އެމްޑީޕީގެ ކޯލިޝަން ވެރިކަމުގެ ފުރަތަމަ ދައުރަށް 3 އަހަރު ފުރިގެން ގޮސްފައިވާއިރު، އެޕާޓީގެ ތެރެއިން ފެންނާން އޮތް ގިނަ ބައެއްގެ ޝައުގުވެރިކަން ހުއްޓިފައިވާ އެއް ކަމަކަށް ވެގެން ގޮސްފައިވަނީ، ޕާޓީގެ އެތެރޭގައި އޮތް ޚިޔާލު ތަފާތުވުމާއި، ބައިބައިވުމާއި، ސިޔާސީ ކޯޅުމެވެ.

މިގޮތުން ޕާޓީގެ އެތެރޭގައި އުފެދިފައިވާ ބޮޑެތި ޚިޔާލުތަފާތުވުންތަކގެ ވާހަކަތައް އެންމެ ފުރަތަމަ ދައުރުގެ ކުރީކޮޅުގައި ތުންތުން މަތި ދެކެވި، އެހެންނަމަވެސް، އަސްލު ހަގީގީ މަންޒަރު ކަޝްފުވެގެން ދިޔަ ނުދީ ޕާޓީގެ އިސްފަރާތްތަކުން އެތައް ދުވަހެއް ވަންދެން ހިފެހެއްޓި ނަމަވެސް، އާންމު ރައްޔިތުންނާއި ހަމައަށް މިކަންކަން ތިވެލަވެގެން ނުގޮސް މާ ގިނަ ދުވަހަކު ޕާޓީގެ އެތެރޭގައި ބޭއްވޭގޮތް ވެފައެއް ނުވެއެވެ.

އަދި ރައީސް ނަޝީދަށް އަމާޒުކޮށް ދެވުނު 6 މޭގެ ޓެރަރިސްޓު ހަމަލާއަށް ފަރުވާ ހޯއްދެވުމަށް އެމަނިކްފާނު ރާއްޖެއިން ބޭރަށް ވަޑައިގެން ހުންނަވާ، ރައީސް ސާލިހަށް އަމާޒުކޮށް ދެއްވި ބަހުގެ ހަމަލާތަކާއި ހަމައިން އެމްޑީޕީގެ އެތެރޭގައި އޮތް ސިޔާސީ ބައިބައިވުން، "ބުޅާ ގޯނިން ބޭރުވާ" ބީދައިން އާންމުންނާއި ހަމައަށް ފާޅުވެގެން ދިޔައެވެ. މިގޮތުން 2021ވަނަ އަހަރު، ކޯވިޑްގެ ހާލަތު މުޅި ދުނިޔެއާއި އަދި ރާއްޖޭގައިވެސް އެންމެ ގޯސްފައިވެފައި އޮތް ދުވަސްވަރު، ޓެރަރިސްޓު ހަމަލާއިން ލިބިވަޑައިގެންނެވި އަނިޔާތަކަށް ފަރުވަ ހޯއްދެވުމަށް ރާއްޖެއިން ބޭރުގައި ހުންނަވާ، ރައީސް ނަޝީދުވަނީ، އިތުރަށް ރައީސް ސާލިހާއެކީ ދެން އިތުރަށް ސިޔާސީ މަސައްކަތް ނުކުރައްވާނޭކަން ހާމަ ކުރައްވާފައެވެ. އަދި ހަމަ އެ ޖަޒުބާރުގައި، ދެން ސިޔާސީ މަސައްކަތް ކުރައްވަން ބޭނުންފުޅުވަނީ ރައީސް ޔާމިންއާއެކީ ކަމަސްވެސް ރައީސް ނަޝީދު ވިދާޅުވެފައި ވެއެވެ.

އަދި އެއަށްފަހު، ރައްޔިތުންގެ މަޖިލިހުގެ ސުޕަރ މެޖޯރިޓީވެސް ދެ ފެކްޝަނަކަށް ބެހި، ވާދަވެރިކަން ބޮޑުވެ، އެންމެ ފަހުން ރައީސް ނަޝީދުގެ ފެކްޝަނަށް ނިސްބަތްވާ މެމްބަރުން، މަޖިލިސް ފްލޯގައި ރައީސް ސާލިހުގެ އިސްތިއުފާއަށްވެސް ގޮވާފައި ވެއެވެ.

