލްޖުމްހޫރިއްޔާ ދެއްވީ ސިޔާސީ ބަޔާނެއް. އެ ބަޔާނުގައި ދެއްކެވި ގިނަ ވާހަކަތަކަކީ، ނަތީޖާއެއް ނުނެރެވޭނެ، އެއްވެސް ކަހަލަ ރޭވުންތެރިކަމެއް، ދުރު ރާސްތާގެ އަމާޒެއްނެތި، ދެއްކެވި ހުސް ވާހަކަތަކެއް. ޚިޔާލީ ވާހަކަތަކެއް. މިއީ ޒިންމާދާރުކަން ކުޑަ ކަމެއް.
– ސަލީމްގެ ބަޔާނުގައި ވިދާޅުވިއެވެ.
ސަލީމް ވިދާޅުވީ، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެއްވި ރިޔާސީ އެއްވެސް ބަޔާނެއްގައި، ކީރިތި ޤުރުއާނަށް ހަޖޫޖަހައި، ކީރިތި ރަސޫލާއަށް ފުރައްސާރަކޮށް، އިސްލާމްދީނުގައި ޙުކުމް ކަނޑައެޅިފައިވާ ކަންކަމަށް ގޮންޖަހައި، އެމްޑީއެން އާއި އުތެމައިން ނެރުނު ރިޕޯޓުތައް ކުށްވެރި ކުރައްވާފައެއްނުވާކަމަށެވެ. އެރިޕޯޓްތައް ނެރުނުމީހުން އަދިވެސް ތިބީ ސަރުކާރުގެ ބޮޑެތި މަޤާމުތަކުގައިކަމަށާއި، އެފަރާތްތަކަށް ސަރުކާރުން ދަނީ ޙިމާޔަތް ދެމުންކަމަށެވެ.
މިސްކިތްތަކުގެ ޙުރުމަތް ކެނޑުން ހުއްޓުވާކަށް އަދި މިސްކިތްތަކުގައި ފާހިޝް ޢަމަލުތައް ހިންގުން ހުއްޓުވާކަށް އެއްވެސްފިޔަވަޅެއް ނާޅުއްވާ! މިސްކިތުގެ ޙުރުމަތް ކަނޑާ މީހުންނަކީ މޮޔައިންކަމަށް ހަދައި، އެއްވެސް ފިޔަވަޅެއްނާޅާ، މިސްކިތްތަކަށް ކުޑަކަމުގޮސް، ކީރިތި ގުރުއާނަށް ކުޅުޖެހުންފަދަ ދަށު ދަރަޖައިގެ ޢަމަލުތައް ހިންގާ ފަރާތްތައް މުޖްތަމަޢުތެރެއަށް ދޫކޮށްލުމަކީ ނުހަނު ކަންބޮޑުވާ ކަމެއް.
– ސަލީމް ވިދާޅުވިއެވެ.
އިސްލާމްދީނަށް ފުރައްސާރަކުރާ މީހުން މުޖްތަމައުގެ ތެރެއަށް ދޫކޮށްލުމާއި އެމީހުން އިޞްލާޙު ކުރުމަށްޓަކައި ކުރައްވާނެ ކަންކަން އެ ބަޔާނުގައި ހިމެނިފައި ނެތުމުން، އިސްލާމް ދީނުގެ ޙިމާޔަތުގައި ސަރުކާރުން މިހާތަނަށް ވެސް އަދި ކުރިމަގުގައި ވެސް މަސައްކަތެއް ނުކުރާނެކަން ހާމަވާކަމަށާއި، ސަރުކާރުން ދަނީ އިސްލާމްދީނުގެ ޙުރުމަތް ކެނޑޭފަދަ ކަންކަމަށް ހިތްވަރު ދެމުން ކަމަށް ސަލީމް ވިދާޅުވިއެވެ.
