ރަޝިއާގެ ރަސްމީ ހިސާބު ކިތާބުތަކުން ދައްކާ ގޮތުގައި، ރަޝިއާގެ ރައީސްއަކީ ރައީސުންގެ ފެންވަރުގެ އާދައިގެ އާމަދަނީއެއް ލިބޭ، ހިތްތިރި މަޑުމައިތިރި ރައީސެކެވެ.
ރަޝިއާގެ ރައީސްގެ ރަސްމީ އޮފީހުން އާންމުކޮށްފައިވާ ގޮތުގައި، އެގައުމުގެ ރައީސް ލާޑިމިރި ޕުޓިންގއަށް އަހަރެއްގެ މައްޗަށް މުސާރާއިގެ ގޮތުގައި ލިބެނީ 140،000 އެމެރިކާ ޑޮލަރެވެ. އަދި ޕުޓިންގެ މާލީ ހިސާބުތަކުން ދައްކާގޮތުގައި، ޕުޓިންގެ މިލްކިއްޔާތުގައި އޮތީ، 800 އަކަފޫޓުގެ އެޕާރޓްމަންޓަކާއި، ތިން ކާރާއި ޓްރެއިލަރ (އުޅަދުތައް ތަންތަނަށް އުފުލުމަށް ބޭނުންކުރާ ހަތަރު ފުރޮޅުލީ އުލަނދު)އެކެވެ.
އެހެންނަމަވެސް، ތަޖުރިބާކާރުން ވިދާޅުވާ ގޮތުގައި، ދުނިޔޭގެ އެންމެ ބޮޑު އަސްކަރިއްޔާގެ ވެރިޔާ، އަދި ދުނިޔޭގައި މިވަގުތު އޮތް އެންމެ ބޮޑު ނިއުކުލިއަރ ފައުޖުގެވެސް ވެރިޔާ އަކީ ހަގީގަތުގައި މިވަގުތު ދުނިޔޭގައި ހުރި އެންމެ މުއްސަދި މަހުޖަނެވެ. މިގޮތުން، މި ތަޖުރިބާކާރުން ލަފާ ކުރައްވާ ގޮތުގައި، ޕުޓިންގެ މިލްކިއްޔާތުގައި 200 ބިލިއަން އެމެރިކާ ޑޮލަރުގެ އެސެޓް އެބަހުއްޓެވެ.
200 ބިލިއަން އެމެރިކާ ޑޮލަރު، ގައުމެއްގެ ރައީސަކަށްވިޔަސް، ދުވަހަކު ވިޔަފާރިއެއް ނުކުރާ، އަދި އާއީލީގޮތުންވެސް ވިޔަފާރީގެ ތާރީޚެއް ނެތް ވަކި ފަރުދެއްގެ މިލްކިއްޔާތުގައި ހުރެދާނެ ކަމަމާމެދު އާންމު އުސޫލުން އުފެދިގެންދާ ސުވާލުތަކުގެ އިތުރުން، ރަޝިއާގެ ރައީސްގެ ހަގީގީ މިލްކިއްޔާތު އޭނާއާއި ސީދާގޮތުން ގުޅުވާލުމަކީ ފަސޭހަކަމަށް ނުވާނެ ކަމުގައިވެސް އިގްތިސާދީ ބައެއް ތަޖުރިބާކާރުން ގެންދަވަނީ ވިދާޅުވަމުންނެވެ.
އަގުބޮޑު ގަޑިތައް!
ޕުޓިންގެ ފާއިތުވި 22 އަހަރުގެ ވެރިކަމުގައި، ދުނިޔޭގައި މިވަގުތު ލިބެންހުރި އެންމެ އަގުބޮޑު ގަޑިތައް އަޅުއްވައިގެން ކުޅިވަރު ކުޅުއްވާފައިވާ މަންޒަރު އެތައް ފަހަރެއްގެ މަތިންވަނީ ފެނިގެން ގޮސްފައެވެ. އަދި ބެލެވޭ ގޮތުގައި ޕުޓިންގެ މިއަގު ބޮޑު ގަޑިތަކަކީ، ބޭނުން ކުރެއްވުމަށްފަހު، އޭނާ އާމްދަނީ ހޯއްދެވުމަށްޓަކާ ވިއްކަވާލައްވާ ގަޑިތަކެވެ. އަދި މިއީ ޕުޓިންއަށް ކޮންމެ އަހަރަކުވެސް ލިބެމުންދާ އާމްދަނީ މުހިންމު އެއްބައެވެ.