އެހެންނަމަވެސް، އެއަށްފަހު، އެއަހަރުގެ ޖުލައިމަހު ރައީސް އޮފީހުގައި އޮތް ޕްރެސް ކޮންފަރެންސްއެއްގައި، އެމްޑީޕީގެ ގައުމީ މަޖިލީހާއި އަދި ރައްޔިތުންގެ މަޖިލިހުގެ މެޖޯރިޓީވެސް އަތްޕުޅުގައި އޮތްކަމުގެ ޔަގީންކަން މީޑިއާތަކުގެ ކުރިމަތީގައި ރައީސް ސާލިހު ދެއްވި ހިސާބުން، ރައީސް ނަޝީދުގެ ބަސްމަގު އެކީ ކަހަލަގޮތަކަށް ބަދަލުވެ، ރައީސް ސާލިހަަށް އަމާޒު ކުރައްވަމުން ގެންދެވި ފާޑުވިދާޅުވުންތައްވެސް ހުއްޓުމަކަށް އައި މަންޒަރު ފެނިގެން ދިޔައެވެ.

އަދި އެއާއެކު، ރައީސް ނަޝީދު ފަރުވާއަށްފަހު މާލެ ވަޑައިގަތް ދުވަހު، ރައިސް ސާލިހު އެމަނިކްފާނަށް ވިދާޅުވި މަރުހަބާއިންނާއި، "ކުރެއްވި ސަލާމުން" އެމްޑީޕީގެ އެތެރޭގަ އޮތް ބޮޑެތި ޚިޔާލު ތަފާތުވުންތަކަށް ފިނިކަން އައިސް، މަސްރަހު އަމާންވެ، ހުރިހާކަމެއް ހަމައަކަށް އެޅިގެން ދިޔައީ ކަމުގައި ވަރަށް ގިނަބަޔަކަށް ހީވެގެން ދިޔައެވެ.

ޗެއަރ ޕާރސަން އިންތިޚާބުގެ ވާދަވެރިކަމުންވެސް ފާޅުވެގެން ދަނީ އޮތް ދެކޮޅުވެރިކަން!

ރާއްޖޭގެ ވެރިކަމުގެ ނިޒާމު ބަދަލު ކުރެއްވުމަށް ބޭނުންފުޅު ވާކަމުގައި ވިދާޅުވެ، ރައީސް ނަޝީދު އެ މަސައްކަތް ފެއްޓެވި ހިސާބުން ޕާޓީގެ އެތެރޭގައި އުފެދިގެން ދިޔަ ދެކޮޅުވެރިކަން އޭގެ ކުންނާއި ހަމައަށް ދަތުރުކުރުމަށް ފަހު، ފައިތުވެދިޔަ ހައެއްކަ މަސްދުވަސް ފާހަގަވެގެން ދިޔައީ މި ދެކޮޅުވެރިކަމަށް ނިމުން އައިސްފާވަކަށް ގިނަ ބަޔަކަށް ހީކުރެވިގެންދިޔަ ހައެއްކަ މަސްދުވަސް ކަމުގައެވެ.

އަދި މި މުއްދަތުގެ ތެރޭގައި ރައީސް ނަޝީދު ދައްކަވަމުން ގެންދަވާ ނިޒާމު ބަދަލުކުރުމުގެ ވާހަކަތަކަށްވެސް ފަނޑުކަން އައިސް، އަދި އޭގެ ނަތީޖާއެއްގެ ގޮތުން، މަޖިލިސް ފްލޯއިންވެސް ދެފެކްޝަންގެ ވާދަވެރިކަން ފިނިމަމެއް އައިސްފައިވާ މަންޒަރުން ވަތީ ތަމްސީލުވެގެން ގޮސްފައެވެ.

އެހެންނަމަވެސް މި ހުރިހާ ބަދަލުތަކާއެކު، އަދި ކޮމަންޑޫ ދާއިރާގެ މަޖިލިސް ބައި އިލެކްޝަންވެސް ކާމިޔާބު ވެދިއުމަށްފަހު، ދެން ކުރިމަތީލީ އެމްޑީޕީގެ އެތެރޭގެ އެންމެ ބޮޑު އިންތިޚާބާއެވެ. އެއީ ހުންނެވި ޗެއަރޕާސަންގެ ދައުރު ހަމަވެ، އާ ޗެއަރޕާރސަންއަކު އިންތިޚާބު ކުރުމުގެ ވާދަވެރިކަމެވެ. އަދި މި ވާދަވެރިކަމުގެ ތެރެއިން އެންމެ ޚާއްސަ ގޮތެއްގައި ފާހަގަ ވެގެންދިޔަ އެއްކަމަކީ އެންމެ ފަހުވަގުތު މި އިންތިޚާބުގައި ވާދަކުރައްވާ ދެކެނޑިޑޭޓުންނެވެ.

އެއީ އިކޮނޮމިކް މިނިސްޓަރ ފައްޔާޒު އިސްމާއީލާއި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީއެވެ. އިމްތިޔާޒު ފަހުމީއަކީ ރައްޔިތުންގެ މަޖިލިހުގައި ރައީސް ނަޝީދުގެ އެންމެ ގާތް އަދި އެންމެ އިތުބާރުކުރައްވާ އެއް މެމްބަރެވެ. ފައްޔާޒު އިސްމާއީލަކީ ރައީސް ސާލިހު އެންމެ އިތުބާރު ކުރައްވާ ވަޒީރެވެ.

