އެމްޑީޕީގެ ޗެއަރޕާސަންގެ މަޤާމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީގެ ސްޕޯކްސްޕާސަންގެ މަޤާމަށް އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ހަމަޖައްސަވައިފިއެވެ.
އެމްޑީޕީގެ ޗެއަރޕާސަންގެ މަޤާމަށް ވާދަކުރައްވާފައިވަނީ އިކޮނޮމިކް މިނިސްޓަރ ފައްޔާޟް އިސްމާޢީލާއި، މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އެވެ. އިންތިޚާބުގެ ކެމްޕެއިން ފޯރީގައި ކުރިއަށްދާއިރު، މިއިންތިޚާބުގައި އިންތި ދަނީ ދުރާލައި، ކެމްޕެއިން ފަށައި، ދޮރުން ދޮރަށް ހިނގައި އެމްޑީޕީގެ މެމްބަރުންނާއި ބައްދަލު ކުރަމުންނެވެ.
މިކެމްޕެެއިންގެ އެންމެ މުހިންމު ދައުރެއް އަދާކުރާ އިންތިގެ ސްޕޯކްސްޕާސަންގެ މަޤާމަށް ހަމަޖައްސާފައިވަނީ ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު (ވައްޑެ)އެވެ. އިންތި ވިދާޅުވީ އޭނާގެ ސްޕޯކްސްޕާސަން އަކަށް މިއިންތިޚާބުގައި ވައްޑެ މަސައްކަތް ކުރާކަމީ ލިބޭ ވަރަށް ބޮޑު ހިންހަމަ ޖެހުމެއްކަމުގައެވެ. ވައްޑެ އަކީ އެމްޑީޕީގެ އުސޫލުތަކާއި އަސާސްތައް ވަރަށް ރަނގަޅަށް އެގޭނެ ތެދުވެރި މީހެއްކަމަށް އިންތި ވިދާޅުވިއެވެ.
އެމްޑީޕީ ޗެއަރޕާސަންގެ އިންތިޚާބުގައި އަޅުގަނޑުގެ ސްޕޯކްސްޕާރސަންކަން އުނގޫފާރު ދާއިރާގެ މެންބަރު މުހައްމަދު ވަހީދު ޤަބޫލުކުރެއްވިކަމީ ލިބުނު އުފަލެއް. ވައްޑެއަކީ އެމްޑީޕީގެ ވައްޓަފާޅި ދަންނަ، ސާފުސީދާ ބަހުން ޕާޓީގެ ހަމަތަކާއި އުސޫލުތަކަށް ކެނޑިނޭޅި ވަކާލާތުކުރާ ތެދުވެރިއެއް.
– އިންތި ވިދާޅުވިއެވެ.
ވައްޑެއަކީ މިއިންތިޚާބުގައި އިންތިއަށް އެންމެ ފުރަތަމަ ތާއީދު ކުރި މީހުންގެ ތެރޭގައި ހިމެނޭ މީހެކެވެ. މަޖިލީހުގެ ސުޕަމެޖޯރިޓީ އެއް އޮންނަ އެމްޑީޕީގެ ޕާލިމަންޓްރީ ގްރޫޕުގެ ރައީސް ނަޝީދަށް ތާއީދު ކުރާ މެމްބަރުންގެ ތާއީދު އޮތީ އިންތިއަށެވެ. އަދި ރައީސް ޞާލިހަށް ތާއީދުކުރާ އެމްޑީޕީ ޕީޖީގެ ގިނަ މެމްބަރުންގެ ތާއީދު އޮތީ މިނިސްޓަރ ފައްޔާޒަށެވެ.
އަންނަ އޭޕްރީލް މަހުގެ 16ގައި ބޭއްވުމަށް އިއުލާންކޮށްފައިވާ އެމްޑީޕީގެ ޗެއަރޕާސަންގެ އިންތިޚާބުގެ ކެނޑިޑޭތް ނަންބަރުވެސް މިހާރުވަނީ ތަރުތީބު ކޮށްފައެވެ.