ފާއިތުވެދިޔަ ތަނުގައި، 60،000 އެމެރިކާ ޑޮލަރުގެ އަގުހުރި ޕަޓެކް ފިލިއްޕޭސް ޕާރޕެޗުއަލް ކަލަންޑަރ ބްރޭންޑުގެ ގަޑި ޕުޓިން އަޅުއްވައިގެން ހުންވަނިކޮށް ފޮޓޯތަކުން ވަނީ ފެނިފައެވެ. އަދި ބުނެވޭ ގޮތުގައި، 500،000 އެމެރިކާ ޑޮލަރުގެ އަގުހުރި އޭ ލޭންގު އެންޑް ސޯހުން ޓޯބޯގްރާފް ބްރޭންޑު ގަޑީގެ އިތުރުން، ދުނިޔޭގެ އެހެން އަގުބޮޑު ބްރޭންޑްތަކުގެ ގަޑިވެސް ޕުޓިން ގެންގުޅުއްވައެވެ.
1.4 ބިލިއަން ޑޮލަރުގެ އަގުހުރި، "ބްލެކްސީ ގަނޑުވަރު"!
ބުނެވޭ ގޮތުގައި، އުސް ވާދީއެއްގައި، ބްލެކްސީއަށް ވާގޮތަށް، ޕުޓިންގެ 190،000 އަކަފޫޓުގެ ގަނޑުވަރެއް ހުރެއެވެ. ރަޝިއާގެ އައްސޭރިފަށުގައި ހުންނަ މި ގަޑުވަރަކީ މިއީ ރަޝިއާގެ އަމިއްލަ ވަކި ފަރުދަކަށް ނިސްބަތްވާ މިފަދަ އަގުބޮޑު ހަމައެކަނި ގަނޑުވަރެވެ. އަދި މިއީ ޕުޓިންގގެ އަމިއްގަ ފްލެޓްތަކާއި ގޭތަކުގެ ތެރޭގައި ހިމެނޭ އެންމެ ބޮޑު ގަނޑުވަރުވެސް މެއެވެ. މި ގަނޑުވަރަށް ކިޔާ އުޅެނީ، "ޕުޓިންގސް ކަންޓްރީ ކޮޓޭޖް"އެވެ.
މި ގަނޑުވަރަކީ ޕުޓިން ޗުއްޓީ ހޭދަ ކުރެއްވުމަށް ބޭނުންކުރާ ގަނޑުވަރެވެ. މިތަން ހުންނަނީ ޖައްވަށް ހުޅުވޭގޮތަށް ހަދާފައި ހުންނަ ސީލިނގްތަކާއި، ރަނުން ހަދާފައިވާ ގުރީކުގެ ކުރީގެ ކަނލާގެތަކުގެ ބުދުތައް ވަށައިގެން ޖަހާފައިވާ، މާބުލްއިން ހަދާފައިވާ ސުވިމިންގ ޕޫލަކާއި، ސްޕާތަކާއި، މިއުޒިކް ޕާލަރތަކާއި، ތަނުގެ ހުރިހާ މުވައްޒިފުންނަށް ބޭނުންވާ ޑްރެސިންގ ރޫމްތަކާއި، ކުޅިވަރު ކުޅޭ ސްޓޭޑިއަމްއަކާއި، މަތީ ފެންވަރުގެ އައިސް ހޮކީ ރިންކްއަކާއި، ވޭގަސްގައި ހުންނަ ވައްތަރުގެ ކެސިނޯއަކާއި، ނައިޓު ކުލަބަކާއި، 100،000 އެމެރިކާ ޑޮލަރަށްވުރެ އަގުބޮޑު ވައިންގެ ޚިދުމަތް ފޯރުކޮށްދޭ ޝޯވްކޭހެއް ހިމެނޭގޮތަށް ކަމަށާއި އަދި މޫދަށް ވާގޮތަށް ބިމު އަޑީގައި ހަދާފައި ހުންނަ، ފަރިއްކުޅުއްވާ ސަރަހައްދެއްވެސް މި ގަޑުވަރުގައި ހުންނަ ކަމަށް މަޝްހޫރު ފޯޗުން މަޖައްލާގައި ރިޕޯޓު ކޮށްފައި ވެއެވެ.