އެހެންކަމުން، މި ދެބޭފުޅުން އެކަނި މި އިންތިޚާބުގައި ވާދަކުރުމަށް ކެމްޕޭން ކުރައްވަން ފެއްޓެވި ހިސާބުން، ގިނަ ބަޔަކަށް ކަށަވަރުވެ ޔަގީން ވެގެން ދިޔައީ، މިއިންތިޚާބަކީ، މި ދެބޭފުޅުންގެ މެދުގައި އޮތް ވާދަވެރިކަމެއްގެ ބަދަލުގައި މި އިންތިޚާބަކީ ރައީސް ނަޝީދާއި ރައީސް ސާލިހާ ދެބޭފުޅުންގެ މެދުގައި އޮތް ވާދަވެރިކަމެއް ކަމެވެ. އަދި މިއީ މިގޮތުން އޮތްކަމަށް ބާރު ލިއްބައިދެނީ، ދެ ކެނޑިޑޭޓުންނަށް ކެމްޕޭނު ކުރުމަށް އެކުލަވާލެވުނު ޓީމުތައްވެސް މި ބީދައިން ބެހިގެން ދިއުމާއެކުއެވެ. މިގޮތުން އިންތިގެ ޓީމުގައި ރައީސް ނަޝީދު ފެކްޝަންގެ ނިސްބަތްވާ މެމްބަރުން ތިއްބެވިއިރު، ސަރުކާރުގެ އިސް މަގާމްތަކުގައި ތިއްބެވި ގިނަ ބޭފުޅުންނާއި އަދި ރައްޔިތުންގެ މަޖިލިހުގައި ސީދާ ރައިސް ސާލިހަށް ތާއީދުކުރާ ގިނަ މެމްބަރުން ތިއްބެވިތަން ފެންނަމުން ދަނީ އިކޮނޮމިކް މިނިސްޓަރު ފައްޔާޒު އިސްމާއީލަށް ތާއީދު ކޮށްގެންނެވެ.

އަދި މި އިންތިޚާބިގެ ވާދަވެރިކަމާއި، ދެ ފެކްޝަންގެ މެދުގައި އޮތް ވާދަވެރިކަމަށް ހަގީގީ ފިނިކަމެއް އައިސްފައި ނުވާކަން ސާބިތުވެގެން ދިޔައީ، ރޭ ބޭއްވިގެންދިޔަ އެމްޑީޕީގެ ގައުމީ މަޖިލިސް ބައްދަލުވުމުންނެވެ. މި ބައްދަލުވުމުގައި، ފައްޔާޒު އިސްމާއިލަށާއި އިމްތިޔާޒު ފަހުމީއަށް ތާޢީދުކުރާ ގައުމީ މަޖިލިސް މެމްބަރުންނާއި، މަޖިލިސް މެމްބަރުންވަނީ ބަހުގެ ހޫނު ހަމަލާތައް ރައްދުކޮށް، އެއްބަޔަކު އަނެއް ބަޔަކަށް އެތަކެއް ތުހުމަތުތަކެއްކޮށް، އަދި މިގޮތުން ކުރެވުނު ޒުވާބުތަކުގައި އެއްބަޔަކު އަނެއް ބައެއްގެ ގަޔަށް ބޮލަށް އަރަގަންނަ ހިސާބަށް ހަމަނުޖެހުން އުފެދިގެން ގޮސްފައެވެ.

އަދި މި ބައްދަލުވުމަށް ރައީސް ސާލިހާއި ރައީސް ނަޝީދު ވަޑައިގެން ނުގެންނެވި ނަމަވެސް، ޓީވީން ލައިވް ކުރަމުންދިޔަ މި ބައްދަލުވުމުން ހަގީގަތުގައި ފެނިގެންދިޔައީ، މީގެ އަހަރެއްހާ ދުވަހުގެ ކުރިންފެށިގެން ފެންމަތިވެގެންދިޔަ، ދެ ބޭފުޅުންގެ މެދުގައި އޮތް ޚިޔާލުތަފާތުވުމާއި ސިޔާސީ ވާދަވެރިކަން ކަމުގައި މިއަދު މިވަނީ ގަބޫލު ކުރަން މަޖުބުރުވެފައެވެ.

ތާއީދާ މެޖޯރިޓީ އޮތީ ކިހިނެއް!

