ރާއްޖޭގެ ކުށުގެ ވެށީގެ އެންމެ ކުރީގައި ބިދޭސީން އުޅެނީ އެމީހުންނަށް ފިޔަވަޅު ނާޅައި ފިލައިގެން އުޅެން ޖާގަ އޮންނާތީކަމަށް ރައްޔިތުންގެ މަޖިލީހުގެ ކުރީގެ ނާއިބު ރައީސް މޫސާ މަނިކު ވިދާޅުވެއްޖެއެވެ. މޫސަ މިހެން ވިދާޅުވީ ރާއްޖޭޣައި ކުށްކުރުމުގެ ބޭނުމުގައި ބިދޭސީން ދިވެހިންނާއި ކައިވެނިކޮށްގެން އުޅޭކަމަށް މޯލްޑިވްސް އިމިގްރޭޝަނުން ހާމަކުރެއްވުމާއި ގުޅިގެންނެވެ.
މޫސަ ވިދާޅުވީ، ރާއްޖެއަށް މަސައްކަތުއަންނަ ބިދޭސީން މީހުން މެރުމާ، މާރާމާރީއާއި ގޭންގުުކުއްތަކާ މަސްތުވާތަކެތީގެ ވިޔަފާރީގާ އެންމެ ކުރީސަފުގައި އެ ތިބެނީ ފިލައިގެން އުޅެން ޖާގަ އޮވެ، އެމީހުނަށް ފިޔަވަޅު ނާޅާތީކަމަށެވެ. މޫސަ ވަނީ މިކަން ހުއްޓުވަން ޖެހޭކަމަށް ވިދާޅުވެފައެވެ.
ރާއްޖެއަށް މަސައްކަތުއަންނަ ބިދޭސީން މީހުން މެރުމާ ، މާރާމާރީއާއި ގޭންގުުކުއްތަކާ މަސްތުވާތަކެތީގެ ވިޔަފާރީގާ އެއްމެކުރީސަފުގައި އެ ތިބެނީ ފިލައގެން އުޅެންއޮންނަޖާގަ އާއި، އެމީހުނަށްފިޔަވަޅު ނާޅާތީ!ލީގަލައިޒްކޮށް ޢާއްމުކޮށްއުޅުމުގެ ހުއްދަދޭތީ މިކަން ހުއްޓުވަންޖެހޭ
— Moosa Maniku (Reeko) (@ReekoMoosa) February 23, 2022
މަޖިލީހުގެ ޚަރިޖީ ކޮމިޓީގައި މޯލްޑިވްސް އިމިގްރޭޝަންގެ ޑެޕިއުޓީ ޗީފް އިމިގްރޭޝަން އޮފިސަރު މުހައްމަދު ޝިފާން އިއްޔެ ވިދާޅުވީ، މެރިޖް ވިސާ ދޫކޮށްފައިވާ ބިދޭސީން ރާއްޖޭގައި ކުށްކުރާ. މައްސަލަ އިތުރުވަމުން އަންނަކަމަށެވެ. އޭގެ ތެރޭގައި ބޮޑެތި ކުށްތަކަށް އަރައިގަތުންވެސް ހިމެނޭކަން ފާހަގަކުރައްވާ ޝިފާން ވިދާޅުވީ، އޭގެތެރޭގައި ރާއްޖެއިން ބްލެކް ލިސްޓްކޮށްފައި ތިބޭ ބިދޭސީންވެސް ހިމެނޭކަމަށެވެ. ޝިފާން ވިދާޅުވީ އެފަދަ ބިދޭސީން ދިވެހިންނާއި ކައިވެނިކުރަނީ އެމީހުން ބޭނުންވާ ވަކި މަޤްޞަދުތަކެއް ޙާސިލުކުރުމަށްކަމަށާއި، އެފަދަ ހާލަތްތަކުގައި ބިދޭސީން ގިނައިން ކައިވެނިކުރަނީވެސް ޢުމުރުން ދުވަސްވީ ދިވެހިންނާއިކަމަށްވެސް ޝިފާން ވިދާޅުވިއެވެ. އެ ބިދޭސީން މެރީޖު ވިސާގައި ރާއްޖޭގައި ތިބެގެން ހަށިވިއްކުންފަދަ ކުށްތަކަށް އަރައިގަންނަމުންދާކަން ފާހަގަކުރެވޭކަމަށް ޝިފާން ވިދާޅުވިއެވެ.
ޝިފާން ވިދާޅުވީ، އެފަދަ ކުށްތައް ކުރާ ބިދޭސީން ރާއްޖެއިން ފޮނުވާލުމުގައިވެސް ގޮންޖެހުންތަކެއް ކުރިމަތިވަމުން އަންނަކަމަށެވެ. އެގޮތުން އެ ބިދޭސީންގެ ވިސާ ކެންސަލްކުރަން ބަލާއިރު، އެކައިވެނީގައި، ކުދިން ލިބިފައިތިބޭކަމަށެވެ. އެހެންކަމުން، ބައްޕައެއް ނުވަތަ މަންމައެއް ފޮނުވައިލަން މަސައްކަތްކުރުމުން އެހެނިހެން އިތުރު މައްސަލަތަކާވެސް ކުރިމަތިލާންޖެހޭކަމަށެވެ.
"މިސާލަކަށް އެފަދަ ބިދޭސީއެއް ފޮނުވާލާއިރު ދިވެއްސަކާއި ބިދޭސީ ފިރިހެނަކާ އިނދެގެން އަދި އޭނާއަށް ދަރިއެއް ލިބިފައި ހުރެއްޖެއްޔާ ޚަރަދު ނުކުރޭ. ދަރިން ތިއްބާ މީހަކު އިމިގްރޭޝަނުން ފޮނުވާލައިފިއްޔާ އެންމެ ފަހުން ޚަރަދު ނުލިބި ދައުލަތަށް ބަލަދު މިއަރަނީ" މުޙައްމަދު ޝިފާން ވިދާޅުވިއެވެ.
ޝިފާން ވަނީ، ރާއްޖޭގައި ކަޅުބާޒާރުގައި ބޮޑުއަގުގައި ޑޮލަރު ވިއްކައިގެން ފާއިތުވި 2 މަސް ދުވަހުގެ ތެރޭގައި 11 މީހަކު ފޮނުވާލާފައިވާކަމަށެވެ. އަދި މިދިޔަ އަހަރެއްހައި ދުވަހުގެ ތެރޭހައި ހަށިވިއްކަން އުޅުނު 46 ބިދޭސީއަކުވެސް ފޮނުވާފައިވާކަމަށްވެސް ވިދާޅުވެފައެވެ.