މި ގަނޑުވަރު ޒީނަތްތެރި ކޮށްފައި ހުރިކަމަށް ބުނެވެނީ ދުނިޔޭގެ އެންމެ މަތީފަންތީގެ އިޓާލިއަން ބްރޭންޑެއް ކަމުގައިވާ ސިޓެރިއޯ އެންޓެނާ ބްރޭންޑުންނެވެ. އަދި މި ގަނޑުވަރު ޒީނަތްތެރި ކުރުމަށް ލުއިސް XIV ބްރޭންޑުގެ 500،000 އެމެރިކާ ޑޮލަރުގެ އަގުބޮޑު ޑައިނިން ފަރުނީޗަރު ބޭނުން ކޮށްފައިވާއިރު، މި ގަނޑުވަރު ބާރގެ ޒީނަތްތެރިކަމަށް ބޭނުން ކޮށްފައިވާ ގޮޑި މޭޒިފަދަ ފަރުނީޗަރުޔަތަކުގެ އަގު ފެށެނީ 54،000 އެމެރިކާ ޑޮލަރުންނެވެ. އަދި މި ގަނޑުވަރުގައި "ޑެކް ބާރތު ރޫމް"ތައް ހަދާފައިވާ އިރު މި ފެންވަރާ ތަންތަނުގައި 1250 އެމެރިކާ ޑޮލަރުގެ އަގުހުރި ޓޮއިލެޓް ޕާޕަރ ހޯލްޑަރތަކާއި އަދި ފާޚާނާ ބުރުސްތަކުގެ ގޮތުގައި 850 އެމެރިކާ ޑޮލަރުގެ އަގުހުރި ފާހާނާ ބުރުސްތައްވެސް ބޭނުން ކޮށްފައިވާ ކަމަށް ވެއެވެ.
ޕުޓިން މި ގަނޑުވަރުގައި ބޭނުން ކޮށްފައިވާ އަގުބޮޑު ފަރުނީޗަރތަކުގެ އިތުރުން، މި މުޅި ގަނޑުވަރު ރީތިކޮށް ބޭއްވުމަށްޓަކާ އަހަރުކު ގަނޑުވަރަށް 2 މިލިއަން އެމެރިކާ ޑޮލަރު ހޭދަ ކުރެވެއެވެ. މިތަން ބެލެހެއްޓުމަށް 40 މުވައްޒިފުން ގަނޑުވަރުގައި ވަޒީފާ އަދާ ކުރަމުން ދެއެވެ.
ރަޝިއާގެ ރައީސް ލާޑިމިރ ޕުޓިންގެ "ބްލެކްސީ ގަނޑުވަރު" ޑިޒައިން ކޮށްފައިވަނީ، އިޓަލީގެ އާކިޓެކްޓެއް ކަމުގައިވާ ލަންފްރަންކޯ ސިރިއްލޯއެވެ. އަދި މި އިމާރާތް ހެދުމަށް 1.4 ބިލިއަން އެމެރިކާ ޑޮލަރު ޚަރަދު ވެފައިވެއެވެ.