ހޫނުވެގެންދިޔަ އެމްޑީޕީގެ ގައުމީ މަޖިލިސް އިންތިޚާބަކީ ކުރިޔަށް އޮތް ޗެއަރޕާރސަން އިންތިޚާބު ބާއްވާނޭ ތާރީޚު ރޯދަމަހާއި ދިމާވާތީ، އިކޮނޮމިކް މިނިސްޓަރު ފައްޔާޒު އިސްމާއިލްގެ ޓީމުން މި އިންތިޚާބު ރާދައިގެ ފަހަށް ލަސްކުރުމަށް ބޭނުންވާތީ މި ހުށަހެޅުމާމެދު ގޮތެއް ނިންމުމަށްޓަކާ ބޭއްވުނު ބައްދަލުވުމުގެ. މި ބައްދަލުވުމުގެ ރައީސް ނަޝީދުގެ ފެކްޝަންގެ މެމްބަރުން ވަނީ މި ތާރީޚު ލަސްކުރުމާއި ދެކޮޅަށް ފާޅުގައި ވާހަކަ ދައްކަވާފައެވެ.

އަދި މިކޮތުން މި މެމްބަރުން ދެއްކެވި ވާހަކަތަކުގައި، މިއިންތިޚާބުގައި ނުފޫޒާއި ބާރުގެ ބޭނުންކުރަމުންދާ ކަމުގެ ތުހުމަތާއި އަދި މިނޫސްނަސް ފައްޔާޒަށާއި ފައްޔާޒަށް ތާއީދުކުރާ ފަރާތްތަކުގެ މައްޗަށް އެތަކެއް ތުހުމަތުތަކެއް ކުރި މަންޒަރުވަނީ ލައިވް ޓީވީގައި ފެނިގެން ގޮސްފައެވެ.

އެހެންނަމަވެސް، ހޫނު ޒުވާބުތަކާއި، ބަހުގެ ހަމަލާތަކަށް ފަހުވެސް، ގައުމީ މަޖިލިހުގެ މި ބައްދަލުވުމުގެ ތަނަވަސް އައުލަބިއްޔަތަކުންވަނީ، އިކޮނޮމިކް މިނިސްޓަރު ފައްޔާޒުގެ ޓީމުން ބޭނުންވި ގޮތަށް، އިންތިޚާބު ލަސްކުރުމަށް ފާސް ކޮށްފައެވެ. އަދި މި ނިންމުމުން، ގައުމީ މަޖިލިހުގެ މެޖޯރިޓީ އޮތް ގޮތްވެސް ވަރަށް ރަގަޅަށް ތަމްސީލުވެގެން ދިޔައެވެ.

އެއީ ރައްޔިތުންގެ މަޖިލިހުގެ ގިނަ މެމްބަރުންނާއި، ގައުމީ މަޖިލުހުގެ ގިނަ މެމްބަރުންގެވެސް ތާއީދު ސަރުކާރަށާއި ރައީސް ސާލިހަށް އޮތް ކަމެވެ. އަދި މި ތާއީދު މިބީދައިން އޮތުމާއެކު، ގިނަބަޔަލު ގަބޫލުކުރަމުން ދަނީ، މިއިންތިޚާބު ފަސޭހަކަމާއެކު، ރައީސް ސާލިހުގެ ތާއީދާއެކީ، އިންތިޚާބުގައި ވާދަކުރައްވަމުން ގެންދަވާ އިކޮނޮމިކް މިނިސްޓަރު ފައްޔާޒު އިސްމާއިލު މިއިންތިޚާބު ކާމިޔާބުވެސް ކުރައްވާނޭ ކަމުގައެވެ. އަދި އެހާތަނުން، ފާއިތުވެދިޔަ ދިގު ޒަމާންތަކުގައި ވަކި ބައްޓަމަކަށް ހޭރިޔާކޮށްފައޮތް އެމްޑީޕީގެ ހިންގުމަށް ހެޔޮ ބަދަލެއް އައިސް، އެޕާޓީގެ މިސްރާބު އިތުރަށް ޑިމޮކްރަޓިކްވެ، އަދި މިއީ ރައީސް ސާލިހުގެ 2023ގެ އުއްމީދުތަކަށް ލިބިގެންދާނެ ދިރުމެއްގެ ގޮތުގައިވެސް ގިނަބަޔަކު ދަނީ ދެކެމުންނެވެ.

އެހެންނަމަވެސް، މިއީ އާދައިގެ ބަދަލަކަށް ވެގެން ނުދާނޭކަމުގައި ގަބޫލުކުރަން ޖެހެއެވެ. އަދި އޭގެ ނަތީޖާއެއްގެ ގޮތުން، ސިޔާސީ މަސްރަހަށް ބޮޑެތި ބަދަލުތަކެއް އަންނަމުންދާއިރު، އެމްޑީޕީގެ ކުރިޔަށް އޮތް ޗެއަރޕާސަންގެ އިންތިޚާބުގެ ނަތީޖާއަށް ގިނަބަޔަކު އިންތިޒާކުރާ މުހިންމު އިންތިޚާބަކަށް މިވަނީ ވެގެން ގޮސްފައެވެ.