ދުނިޔޭގެ ބޮޑެތި މީޑިއާތަކުން ރަޝިއާގައި ބްރޯޑްކާސްޓު ކުރުން ހުއްޓާލައިފި

ދުނިޔޭގެ ބޮޑެތި ގިނަ މީޑިއާތަކުން ރަޝިއާގައި ބްރޯޑްކާސްޓު ކުރުން ހުއްޓާލާ، އެގައުމުގައި ހުރި އެ މީޑިއާތަކުގެ އޮފީސްތައް ބަންދު ކުރުމަށް ނިންމައިފިއެވެ.

ޔޫކުރެއިންއަށް އަރާ، ރަޝިއާގެ އަސްކަރިއްޔާއިން އެގައުމަށް ދޭ ހަނގުރާމައިގެ ޚަބަރުތައް ރަޝިއާގެ އާންމު ރައްޔިތުންނާ ހަމައަށް ފޯރުކޮށްދިނުން ހުއްޓުމަކަށް ގެނައުމުގެ ގޮތުން، ފާއިތުވެދުޔަ ހަފްތާގައި ރަޝިއާގެ ގާނޫނުހަދާ މަޖިލިސް، ޑޫމާއިން ވަނީ، "ފޭކް ޚަބަރުތައް" ބްރޯސްޓްކާސްޓު ކުރާ މީޑިއާތަކުގެ މުވައްޒިފުންނަށް ޖަލު ހުކުމް އަންނަ ގާނޫނެއް ފާސްކޮށްފައެވެ.

މި ގާނޫނު ޑޫމާއިން ފާސްކުރުމާއި ގުޅިގެން، ޔޫކުރެއިންއަށް ރަޝިއާގެ އަސްކަރިއްޔާއިން ދެމުންދާ އުދުވާނީ ހަމަލާތައް ރިޕޯޓުކޮށްގެ 15 އަހަރުދުވަހުގެ ޖަލު ހުކުމް އައުމުގެ ނުރައްކާ އޮތުމާއި ގުޅިގެން، ރަޝިއާގައި ހުރި އޮފީސްތައް ބަންދު ކުރުމަށް މިހާރު ނިންމާފައިވާ ނޫސް މީޑިއާތަކުގެ ތެރޭގައި ސީބީއެސް ނޫހާއި، ސީއެންއެންގެ އިތުރުން ބީބީސީވެސް ހިމެނެއެވެ. މިގޮތުން ސީއެންއެންއިން މިހާރުވަނީ، ރަޝިއާބަހުން އެ ސްޓޭޝަނުން ރަޝިއާގައި ބްރޯޑްކާސްކުރުން ހުއްޓާލަން ނިންމާފައެވެ.

ދުނިޔޭގެ ބޮޑެތި ގިނަ މީޑިއާތަކުން ރަޝިއާގައި ބްރޯޑްކާސްޓް ކުރުން ހުއްޓުމަކަށް ގެނެސްފައިވާއިރު، ބޮޑެތި ސޯޝަލް މީޑިއާ ޕްލެޓްފޯމްތަކުންވެސް ވަނީ ރަޝިއާ ސަރުކާރުގެ އިސްތިހާރުތައް އެ ޕްލެޓްފޯމްތަކުގައި ގެނައުން ހުއްޓުމަކަށް ގެނެސްފައެވެ.

މިގޮތުން، ރަޝިއާއިން ޔޫކުރެއިންއަށް އަރާ، އެގައުމަށް ދެމުންދާ އުދުވާނީ ހަމަލާތަކާއި ގުޅިގެން، ރަޝިއާ ސަރުކާރުގެ އެއްވެސް އިސްތިހާރެއް ދުނިޔޭގެ އެއްވެސް ހިސާބެއްގައި ގެނެސްދިނުން، ފޭސްބުކުގެ މައި ކުންފުނި ކަމުގައިވާ މެޓަ ޕްލެޓްފޯމް އިންކް އިންނާއި ޓުވިޓަރއިން ވަނީ ހުއްޓާލާފައެވެ.

ޓުވިޓަރއިން ބުނެފައިވަނީ އެ ކުންފުނިން ރަޝިއާއި ޔޫކުރެއިންގައި އިސްތިހާރުތައް ނުދައްކާނެ ކަމަށާއި، އަދި ރަޝިއާއި ޔޫކުރެއިންގައި އިސްތިހާރު ދެކުން ސަސްޕެންޑް ކޮށްފައިވާ ކަމަށެވެ. އޭގެ ބޭނުމެއް ކަމުގައި ޓުވިޓަރއިން ބުނެފައިވަނީ މިގޮތަށް ދައްކާ އިސްތހާރުތަކުން، ސޯޝަލް ނެޓްވާރކުގައި ފަތުރާ އާންމު ސަލާމަތާއި ގުޅުންހުރި މައުލޫމާތުތަކަށް ދޭ ސަމާލުކަން ކުޑަވެދާނެތީއެވެ.

ފޭސްބުގެ މައި ކުންފުނި މެޓަރގެ ސެކިއުރިޓީ ޕޮލިސީ ހެޑް ނަތަނިއެލް ގްލެއިޝަރ ވިދާޅުވި ގޮތުގައި، ރަޝިއާގެ ސްޓޭޓް މީޑިއާގައި އަދިވެސް ޚާއްސަ ލޭބަލެއް ފެންނާން ހުނާނެ ކަމުގައެވެ. އަދި މި ބަދަލުތައް މިހާރު ގެންނާން ފަށާފައިވާ ކަމުގައާއި އަންނަ ހަފްތާ ބަނދުގައި މިބަދަލުތައް އައިސް ނިމޭނެ ކަމަށެވެ.

މި ޕްލެޓްފޯމްތަކުން ރަޝިއާގެ ސަރުކާރުގެ ޚަބަރުތަކާއި އިސްތިހާރުތައް ސެންސަރުކުރުމާއި ގުޅިގެން ރަޝިއާއިން މިހާރުވަނީ ފޭސްބުކްއާއި އަދި ޓުވިޓަރ އެގައުމުގައި ބޭނުން ނުކުރެވޭ ގޮތް ހަދާފައެވެ.