ރޮއިޓާސްއިން ކޮށްފައިވާ ތަހުގީގަކުން ހާމަވެގެން ގޮސްފައިވާ ގޮތުގައި، ޕުޓިންގގެ މި ގަނޑުވަރު ބިނާކޮށްފައިވަނީ، ރަޝިއާގެ ސަރުކާރުން ކުރިޔަށް ގެންދިޔަ، 1.3 ޓްރިލިއަން ރުބެލްގެ (ރުބެލްއަކީ ރަޝިއާގެ ފައިސާ) "ހެލްތު" ޕްރޮޖެކްޓަށް އެގައުމެ ސަރުކާރުން ގަތް މެޑިކަލް އެކުއިޕްމަންޓް ގަތުމަށް ކުރި މުއާމަތާތްތަކުގެ ތެރެއިންނެވެ.
މި ބޮޑު ޕްރޮޖެކްޓަށް މެޑިކަލް ސާމާނު މާރކެޓްގެ އަގަށްވުރެ ބޮޑުކޮށް ގަނެފައިވަނީ، ޕުޓިންގ އަރިސް، ރަޝިއާގެ މަހުޖަނުން ކަމުގައިވާ ޝަމަލޯވްއާއި ގޯރެލޯވްގެ ކުންފުނިންނެވެ. މިއީ ޔޫކުރެއަށް ރަޝިއާއިން އުދުވާނީ ހަމަލާ ދޭން ފެށުމާއެކު ދުނިޔޭގެ އެކި ގައުމުތަކުން މިހާރު ދަތިކުރުމުގެ ފިޔަވަޅު އަޅާފައިވާ ރަޝިއާގެ ދެ މަހުޖަނުންނެވެ.
ޕުޓިންގެ މި ގަނޑުވަރު ޑިޒައިން ކޮށްދިން އިޓަލީގެ އާކިޓެކްޓެއް ކަމުގައިވާ ލަންފްރަންކޯ ސިރިއްލޯއަށް، އޭނާގެ މަސައްކަތުގެ ފައިސާ ދައްކާފައިވާ ގޮތްވެސް ރޮއިޓަސްގެ ތަހުގީގުން ވަނީ ހޯދާފައެވެ. މިގޮތުން އޭނާއަށް ފައިސާ ދައްކާފައިވަނީ، ރެކޯޑްތަކުން ދައްކާ ގޮތުގައި، ޕުޓިންގ އަރިސް، ރަޝިއާގެ ދެމަހުޖަނުން ކަމުގައިވާ ޝަމަލޯވްއާއި ގޯރެލޯވް، ސުވިސްބޭންކުގެ ބެލިޒް (Belize company) ނަމަކަށް ކިޔާ ކުންފުންޏަކަށް 56 މިލިއަން ޑޮލަރު ޓްރާންސްފަރ ކޮށްގެންނެވެ. އަދި އެއަށްފަހު، ބެލިޒް ކުންފުނީގެ އަކައުންޓުންވަނީ، ސިރިއްލޯގެ އަމިއްލަ އެކައުންޓެއް ކަމުގައިވާ މެޑެއާ އިންވެސްޓަންޓަށް 48 މިލިއަން އެމެރިކާ ޑޮލަރު ޓްރާންސްފަރ ކޮށްފައެވެ.
އެހެންނަަމަވެސް، މޮސްކޯ ޓައިމްސްއިން ރިޕޯޓު ކޮށްފައިވާ ގޮތުގައި، ޝަމަލޯވްއާއި ގޯރެލޯވް އަދި ސިރިއްލޯވެސް މި ތުހުމަތުތަކަށް ވަނީ އިންކާރު ކޮށްފައެވެ.
