އިންސްޓިޓިއުޓް ފޮރ ގްލޯބަލް ސަކްސެސް )އައިޖީއެސް( އިން ކުރިއަށްގެންދިޔަ ކެނޭޑިއަން ސްޕޭސް އެޖެންސީގެ ޖޫނިއަ އެސްޓްރޮނޯޓް ޕްރޮގްރާމް ރާއްޖޭގެ 32 ދަރިވަރަކު ފުރިހަމަކޮށްފިއެވެ.
މިއީ މިފަދަ ޕްރޮގްރާމެއް ރާއްޖޭގެ ދަރިވަރުން ފުރިހަމަކުރި ފުރަތަމަ ފަހަރެވެ. ޖޫނިއަ އެސްޓްރޮނޯޓް ޕްރޮގްރާމް ފުރިހަމަކުރި ދަރިވަރުންނަށް، ކެނޭޑިއަން ސްޕޭސް އެޖެންސީގެ ސެޓްފިކެޓް ހަވާލުކޮށްދެއްވީ އިއްޔެ ސްޓެލްކޯ މާލަމުގައި ބޭއްވި ހާއްސަ ރަސްމިއްޔާތެއްގައި އައިޖީއެސްގެ ޗެއާމަން އަދި ސީއީއޯ ރިފްއަތު މުހައްމަދެވެ.
މާލެ އާއި ހދ. ކުޅުދުއްފުށީގައި ކުރިއަށްގެންދިޔަ މި ޕްރޮގްރާމުގައި ކިޔަވައިދީފައިވަނީ މައިގަނޑު ތިން މޮޑިއުލް އަކަށެވެ. ސްޕޭސްގައި ފިޓްނަސް ބަހައްޓާނެ ގޮތާއި، ކެއިންބުއިން ކުރިއަށްގެންދާނެ ގޮތުގެ އިތުރުން، ސްޕޭސް ސައިންސް އެންޑް ޓެކްނޮލޮޖީއާއި، ޓީމެއްގެ ގޮތުގައި އެސްޓްރޮނޯޓުން ގުޅިގެން މަސައްކަތް ކުރާގޮތް ދަރިވަރުންނަށް ދަސްކޮށްދެވުނެވެ.
މި ޕްރޮގްރާމު ފުރިހަމަކުރި ދަރިވަރުންނަށް 2023 ގައި އެމެރިކާގެ ޖައްވީ އިދާރާ ނާސާގައި އިތުރު ތަމްރީނު ހޯދުމުގެ ފުރުސަތު އައިޖީއެސް އިން ފަހިކޮށްދޭނެއެވެ. އައިޖީއެސް އަކީ ރާއްޖޭގައި ސްޕޭސް ސައިންސް ކުރިއެރުވުމަށް މަސައްކަތްކުރާ ހަމައެކަނި އިންސްޓިޓިއުޝަނެވެ. އައިޖީއެސް އިން ވަނީ ރާއްޖޭގެ ފުރަތަމަ ސްޕޭސް ޕްރޮގްރާމް އިފްތިތާހުކޮށް، ރާއްޖޭގެ ފުރަތަމަ ޕްރޮޓޮޓައިޕް ސެޓެލައިޓް ގެ މަސައްކަތް ފަށާފައެވެ.
މިއީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް އަޖުމަ ބެލެމުގެ ގޮތުން ހަދާ ސެޓެލައިޓެކެވެ. އައިޖީއެސްގެ ސްޕޭސް ޕްރޮގްރާމް ކުރިއަށް ގެން ދަނީ އެމެރިކާގެ ކޭއެސްއެފް ސްޕޭސް ފައުންޑޭޝަންގެ ފަންނީ އެހީތެރިކަމާއެކީގައެވެ. އެ ޖަމިއްޔާގައި އެމެރިކާގެ ޖައްވ އިދާރާ ނާސާ އާއި ޔޫރަޕިއަން ސްޕޭސް އެޖެންސ )އީސާ( އާއި މަޝްހޫރު ސްޕޭސް ކުންފުނި ސްޕޭސް އެކްސް ގެ އިލްމުވެރިންނާއި ތަޖުރިބާކާރުން މަސައްކަތްކުރައްވައެވެ.
