މިއަދު ފެނިގެންދަނީ ދައުލަތުގެ މުސާރަވެރިން ޕްރޮޖެކްޓް ހޯދުމަށް އަޅުވެތި ވަމުންދާތަން ކަމުގައި އެމްޑީޕީގެ މާލެ ސިޓީގެ ރައީސް ސިފާ މުހައްމަދު ވިދާޅުވެއްޖެއެވެ.
ކުރިއަށް އޮތް އެމްޑީޕީގެ އެތެރޭގެ އިންތިޚާބުގައި ވާދަކުރާ ދެ ކެނޑިޑޭޓުންގެ ތެރެއިން އެމްޑީޕީއަށް ލޯބިހުރި މީހުން ވޯޓު ދޭނީ އިންތިއަށްކަމަށް ބުނެ މީހަކު ކުރި ޕޯސްޓަކާއި ގުޅިގެން ސިފާ ވިދާޅުވީ މިއަދު އެމްޑީޕީގެ ތެރެއިން ފެނިގެންދަނީ ވަރަށް ހިތާމަވެރި މަންޒަރެއްކަމަށެވެ.
މިހާތަނަށް އެމްޑީޕީ ފެނިގެން ގޮސްފައިވަނީ ރައްޔިތުންނަށް ހެޔޮވާނެ ކަންކަން ކުރަމުންދިޔަ ޕާޓީއެއްގެ ގޮތުގައިކަމަށެވެ. ނަމަވެސް މިހާރު އެމްޑީޕީ ފެނިގެންދަނީ ކުއްލިއަކަށް ލިބުނު މާބޮޑު ބާރުވެރިކަމެއްގެ ތެރެއިން މަޤާމުތަކުގައި ތިއްބެވި ބޭފުޅުން ސަރުކާރުގެ އެކި ޕްރޮޖެކްޓްތައް ހޯދުމަށާއި، އަމިއްލަ މަޤާމު ދިފާއު ކުރެއްވުމަށް މަސައްކަތް ކުރާތަން ކަމަށެވެ.
ޕާޓީގެ ވިސްނުން ހުރިނަމަ މަށަށް ލިބެން އޮތީ ކޮން އެއްޗެއްތޯ ބަލާކަށް ނުތިބޭނެ. މިހާތަނަށް އެމްޑީޕީ ގެނެސްފައި އޮތީ ޖުމްލަ ރައްޔިތުންނަށް ހެޔޮވާނެ ކަންކަން. މިއަދު ކުއްލިއަކަށް ފެންނަނީ މާބޮޑު ބާރެއް އޮވެގެން ދައުލަތުގެ މުސާރަވެރިން ޕްރޮޖެކްޓް ހޯދުމަށް އަޅުވެތިވާތަން.
– ސިފާ ވިދާޅުވިއެވެ.
އެމްޑީޕީގެ އެތެރޭގެ އިންތިޚާބުގައި މިނިސްޓަރ ފައްޔާޒާއި، އިންތިގެ ވާދަވެރިކަން ބޮޑުވެފައިވާއިރު، މިއިންތިޚާބަކީ ރައީސް ނަޝީދާއި، ރައީސް ޞާލިހުގެ ތާއީދު އެމްޑީޕީގައި އޮތް ގޮތެއް ސާފުވާނެ އިންތިޚާބެއްކަމަށް ބައެއް ފަރާތްތަކުން ބުނެއެވެ. ރައީސް ނަޝީދަށް ތާއީދުކުރާ ގިނަ ބޭފުޅުން އިންތިއަށް ތާއީދު ކުރާއިރު، ރައީސް ޞާލިހަށް ތާއީދުކުރާ ބޭފުޅުންގެ ތާއީދު އޮތީ މިނިސްޓަރ ފައްޔާޒަށެވެ.
ފައްޔާޒުގެ ކެމްޕެއިން ލޯންޗު ކުރުމަށް ބޭއްވި ޖަލްސާގައި ވާހަކަ ދެއްކެވި ގިނަ ބޭފުޅުން ވަނީ އެމްޑީޕީގެ މިހާރުގެ ލީޑަރޝިޕަށް ވަރަށް ބޮޑަށް ފާޑުވިދާޅުވެފައެވެ. ޚާއްސަކޮށް ޕާޓީގެ ގޮފިތަކާއި އަތޮޅުތެރޭގެ ހަރަކާތްތައް ނުހިނގާތީ މިޖަލްސާގައި ލީޑަރޝިޕަށް ވަނީ ވަރަށް ބޮޑަށް ފާޑުކިޔާފައެވެ.