ރަޝިއާގައި ޕުޓިންގެ މިލްކިއްޔާތުގައި އެއްވެސް ގަނޑުވަރެއް ހުންނަކަމަށް ކްރެމްލިންގއިން ދެކޮޅު ހަދައެވެ. އަދި ކްލެމްލިންއިން ބުނާ ގޮތުގައި، މި ގަނޑުވަރަކީ ރަޝިއާގެ މުއްސަދި މަހުޖަނެއްގެ ގަނޑުވަރެކެވެ. އެހެންނަމަވެސް، ރަޝިއާގެ އެނަލިސްޓުންވެސް ބުނާގޮތުގައި މިއީ ބޮޑު ދޮގެކެވެ. ސަބަބަކީ، އެފްބީއެސް (FSB)، ރަޝިއާގެ ފެޑެރަލް ސެކިއުރިޓީ ސާރވިސްއިން ސެކިއުރިޓީ ބަލަހައްޓާ، އަދި އެ ގަނޑުވަރު ހިމެނޭ ވައިގެ ސަރަހައްދަކީ އުދުހުން މަނާ ސަރަހައްދެއްގެ ގޮތުގައި ކަނޑައަޅާފައިވާ، އަމިއްލަ ވިޔަފާރިވެރިއެއްގެ ގަނޑުވަރެއް ރަޝިއާގައި ނެތުމުންނެވެ.
އެއަރ ކްރާފްޓްތަކާއި، ހެލިކޮޕްޓަރތަކާއި ކާރުތައް!
ޕުޓިންގެ "ބްލެކް ސީ" ގަނޑުވަރުގެ އިތުރުން، ރަޝިއާގެ ރައީސްގެ އިތުރު 19 ގެއެއް ރަޝިއާގައި އެބަހުއްޓެވެ. އަދި އޭނާގެ އަމިއްލަ 700 ކާރުކޮޅު އޮތުމުގެ އިތުރުން، ޕުޓިން އަމިއްލަ މިލްކިއްޔާތުގައި 58 އެއަރ ކްރާފްޓާއި ހެލިކަޕްޓަރވެސް އޮތްކަމުގައި ފޯޗުން މަޖައްލާއިން ބުނެފައި ވެއެވެ. މީގެ ތެރޭގައި، 716 މިލިއަން އެމެރިކާ ޑޮލަރުގެ އަގުހުރި "ދަ ފްލައިން ކްރެމްލިން" ނަމަކަށް ކިޔާ، ރަނުން ހަދާފައިވާ ފާޚާނާއެއް ހުންނަ މަތިންދާ ބޯޓު ހިމެނެއެވެ. ޕުޓިންއަކީ ގުރީކު ރޯމަނުންގެ ކުރީގެ އާރކިޓެކް ޑިޒައިންތަކަށް ލޯބިކުރައްވާ ބޭފުޅެކެވެ.
އަދި މީގެ އިތުރުން، އެއްގަމާއި ވަޔާއި ކަނޑުގައި ޕުޓިންގއަށް ލިބިގެންގޮސްފައިވާ މުއްސަދިކަމުގައި ހިމެނޭ، ރަޝިއާގެ ނޭވީއަށް ނިއުކުލިއަރ ސަބްމެރިން އުފައްދާދޭ ކުންފުނިން ޑިޒައިން ކޮށްފައިވާ 100 މިލިއަން ޑޮލަރުގެ އަގުބޮޑު މެގަ ޔޮޓެއް ޕުޓިންގެ މިލްކިއްޔާތުގައި އޮވެއެވެ.
200 ބިލިއަން ޑޮލަރު ހޯދީ ކިހިނެއް؟
ޕުޓިން މިލްކިއްޔާތުގައި ހުރިކަމަށް ލަފާ ކޮށްފައިވާ 200 ބިލިއަން ޑޮލަރުގެ އަންދާޒާއަކީ، ފައިނޭންސަރ ބިލް ބްރޯޑަރ 2017ވަނަ އަހަރު ޔޫއެސް ސެނެޓްގެ ޖުޑިޝަރީ ކޮމިޓީއަށް ދީފައިވާ ބަޔާންތަކުގައި އޭނާ ހައްދަވާފައިވާ ދިރާސާތަކުގައި ޕުޓިންގެ މިލްކިއްޔާތު އެކުލެވިގެންވާކަމަށް އޭނާ ކުއްރާފައިވާ އެސްޓިމޭޓެވެ.
