ސަރުކާރާއި ރައްޔިތުންގެ މަޖިލިސް އެމްޑީޕީއަށް ލިބި، މިހާރަށްވުރެ އެޕާޓި ބަލިކަށިވި ޒަމާނެއް  ނާންނަކަމަށް އެމްޑީޕީގެ ޗެއަރޕާސަންގެ މަޤާމަށް ޥާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވެއްޖެއެވެ.

އިންތި މިހެން ވިދާޅުވީ، ކުރިއަށް ގަލޮޅު އުތުރު ދާއިރާގެ މެންބަރު އަދި މަޖިލީހުގެ ނާއިބު ރައީސް އީވާ ޢަބްދުالله ހުށަހަޅުއްވި މާލީ އަދި އެހެނިހެން މަޞްލަޙަތުތައް ހާމަކުރުމުގެ ބިލަށް ވާހަކަފުޅު ދައްކަވަމުންނެވެ.

އިންތި ވިދާޅުވީ، އީވާ ހުށައެޅުއްވި ބިލަކީ އެމްޑީޕީގެ އުސޫލްތައް ހިފަހައްޓާ ބިލެއްކަމަށެވެ. އިންތި ވިދާޅުވީ އެމްޑީޕީއާއި އެޕާޓިގެ މެންބަރުން ޤަބޫލު ކުރާ އުސޫލަކީ މެންބަރުން ބަނދެވެން ޖެހޭނީ ޕްރޮޖެކްޓެއްގައި ނުވަތަ ބިޑު ނުވަތަ ލިބޭ ވަޒީފާތަކެއްގައި ނޫންކަމަށެވެ. ޢާންމު މެންބަރުން އެޕާޓީ ދެކެ ލޯބިވަނީ ޕާޓީގެ އުސޫލްތައް ނަގަހައްޓާތީކަމަށާއި، އެއީ މެންބަރުން ތަޢީދުކުރާ ސަބަބުކަމަށެވެ.

އެންމެނަށް އެނގޭ ހަގީގަތެއް މި ދެންނެވިކަހަލަ ޒާތީ ކަންތައްތަކާ ވަރަށް ބޮޑަށް ބައެއް ބޭބޭފުޅުން ބަނދެވޭގޮތް އެބަވޭ. ޕރޮޖެކްޓެއް، ބިޑްތައް ކާމިޔާބުކުރުން އަމިއްލަ ބޭނުންތަކަށް ވަޒީފާތައް ހޯދުން. މިއީ ހަމަ ބަނދެވިފަހުރި ކަންތައްތަކެއް ގޮތުގަ މިއީ ހަގީގަތެއްކަން ވަރަށް ގިނަ ބަޔަކު ޤަބޫލުކޮށްފި.

– އިމްތިޔާޒް ފަހުމީ

އެމްޑީޕީ ސަރުކާރެއްގައި ކޮރަޕްޝަން އޮތުން ނޭދޭކަމަށާއި، ނަމަވެސް ކޮރަޕްޝަން ޕާސެޕްޝަން އިންޑެކްސްގައި އެންމެފަހުންވެސް 10 ދަރަޖަ ރާއްޖެ ދަށަށް ވެއްޓުނުކަން އިންތި ފާހަގަކުރެއްވިއެވެ. އެފަދަ ކަންކަން އެބަހިނގާކަމަށާއި، ވެންޓިލޭޓަރުގެ ބޮޑު ޚިޔާނަތް އެބައޮތްކަމަށާއި، އެތައް މިލިއަން ރުފިޔާ ގެއްލިއްޖެކަމަށްވެސް އިންތި ވިދާޅުވިއެވެ.

އަމިއްލަ ރިޔާސީ ކޮމިޝަނުން މައްސަލ ބައްލަވާ ޕޮލިހާ އޭސީސީފަދަ މުއައްސަސާތަކުން ޖޮއިންޓް އިންވެސްޓިގޭޝަނަކުން ކޮރަޕްޝަން މައްސަލަ ބަލައި ޕީޖީން ދައުވާކުރަން ކޯޓަށް ފޮނުވުމުންވެސް ސަރުކާރުގައި ވަޒީރަކު ހުރުން ފާހަގަކޮށް އިންތިވަނީ އެކަންކަން ވަރިހަމަކޮށްފައިވާކަމަށް ވިދާޅުވެ ނުސީދާކޮށް ޔޫތު މިނިސްޓަރ މަހުލޫފަށް އިންތި ފާޑުވިދާޅުވިއެވެ.

އެންމެެ ލޯބިވަނީ ވަކި މީހަކު ދެކެނޫންކަމަށާއި، އެމްޑީޕީއާއި އެމްޑީޕީގެ އުސޫލްތައްދެކެކަމަށް އިންތި ވިދާޅުވިއެވެ. އެންމެ ބޮޑަށް ބާރު އަޅާނީ އެ ހަމަތައް ނަގަހައްޓަންކަމަށާ ބާޠިލް ގޮތްތައް ބާޠިލްވާނެކަމަށްވެސް އިންތި ވިދާޅުވިއެވެ.

އިންތި ވިދާޅުވީ އެމްޑީޕީއަށް ސަރުކާރު ލިބި، ރައްޔިތުންގެ މަޖިލީހުގެ މެޖޯރިޓީ ލިބި މިއަށްވުރެ އެމްޑީޕީ ބަލިކަށިވި ޒަމާނެއް ނާންނަކަމަށެވެ. އޭގެ ސަބަބުތަކެއް އެބަހުރިކަމަށާއި، މާލެ ސިޓި ކައުންސިލްގެ މެޖޯރިޓީ އެމްޑީޕީއަށް ގެއްލުނީވެސް ސަބަބުތަކެއް ހުރުމުންކަމަށާއި، އެ ސަބަބުތައް ދެނެގަނެ އެޕާޓީ ހަރުދަނާކުރާނެކަމަށް އިންތި ވިދާޅުވިއެވެ.