ތިންވަނަ ކުއާޓަރު: ދަރަނި އަދާކުރުމަށް ސަރުކާރުން 3.26 ބިލިއަން ރުފިޔާ ހޭދަކޮށްފި

ތިންވަނަ ކުއާޓަރު: ދަރަނި އަދާކުރުމަށް ސަރުކާރުން 3.26 ބިލިއަން ރުފިޔާ ހޭދަކޮށްފި

Author
އަހުމަދު
21 ނޮވެމްބަރ 2026 09:15
0

 

މިއަހަރުގެ ތިންވަނަ ކުއާޓަރުގައި ސަރުކާރުން ޖުމްލަ 3.26 ބިލިއަން ރުފިޔާ ހޭދަކޮށްފިއެވެ. މި މުއްދަތަކީ ޖުލައި އިން ސެޕްޓެމްބަރާ ހަމައަށެވެ. މި ފައިސާ ހޭދަކުރީ ދައުލަތުގެ ދަރަނިއާއި ސަރުކާރުން ގެރެންޓީ ދީފައިވާ ދަރަނި އަދާކުރުމަށެވެ. ފިނޭންސް މިނިސްޓްރީން ނެރުނު ތަފާސް ހިސާބުތަކުން ދައްކާ ގޮތުން، މީގެ ތެރެއިން 1.53 ބިލިއަން ރުފިޔާ ދައްކާފައިވަނީ އިންޓަރެސްޓާއި އެހެނިހެން ހަރަދުތަކަށެވެ. ބާކީ 1.73 ބިލިއަން ރުފިޔާ ދައްކާފައިވަނީ ދަރަނީގެ ޕްރިންސިޕަލް އަދަދުގެ ގޮތުގައެވެ.

މި ތިން މަހުގެ ތެރޭގައި މަރުކަޒީ ސަރުކާރުގެ ދަރަނި އަދާކުރުމަށް 2.60 ބިލިއަން ރުފިޔާ ހޭދަކޮށްފައިވެއެވެ. އޭގެ ތެރެއިން 1.36 ބިލިއަން ރުފިޔާ ހިނގީ ބޭރުގެ ދަރަނިއަށް ކަމަށާއި ބާކީ އަދަދު ހިނގީ އެތެރޭގެ ދަރަނިއަށެވެ. ސަރުކާރުން ގެރެންޓީ ދީފައިވާ ދަރަނިތަކަށް 660.8 މިލިއަން ރުފިޔާ ހޭދަކޮށްފައިވެއެވެ. އޭގެ ގިނަ ބައި، 571.7 މިލިއަން ރުފިޔާ، ދައްކާފައިވަނީ ބޭރުގެ ދަރަނިތަކަށެވެ.

ދެވަނަ ކުއާޓަރުގައި ބޭރުގެ ދަރަނީގެ ބޮޑެތި ޕްރިންސިޕަލް ފައިސާ ދައްކަން ޖެހުނެވެ. އެހެންވެ، އެ މުއްދަތުގައި ދަރަނި އަދާކުރުމަށް 17.00 ބިލިއަން ރުފިޔާ ހޭދަކުރިއެވެ. ތިންވަނަ ކުއާޓަރުގެ ހަރަދަކީ އެއާ އަޅާބަލާއިރު ވަރަށް ދަށް އަދަދެކެވެ. ވޭތުވެދިޔަ އަހަރުގެ ތިންވަނަ ކުއާޓަރުގައި 4.61 ބިލިއަން ރުފިޔާ ހޭދަކޮށްފައިވެއެވެ. އެއާ އަޅާބަލާއިރުވެސް މިއަހަރުގެ ހަރަދު 29.3 އިންސައްތަ ދަށެވެ.

މިއާއެކު، މިއަހަރުގެ ފުރަތަމަ ނުވަ މަހު ދަރަނި އަދާކުރުމަށް ދައުލަތުން ހޭދަކުރި ޖުމްލަ އަދަދު 23.70 ބިލިއަން ރުފިޔާއަށް އަރާފައިވެއެވެ.

ކޮމެންޓު ފޮނުވާ

ކޮމެންޓު

އެތިކަމަކު ކޮމެންޓު ނެތެވެ.