އަދި އޭނާ ވިދާޅުވެފައިވާ ގޮތުގައި، ޕުޓިން އޭނާގެ މުއްސަދިކަމުގެ ބޮޑުބައި ހޯއްދަވާފައިވަނީ، ޕުޓިން ރަޝިއާގެ ވެރިކަމަށް އައިތަނާ ކަހަލަގޮތަކަށް، އޭނާއާއި ދެކޮޅަށް ތެދުވި އެގައުމުގެ އޭރުގެ އެންމެ މުއްސަދި އެއް މަހުޖަނު މިޚައިލް ޚޮޑޮކޮވިސްކީ 2003 ވަނައަހަރު ޖަލަށް ލެއްވި ހިސާބުންނެވެ.
"ޚޮޑޮކޮވިސްކީ ކުށްވެރިވާކަމަށް ނިންމާ، އޭނާ ޖަލަށް ލީ ހިސާބުން، ޚޮޑޮކޮވިސްކީއާއި އެއް ގޮޅިއެއްގައި އެމީހުން ހަޔާތް ނިމިގެން ދިޔަ ނުދިއުމުގެ ގޮތުން، ރަޝިއާގެ އެންމެ މުއްސަނދި މަހުޖަމުން ޕުޓިންގެ ގާތަށް ގޮސް އެމީހުން އެދުނީ އެމީހުން ޕުޓިންގއަށް ކޮށްދޭންވީ ކޮން ކަމެއްތޯ. ބެލެވޭ ގޮތުގައި ޕުޓިންގގެ ޖަވާބަކަށްވީ "%50″. މި ޖަވާބުގައި ޕުޓިން ވިދާޅެއް ނުވޭ، މި %50އަކީ ރަޝިއާގެ ދައުލަތަށް ދައްކަން ޖެހޭ ފައިސާކަމެއް ނުވަތަ ރަޝިއާގެ ރައީސްގެ ސަރުކާރަށް ދައްކަންޖެހޭ އެއްޗެއް ކަމެވެ. ނަތީޖާއެއްގެ ގޮތުން މި މަހުޖަނުންނަށް އެގިގެން ހިގައްޖެ މިއީ ލާޑިމިރު ޕުޓިންއަށް އެމީހުންގެ ވިޔަފާރިތަކުން އެމީހުން ދޭންޖެހޭ އެއްޗެއްކަން،" ފައިނޭންސަރ ބިލް ބްރޯޑަރގެ ބަޔާނުގައި އޭނާ ވިދާޅުވެފައި ވެއެވެ.
އަދި މީގެ އިތުރުން ލީކްވެފައިވާ "ޕެނަމާ ޕޭޕާރސް"ތަކުން ހާމަވެފައިވާ ގޮތުގައި، ޕުޓިންގެ ސިއްރު އޮފްޝޯރ (އެމީހަކު ކޮންޓްރޯކުރާ އެހެންނަމަވެސް އަމިއްލަ ނަމުގައި ނުހުންނަ ކުންފިނިތައް) ޑީލްތަކުން 2016ވަނަ އަހަރު ކޮށްފައިވާ ފައިސާގެ މުއާމަލާތްތަކާއި ލޯންތަކުގެ އަދަދު 2 ބިލއަން އެމެރިކާ ޑޮލަރަށް އަރައެވެ.
އެހެންނަމަވެސް މި ހުރިހާ ތުހުމަތުތަކަށްވެސް ޕުޓިން ދެކޮޅު ހައްދަވައެވެ. އަދި އޭނާގެ މުއްސަދިކަން އޭނާ ސިފަ ކުރައްވަނީ މުޅިން ތަފާތު ގޮތަކަށެވެ.
އަހަރެންނަކީ ހަމައެކަނި ޔޫރަޕްގައި ހުރި އެންމެ މުއްސަދު މީހާއެއް ނޫން، މުޅި ދުނިޔޭގައިވެސް ހުރި އެންމެ މުއްސަނދި މީހާ. އަހަރެން ހާސިލް ކޮށްފައިވަނީ މީހުންގެ ޖަޒުބާތު، ލޯބި. އަހަރެން މުއްސަނދީ ރަޝިއާގެ ރައްޔިތުން އެވަރުގެ ވަރުގަދަ ގައުމެއްގެ ލީޑަރެއްގެ ގޮތުން އަހަރެންނަށް އެތައް ގޮތަކުން އިތުބާރު ކުރާތީ. އަހަރެން ދެކޭގޮތުގައި އަހަރެންގެ މުއްސަދި ކަމަކީ އެއީ.
ޕުޓިން ވިދާޅުވެފައި ވެއެވެ.
އެހެންނަމަވެސް، ފެންނާން ހުރި ހުރިހާ ހެކިތަކާއި، ލީކުވެފައިވާ ޕޭޕާރ ތަކުންނާއި، އަދި ބަޔާންތަކުންވެސް ޕުޓިން ނުހައްގުން ހޯދާފައިވާ މުއްސަދިކަމުމުގެ އެތައް ހެއްކެއް ފެންނާން ހުރިނަމަވެސް، ޕުޓިން ގެންދަވަނީ، އޭނާއަކީ ރަޝިއާގެ ރައްޔިތުންގެ ޚާދިމެއްކަން ތަމްސީލު ކޮށްދީ، އޭނާއަކީ އެންމެ އާދައިގެ ދިރިއުޅުމަކަށް ލޯބިކުރާ އާދައިގެ ލައިފް ސްޓައިލްއެއްގެ މީހެއްކަން ދުނިޔެއަށް ތަމްސީލު ކޮށްދެމުންނެވެ.
ޔޫކުރެއިންގެ އުދުވާނާކީ ބޮޑު ބަދަލެއް؟
އެހެންނަމަވެސް، ޕުޓިން އޭނާގެ އަސްރިއްޔާ ޔޫކުރެއިންއަށް ފޮނުވާ، އެގައުމަށް އުދުވާނީ ހަމަލާ ދޭން ފެށުމާއެކު، ދުނިޔޭގެ ގިނަ ގައުމުތަކުން ދަނީ ޕުޓިންގެ އެސެޓްތައް ހިފަހައްޓާ އަދި އޭނާގެ ވަށައިގެން ދިތިބި އެތައް މަހުޖަނުންނަކަށް ދަތިކުރުމުގެ ފިޔަވަޅުތައް އަޅާ، އެމީހުންގެ މުދާތައް ހިފައްޓާ، އަދި އެމީހުންގެ އެސެޓްތައް ރައްކާ ކޮށްފައި ހުރި ގޮތާއި ތަންތަންވެސް ހޯދާ ބަލަމުންނެވެ.
އަދި ގިނަ ބަޔަކު ގަބޫލުކުރާ ގޮތުގައި، މި ފިޔަވަޅުތަކާއެކު، ޕުޓިންއަށްވެސް އަދި އޭނާގެ ވެރިކަން މިހާތަނަށް ދަމަހައްޓާ ދީފައިވާ މަހުންޖަނުންނަށްވެސް ފާއިތުވެދިޔަ ޒަމާންތަކުގައި ކުރިމަތި ލާންޖެހިފައި ނުވާވަރުގެ ބޮޑެތި މާލީ ގޮންޖެހުންތަކާ ކުރިޔަށް އޮތްތަނުގައި ކުރިމަތިލާން މަޖުބޫރު ވާނެއެވެ.
އަދި މީގެ ނަތީޖާއެއްގެ ގޮތުގައި، ރަޝިއާގައި އޮތް ޕުޓިންގެ މުއްސަދިމަކާއި، އޭނާގެ އަރާއި ބާރަށް ލޮޅުން އަރޭނެތޯ ނުވަތަ ނޫންތޯ މިއީ އޭގެ ޖަވާބަކަށް އަދި އިންތިޒާރު ކުރަންޖެހޭ ސުވާލެވެ.
